၂၀၁၇-၁၈ ဘဏ္ဍာနှစ် အမျိုးသားစီမံကိန်းမှာ နိုင်ငံရဲ့GDP ကို (၇) ရာခိုင်နှုန်းတိုးတက်ဖိုမျှော်မှန်းထားတယ်လို့ နိုင်ငံတော်သမ္မတဦးထင်ကျော်က  ဇန်န၀ါရီ ၉ ရက်က ပြုလုပ်တဲ့ အမျိုးသားစီမံကိန်းကော်မရှင် အစည်းအဝေးအတွင်းမှာ ပြောပါတယ်။ ဒါဟာလူတစ်ဦးချင်းဆီရဲ့ ထုတ်လုပ်မှုတန်ဖိုးနဲ့ဝန်ဆောင်မှုတန်ဖိုးကိုတစ်နှစ် ငွေကျပ်(၁၇)သိန်းကျော်ရောက်ရှိဖို့ မျှော်မှန်းထားတာ လည်းဖြစ်ပါတယ်။

မနေ့ဇန်န၀ါရီ ၉ ရက်ကလုပ်တဲ့ အမျိုးသားစီမံကိန်းကော်မရှင်အစည်းအဝေးမှာ အစိုးရအဖွဲ့ စုံစုံလင်လင်တက်ရောက်ကြပါတယ်။သမတဦးထင်ကျော်အပါအ၀င် နိုင်ငံတော်ရဲ့ အတိုင်ပင်ခံ ပုဂိုလ်ဒေါ်အောင်ဆန်းစုကြည်၊ ဒုတိယသမ္မတဦးမြင့်ဆွေ၊ ပြည်ထောင်စုအဆင့် ၀န်ကြီးတွေနဲ့ ပြည်နယ်နဲ့တိုင်းဒေသကြီးဝန်ကြီးချုပ်တွေလည်း ဒီအစည်းအဝေးကို တက်ရောက်ကြတာပါ။ဒီအစည်းအဝေးဟာ နိုင်ငံစီးပွားရေးမျှော်မှန်းချက်အတွက် အရေးပါတဲ့အစည်းအဝေးဖြစ်ပြီး လာမယ့်ဘဏ္ဍာနှစ်အတွက် မျှော်မှန်းချက်တွေကိုဖော်ထုတ်ခဲ့သလို လက်ရှိဘဏ္ဍာနှစ်ကအခြေ အနေတွေကိုလည်း ပြန်သုံးသပ်သွားပါတယ်။

အစိုးရသစ်တက်ကာစ ပြီးခဲ့တဲ့ဘဏ္ဍာနှစ် ပထမ(၆) လပတ်အတွင်းမှာတော့နိုင်ငံစီးပွားရေးဟာ နှေးကွေးခဲ့ပါတယ်။ လယ်ယာသီးနှံတွေ အထွက်ကျဆင်းတာအပါအ၀င် ပို့ကုန်ဈေးနှုန်း တွေကျဆင်းမှုနဲ့ နိုင်ငံခြားရင်းနှီးမြုပ်နှံမှုတွေ စီးဝင်မှုနှေးကွေးတာတွေက စီးပွားရေးနှေးကွေးစေတဲ့ အကြောင်းတွေလို့ သမတကပြောသွားပါတယ်။လာမယ့်ဘဏ္ဍာနှစ်ကိုတော့ သမ္မတကပိုအကောင်းမြင်ထားပြီး GDPကို(၇)ရာခိုင်နှုန်းတိုးဖို့ မျှော်မှန်းထားတာပါ။


ဒေါ်အောင်ဆန်းစုကြည်ကတော့ နိုင်ငံရဲ့ဖွံ့ဖြိုးရေးစီမံကိန်းတွေဟာကိုယ်ပိုင်ပုံစံနဲ့ ဖြစ်ရမယ်လို့ ပြောသွားပါတယ်။နိုင်ငံသားတွေရဲ့လိုအပ်ချက်အရ စီမံကိန်းတွေကို ရေးဆွဲပြီးတဲ့အခါမှာ လက်တွဲလုပ်ကိုင်မယ့် အဖွဲ့အစည်းတွေ၊ အလှူရှင်တွေနဲ့ နည်းလမ်းကျကျ ဆောင်ရွက်နိုင်ဖို့က အရေးကြီးပါတယ်လို့ ပြောပါတယ်။ ဒါ့အပြင် စီမံကိန်းတွေနဲ့ပတ်သက်ပြီး အချို့ကိစ္စရပ်တွေမှာလွှတ်တော်ရဲ့ ထောက်ပြမှုတွေဟာ မှန်ကန်မှုရှိနိုင်ပြီး အစိုးရအဖွဲ့အနေနဲ့ လက်ခံရမှာဖြစ်တယ်လို့ ပြောပါတယ်။         

 

Related News