မြန်မာနိုင်ငံမှာရှိတဲ့ ကလေးလုပ်သားစုစုပေါင်းအရေအတွက်ရဲ့ထက်ဝက်လောက်ဟာ အန္တရာယ်ရှိတဲ့ လုပ်ငန်းအမျိုး အစားတွေမှာ လုပ်ကိုင်နေရတယ်လို့ သိရပါတယ်။ နေပြည်တော်ရှိ သင်္ဂဟ ဟိုတယ်မှာ မတ်လ ၁၃ ရက်က ကလေးလုပ်သား ပပျောက်ရေး အမျိုးသားအဆင့်လုပ်ငန်း စီမံချက်ရေးဆွဲနိုင်ရေး ညှိနှိုင်းဆွေးနွေးပွဲကို ပြုလုပ်ခဲ့ပါတယ်။ ဒီဆွေးနွေးပွဲကို အလုပ်သမား၊ အလုပ်အကိုင်နှင့်လူဝင်မှုကြီးကြပ်ရေး ပြည်ထောင်စုဝန်ကြီး တက်ရောက်ခဲ့ပြီး မြန်မာနိုင်ငံမှာ ကလေးလုပ်သားစုစုပေါင်း ၁.၂ သန်းခန့်ရှိရာမှာ ထက်ဝက်လောက် ဟာ အန္တရာယ်ရှိတဲ့ လုပ်ငန်းတွေမှာ လုပ်ကိုင်နေရတယ်လို့ ပြောပါတယ်။

ကလေးသူငယ်တွေ အန္တရာယ်ရှိတဲ့ လုပ်ငန်းတွေမှာ လုပ်ကိုင်နေရမှုတွေအပါအ၀င် ကလေးလုပ်သားတွေပပျောက်စေဖို့အတွက် ဆောင်ရွက်နေမှုတွေနဲ့ ပတ်သက်ပြီးလည်း ပြည်ထောင်စုဝန်ကြီးက အခုလို ပြောပါတယ်။ မြန်မာနိုင်ငံမှာ ကလေးလုပ်သားပပျောက်စေဖို့အတွက် ILO နဲ့ ပူးပေါင်းပြီး ဆောင်ရွက်နေပေမယ့် နိုင်ငံရဲ့ ဆင်းရဲနွမ်းပါးမှုက ကလေးလုပ်သားပပျောက်ဖို့အတွက် အဓိကအခက်အခဲ ဖြစ်နေတယ်လို့လည်း သိရပါတယ်။ ဒါ့အပြင် ပညာရေးစနစ်၊ ရာသီဥတုနဲ့ သဘာဝဘေးဒဏ်တွေအပြင် ရွှေ့ပြောင်းနေထိုင်ရ ခြင်းတွေကြောင့်လည်း ကလေးလုပ်သားတွေ တိုးပွားလာရတယ်လို့ သိရပါတယ်။

ကလေးလုပ်သားတွေ ပပျောက်ဖို့အတွက်ကို အလုပ်သမား၊အလုပ်အကိုင်နှင့်လူဝင်မှုကြီးကြပ်ရေး ၀န်ကြီးဌာနနဲ့အတူ အခြားဝန်ကြီးဌာနတွေ အဓိကအားဖြင့် ပြည်ထဲရေးဝန်ကြီးဌာနတို့က ပူးပေါင်း ဆောင်ရွက်ကြဖို့ လိုတယ်လို့ အလုပ်ရုံနှင့် အလုပ်သမားစစ်ဆေးရေး ဦးစီးဌာနက ညွှန်ကြားရေးမှူးချုပ် ဦးဝင်းရှိန်က ပြောပါတယ်။ မြန်မာနိုင်ငံမှာ ကလေးလုပ်သားဦးရေ ၁.၂ သန်းခန့်ရှိတဲ့ အထဲမှာ လက်ဖက်ရည်ဆိုင်တွေမှာ လုပ်ကိုင်နေရတဲ့ ကလေးလုပ်သားအရေအတွက်ဟာ စုစုပေါင်း ၁ သောင်းဝန်းကျင်ခန့် ရှိတယ်လို့လည်း သိရပါတယ်။ 

 

 

Related News