မန္တလေးမြို့မှာ လက်ရှိတစ်ရက်ကို အမှိုက်တန်ချိန်ပေါင်း (၉၃၈)တန် ထွက်ရှိပြီး အဲ့ဒီ အမှိုက်တွေကို မန္တလေးမြို့တော် စည်ပင်သာယာရေးကော်မတီ သန့်ရှင်းရေးဌာနအနေနဲ အမှိုက် သန့်ရှင်းရေးဝန်ထမ်းပေါင်း (၁၉၀၀)ကျော်နဲ့ နေ့စဉ်တာဝန်ယူသိမ်းဆည်းပေးနေတာ ဖြစ်တယ်လို့ သိရပါတယ်။ ဒီလိုမန္တလေးမြို့မှာ ထွက်ရှိနေတဲ့စွန့်ပစ်အမှိုက်တွေကို စနစ်တကျ စီမံခန့်ခွဲ သိမ်းဆည်းနိုင်ဖို့ အတွက် မဟာဗျူဟာ လုပ်ငန်းစီမံချက်ကို နိုင်ငံတကာအဖွဲ့ အစည်းများဖြစ်တဲ့ UNEP နဲ့ IAES အဖွဲ့တို့ရဲ့ နည်းပညာအကူအညီများနဲ့ လက်ရှိမှာ ရေးဆွဲနေတာဖြစ်တယ်လို့သိရပါတယ်။
 
မဟာဗျူဟာစီမံကိန်းရဲ့ ရှေ့ပြေးလုပ်ဆောင်ချက်များအနေနဲ့ လက်ရှိမန္တလေးမြို့တော် စည်ပင် သာယာရေး နယ်နိမိတ်တွင်းရှိ မြို့နယ်(၆)မြို့နယ်က ရပ်ကွက်တွေမှာ လူထုအခြေပြု အမှိုက်သိမ်းဆည်းခြင်းလုပ်ငန်းကို လုပ်ဆောင်နိုင်ဖို့အတွက် အသိပညာပေးမှုများ လုပ်ဆောင်ပေးနေ တယ်လို့ မန္တလေးမြို့တော် စည်ပင်သာယာရေးကော်မတီ သန့်ရှင်းရေးဌာန ဌာနမှူးက အခုလို ပြောပြပါတယ်။
မြန်မာနိုင်ငံရဲ့ ပတ်ဝန်းကျင်ထိန်းသိမ်းရေးကဏ္ဍကို ရေရှည်စဉ်ဆက်မပြတ် ဖွံ့ဖြိုး တိုးတက်စေဖို့အတွက် အခုလိုမဟာဗျူဟာစီမံချက်လုပ်ငန်းတွေကို မန္တလေးအပါဝင် တိုင်းဒေသကြီးနဲ့ ပြည်နယ်အသီးသီးမှာလည်း စွန့်ပစ်အမှိုက်တွေကိုစနစ်တကျစီမံခန့်ခွဲနိုင်မယ့် မဟာဗျူဟာတွေ ရေးဆွဲဆောင်ရွက်နိုင်ဖို့လည်း လိုအပ်နေတာဖြစ်တယ်လို့ သိရပါတယ်။ 
 
 
 

Related News