မြန်မာ့ကျပ်ငွေစတင်ထုတ်ဝေခဲ့တဲ့အဆောက်အဦးဖြစ်ခဲ့သလို လွန်ခဲ့တဲ့နှစ်ပေါင်း ၈၀ က ဗိသုကာလက်ရာတွေမပျက်စီးသေးတဲ့ လက်ရှိ ရန်ကုန်စတော့အိတ်ချိန်းအဆောက်အဦးကြီးတော့ ရန်ကုန်မြို့ပြ အမွေအနှစ်ထိန်းသိမ်းစောင့်ရှောက်ရေးအဖွဲ့(YHT) ကမေလ ၁၆ရက်နေ့မှာ အပြာရောင် ကမ္ဗည်းပြားကို ကပ်လိုက်ပြီဖြစ်ပါတယ်။ အခုမြင်တွေ့နေရတဲ့ရန်ကုန်စတော့အိတ်ချိန်းအဆောက်အဦးကြီးဟာ လွန်ခဲ့တဲ့နှစ်၈၀ လောက် တုန်းကဆောက်ခဲ့တဲ့အဆောက်အဦးတစ်ခုပါ။ ၁၉၃၉မှာ အိနိ်္ဒယဗဟိုဘဏ်ဖြစ်တဲ့ ရီဇတ်ဖ်ဘဏ်ရဲ့ ရန်ကုန် ဘဏ်ခွဲအဖြစ်စတင်အသုံးပြုခဲ့တာဖြစ်ပြီး ဂျပန်ခေတ်ရောက်တော့ ဗမာနိုင်ငံတော် ဘဏ်အဖြစ်နဲ့ ဂျပန်ငွေ ငွေစက္ကူတွေထုတ်ဝေတဲ့နေရာဖြစ်လာပါတယ်။

လွတ်လပ်ရေးရပြီး ၁၉၄၈မှာတော့ ဒီအဆောက်အဦးဟာ ပြည်ထောင်စုမြန်မာနိုင်ငံဘဏ်ဖြစ်လာပြီး ဒီနေရာမှာပဲ ၁၉၅၂ ဇူလိုင်လ၁ရက်နေ့မှာ ပထမဆုံးမြန်မာကျပ်ငွေ ကိုထုတ်ဝေခဲ့တာပါ။၁၉၉၀နောက်ပိုင်း ဗဟိုဘဏ် ရန်ကင်းမြို့နယ်ကို ပြောင်းရွှေ့ပြီး နောက်ပိုင်း မြ၀တီဘဏ် အဖြစ်ရှိခဲ့တာပါ။ လက်ရှိဒီအဆောက်အဦးကိုတော့ဗဟိုဘဏ်ကပိုင်ဆိုင်ထားတယ်လို့သိရပြီး ရန်ကုန်စတော့ အိတ်ချိန်း အနေနဲ့ အဆောက်အအုံကို ငှားရမ်းသုံးစွဲနေတာဖြစ်ပါတယ်။ဒီအဆောက်အဦးဟာ ၂၀၁၅ခုနှစ်မှာ တော့ရန်ကုန်စတော့အိတ်ချိန်းဖြစ်လာပြီး ဒီလိုဖွင့်လှစ်နိုင်ဖို့ပြင်ဆင်တာတွေလုပ်ခဲ့ တုန်းကလည်း ရှေးဗိသုကာ လက်ရာတွေနဲ့ အဆောက်အဦးဖွဲ့စည်းပုံတွေကအစ မပျက်အောင် အာမခံချက်နဲ့ ပြင်ဆင်ခဲ့ရတယ်လို့ ပြောပါတယ်။

 ရန်ကုန်မြို့ပြအမွေအနှစ်ထိန်းသိမ်းစောင့်ရှောက်ရေးအဖွဲ့(YHT)ကိုတော့ ၂၀၁၂ခုနှစ်က စတင် တည်ထောင်ခဲ့တာဖြစ်ပါတယ်။၂၀၁၃ခုနှစ်မှာRoyal Phillips Corporation နဲ့ပူးပေါင်းပြီး ရန်ကုန်မြို့ရဲ့ အထင်ကရနေရာတွေ သမိုင်းအမွေအနှစ်ပြည့်နှက်နေတဲ့နေရာတွေ မှာ အပြာရောင် ကမ္ဗည်းပြား တပ်ဆင်ဖို့ စတင်လုပ်ဆောင်ခဲ့တာဖြစ်ပါတယ်။ အခုအဆောက်အဦးပြီးရင် ရန်ကုန်ပြည်သူ့ ဆေးရုံကြီးကိုလည်း အပြာရောင်ကမ္ဗည်းပြားတပ်ဆင်ဖို့လျာထားတယ်လို့သိရပါတယ်။ရှေးဟောင်းအမွေအနှစ်အဆောက်အဦတွေကို ပြည်သူတွေသိရှိနိုင်အောင် အခုလို အပြာရောင်ကမ္ဗည်းပြား လိုက်လံတပ်ဆင်ပေးနေတာဖြစ်ပြီး ဒါဟာ ရန်ကုန်မြို့ရဲ့ အပြာရောင်ကမ္ဗည်းပြားတပ် ၁၇ခုမြောက် အဆောက်အဦးဖြစ်ပါတယ်။

 

Related News