မြန်မာနိုင်ငံရဲ့ ဆီးချို၊ သွေးချိုရောဂါဖြစ်ပွားနှုန်းက နှစ်စဉ်မြင့်တက်လျက်ရှိပြီး ဆယ်စုနှစ်အတွင်း လူဆယ်ယောက်မှာ တစ်ယောက်နှုန်းဟာ ဆီးချို၊ သွေးချိုရောဂါဖြစ်ပွားနေတယ်လို့ မြန်မာနိုင်ငံ ဆီးချို၊သွေးချိုရောဂါ စစ်တမ်းအရသိရပါတယ်။ မြန်မာနိုင်ငံမှာ ဆီးချို၊ သွေးချို ရောဂါဖြစ်ပွားမှုနှုန်း အချက်အလက်တွေကို WHO (ကမ္ဘာ့ကျန်းမာရေးအဖွဲ့)ရဲ့ အကူအညီနဲ့ နိုင်ငံတကာနည်းစနစ်အတိုင်း ကောက်ခံထားနိုင်ခဲ့ပါတယ်။ ဒီအချက်အလက်တွေအရ မြန်မာနိုင်ငံရဲ့ အရွယ်ရောက်ပြီး သူဆယ်ယောက်မှာ တစ်ယောက်က ဆီးချို၊ သွေးချိုရောဂါဖြစ်ပွားနေပါတယ်။ ဒီနှုန်းဟာ နိုင်ငံတကာနဲ့ နှိုင်းယှဉ်ရင် အတော်လေးကို ဖြစ်နှုန်းမြင့်နေတယ်လို့ ဆိုနိုင်ပါတယ်။သုတေသနအချက်အလက်တွေအရ ပြည်တွင်းမှာ ဆီးချိုသွေးချိုရောဂါဖြစ်ပွားနေသူ (၂.၅) သန်းရှိပြီး ဆီးချို၊ သွေးချိုဖြစ်ဖို့ အလားအလာရှိနေတဲ့သူတွေ (၅)သန်းရှိနေပါတယ်။

ဒါကြောင့် တစ်နိုင်ငံလုံးမှာ ဆီးချိုသွေးချိုရောဂါနဲ့ တိုက်ရိုက်သက်ဆိုင်နေသူဦးရေ (၇.၅) သန်းခန့်ရှိနေတယ်လို့သိရပါတယ်။ ဆီးချို၊ သွေးချိုရောဂါဟာ လူထုဆိုင်ရာ ကျန်းမာရေးပြဿနာတစ်ရပ်အဖြစ်ရပ်တည်နေပြီး ဒီရောဂါဖြစ်ပြီဆိုရင် ရေရှည်ဆေးစွဲသောက်ရသလို နောက်ဆက်တွဲ ရောဂါတွေခံစားရပြီး ကျန်းမာရေးအပြင် လူမှုရေး၊ စီးပွားရေးတွေကို ထိခိုက်နိုင်တဲ့ နာတာရှည်ရောဂါအမျိုးအစားတစ်ခုဖြစ်ပါတယ်။ ဆီးချို၊ သွေးချိုရောဂါက အသက် (၂၅)နှစ်ကနေ အသက်(၆၅) နှစ်အတွင်း အရွယ်ရောက်ပြီးသူတွေ၊ အလုပ်လုပ်နိုင်စွမ်းရှိတဲ့ အသက်အရွယ်တွေမှာ ဖြစ်ပွားမှုများနေတာကြောင့် တိုင်းပြည်အတွက် လုပ်အားကျဆင်းသလို ဝန်ထုပ်ဝန်ပိုးဖြစ်လာစေတယ်လို့ ဆီးချို၊ သွေးချိုရောဂါအထူးကုဆရာဝန်ကြီး ပါမောက္ခဒေါက်တာ တင့်ဆွေလတ်က သုံးသပ်ပြောဆိုထားပါတယ်။တစ်ကမ္ဘာလုံးမှာ အာရှပစိဖိတ်ဒေသနဲ့ အရှေ့တောင်အာရှနိုင်ငံတွေက ဆီးချို၊သွေးချိုဖြစ်ပွားမှုအများဆုံး ဒေသတွေဖြစ်ပြီး မြန်မာနိုင်ငံလည်း ပါဝင်နေတယ်လို့သိရပါတယ်။

 

 

Related News