ယခုနှစ်အတွင်း ဖွဲ့စည်းခဲ့တဲ့ အရေးပေါ်ကုသမှုဆေးပညာဆရာဝန်များအဖွဲ့ (Myanmar Emergency Medicine Society) ရဲ့ ပထမဆုံးအကြိမ် ညီလာခံကို ဇူလိုင် (၂၀) ရက်က Sky Star ဟိုတယ်မှာ ပြုလုပ်ခဲ့ပါတယ်။ အရေးပေါ်ကုသမှုဆေးပညာရပ်က မြန်မာနိုင်ငံမှာ (၂၀၁၃) ခုနှစ်နောက်ပိုင်းမှ ပေါ်ပေါက်လာခဲ့တာပါ။ အရင်ကဆေးရုံတွေမှာ အရေးပေါ်ဌာနဖွင့်လှစ်ထားပေမယ့် ပစ္စည်းကိရိယာမစုံလင်သလို ဆရာဝန်အငယ်တွေကိုသာ တာဝန်ချထားတဲ့ နေရာတစ်ခုဖြစ်ပါတယ်။ ဒါပေမဲ့ အရေးပေါ်ကုသမှုဆေးပညာရပ် ပေါ်ပေါက်ပြီး နောက်ပိုင်းမှာတော့ အခြားနှလုံးအထူးကု၊ ခွဲစိတ်အထူးကုဆရာဝန်တွေလို အရေးပေါ်ကုသမှု အထူးကုဆရာဝန်တွေဆိုပြီး သီးသန့်မွေးထုတ်နိုင်ခဲ့ပါတယ်။  ပြည်သူ့ဆေးရုံကြီးတွေမှာလည်း အရေးပေါ်ဌာနတွေကို အဆင့်မြှင့်တင်ထူထောင်ပြီး အထူးကုဆရာဝန်တွေကိုယ်တိုင် ကုသပေးနေပါပြီ။ ဒီလို တာဝန်ထမ်းဆောင်နေတဲ့ အရေးပေါ် အထူးကုဆရာဝန်တွေ စုစည်းပြီး အရေးပေါ်ကုသမှုဆေးပညာ ဆရာဝန်များအဖွဲ့ကို ယခုနှစ်ဇူလိုင်လထဲမှာ  မြန်မာနိုင်ငံဆရာဝန်အသင်းရဲ့ လက်အောက်မှာဖွဲ့စည်းခဲ့တာ ဖြစ်ပါတယ်။

အသင်းဖွဲ့စည်းပြီးတာနဲ့ ညီလာခံကို ပထမဆုံးအကြိမ် ကျင်းပခဲ့တာဖြစ်ပြီး အနယ်နယ်အရပ်ရပ်က ဆရာဝန်တွေ စုစည်းပြီး အရေးပေါ်ကုသမှု ဆေးပညာရပ်အတွေ့အကြုံတွေ ဖလှယ်တာ၊ ရွေးကောက်ပွဲကျင်းပတာတွေကိုညီလာခံအတွင်း ဆောင်ရွက်ခဲ့တာဖြစ်ပါတယ်။ ယခု ဖွဲ့စည်းပြီးဖြစ်တဲ့အသင်းမှာ တာဝန်ထမ်းဆောင်လျက်ရှိတဲ့ အရေးပေါ်အထူးကုဆရာဝန်ခုနစ်ဆယ်ကျော်ပါဝင်ပြီး အရေးပေါ် ဆေးပညာရပ်ဆိုင်ရာ လုပ်ငန်းတွေကို တစ်နိုင်ငံလုံးအတိုင်းအတာနဲ့လှုပ်ရှားဆောင်ရွက်လို့ ရအောင် အသင်းဖွဲ့စည်းဖြစ်ခဲ့တယ်လို့သိရပါတယ်။ လက်ရှိအနေနဲ့ ရန်ကုန်ပြည်သူ့ဆေးရုံကြီး၊ မြောက်ဥက္ကလာပပြည်သူ့ဆေးရုံကြီး၊ နေပြည်တော် ခုတင်တစ်ထောင်ပြည်သူ့ဆေးရုံကြီးနဲ့ မန္တလေးပြည်သူ့ဆေးရုံကြီးတို့မှာ အရေးပေါ်ဌာနတွေ ထူထောင်ထားပြီး နိုင်ငံတကာအဆင့်မီ ကုသပေးလျက်ရှိတယ်လို့သိရပါတယ်။ 

 

 

Related News