သုံးရက်တာကျင်းပခဲ့တဲ့ မြန်မာ့ဒီမိုကရေစီကူးပြောင်းမှုဖြစ်စဉ် သုံးသပ်ဆွေးနွေးပွဲမှာ ဆွေးနွေးခဲ့ကြတဲ့ အချက်တွေအရ မြန်မာနိုင်ငံအနေနဲ့ ဒီမိုကရေစီပန်းတိုင်ကို ရောက်ရှိဖို့ဖြစ်နိုင်တဲ့ ရှေ့အလားအလာမှာ ၅၀ရာခိုင်နှုန်းကျော်ရှိနေပြီလို့ခံစားရကြောင်း ပြန်ကြားရေးဝန်ကြီးဌာန ပြည်ထောင်စု ၀န်ကြီးဒေါက်တာဖေမြင့်ကပြောပါတယ်။ 

မြန်မာ့ဒီမိုကရေစီကူးပြောင်းမှုဖြစ်စဉ် သုံးသပ်ဆွေးနွေးပွဲ နောက်ဆုံးနေ့ဖြစ်တဲ့ သြဂုတ်လ ၁၃ရက်က နေပြည်တော်မှာရှိတဲ့ MICC-2 မှာ ပြုလုပ်ခဲ့တဲ့ ပိတ်ပွဲအခမ်းအနားမိန့်ခွန်းမှာ ပြည်ထောင်စု ၀န်ကြီးကပြောကြားခဲ့တာပါ။ 

ကျင်းပပြီးစီးခဲ့တဲ့ မြန်မာဒီမိုကရေစီကူးပြောင်းမှုဖြစ်စဉ် သုံးသပ်ဆွေးနွေးပွဲမှာ လူအများ စိတ်ဝင်စားတဲ့ ကဏ္ဍတစ်ခုကတော့ မြန်မာနိုင်ငံအနေနဲ့ ဒီမိုကရေစီကူးပြောင်းမှုဖြစ်စဉ်တွေမှာ ဘယ်နေရာ ရောက်ရှိနေပြီလဲဆိုတဲ့အချက်ဖြစ်ခဲ့ပြီး မြန်မာနိုင်ငံရဲ့ လက်ရှိရောက်ရှိနေတဲ့ ဒီမိုကရေစီခရီးမှာ ၅၀ရာခိုင်နှုန်းကျော် ရှိမရှိဆိုတဲ့ အချက်မှာတော့ မသေချာသေးဘူးလို့ ပြည်ထောင်စုဝန်ကြီးက ပြောကြားခဲ့ပါတယ်။ ဒါ့အပြင် မြန်မာ့ဒီမိုကရေစီကူးပြောင်းမှုဖြစ်စဉ် သုံးသပ်ဆွေးနွေးပွဲကိုအတတ်နိုင်ဆုံး ပွင့်လင်းမြင်သာမှုရှိစွာ ဆောင်ရွက်ခဲ့ကာ လွတ်လပ်စွာပြောဆိုခဲ့ကြပြီး ပွင့်ပွင့်လင်းလင်းဝေဖန်ခဲ့ကြတဲ့ အတွက် ဆွေးနွေးပွဲဟာအောင်မြင်ခဲ့တယ်လို့ ဆိုပါတယ်။ ကျင်းပပြီးစီးခဲ့တဲ့ ဆွေးနွေးပွဲမှာ မြန်မာနိုင်ငံရဲ့ နိုင်ငံရေး၊စီးပွားရေး၊ စစ်ဘက်အရပ်ဘက်ဆက်ဆံရေးနဲ့ သတင်းမီဒီယာများရဲ့ အခန်းကဏ္ဍတွေအပါအ၀င် ခေါင်းစဉ်(၆)ခုနဲ့ ဆွေးနွေးခဲ့ကြပါတယ်။ 

ဆွေးနွေးပွဲမှာ ပြည်တွင်းပြည်ပနိုင်ငံရေးသိပ္ပံပညာရှင်တွေ၊ သုတေသီတွေ၊ စီစစ်ဝေဖန်သူတွေ၊ လက်ရှိနိုင်ငံရေးနယ်ပယ်မှာ ဆောင်ရွက်နေသူတွေ၊ အခြားနိုင်ငံတွေရဲ့ ဒီမိုကရေစီ ကူးပြောင်းမှုဖြစ်စဉ်မှာ ကိုယ်တိုင်ပါဝင်ခဲ့သူတွေ အပါအ၀င် ပညာရှင်၄၂ယောက်က ဆွေးနွေးခဲ့ကြတယ်လို့ သိရပါတယ်။

 

 

Related News