ရခိုင်ပြည်နယ်ဖွံ့ဖြိုးတိုးတက်ရေးဆိုင်ရာ အကောင်အထည်ဖော်ဆောင်ရွက်ရေး ညှိနှိုင်း အစည်းအဝေးကို အောက်တိုဘာလ(၁၀)ရက်က နေပြည်တော်ရှိ နိုင်ငံတော် အတိုင်ပင်ခံရုံးဝန်ကြီးဌာန အစည်းအဝေးခန်းမ၌ ကျင်းပခဲ့ပါတယ်။    အခမ်းအနားတွင် နိုင်ငံတော်အတိုင်ပင်ခံရုံးဝန်ကြီးဌာန ဒုတိယ၀န်ကြီး ဦးခင်မောင်တင်က ရခိုင်ပြည်နယ်အတွင်း မီးရှို့ခံရသည့် ကျေးရွာများရှိ နေအိမ်များကို အမြန်ဆုံး ပြန်လည် တည်ဆောက်ပေးရမည်ဖြစ်ကြောင်း၊ ထို့ပြင် လျှပ်စစ်မီးလိုအပ်နေသည့် ကျေးရွာများ အမြန်ဆုံး မီးရရှိရေးနှင့် နိုင်ငံသားစိစစ်ရေးလုပ်ငန်းစဉ်ကို လုပ်ဆောင်ရမည်ဖြစ်ကြောင်း၊ ရခိုင်ပြည်နယ် ဖွံ့ဖြိုးတိုးတက်ရေးနှင့်ပတ်သက်၍ ဆောင်ရွက်နေသည့် ဗဟိုကော်မတီနှင့် လုပ်ငန်းကော်မတီများ ရှိပါကြောင်း၊ ထို့ပြင် ပြည်ထောင်စုဝန်ကြီးဌာနအလိုက် ဆောင်ရွက်နေသည့် လုပ်ငန်းများလည်း ရှိပါကြောင်း၊ ယခုအစည်းအဝေးမှာ ကော်မတီအသီးသီးက စီစဉ်ထားသော ချက်ချင်းဆောင်ရွက် နိုင်မည့် လုပ်ငန်းကိစ္စများနှင့် ၀န်ကြီးဌာနအလိုက် အမြန်ဆုံး စတင်ဆောင်ရွက်နိုင်မည့် အခြေအနေများကို ဆွေးနွေးကြရန် ဖိတ်ခေါ်ပါကြောင်း ပြောကြားခဲ့ပါတယ်။

နိုင်ငံတော်အတိုင်ပင်ခံရုံးဝန်ကြီးဌာန ညွှန်ကြားရေးမှူးချုပ် ဦးဇော်ဌေးက ရခိုင်ပြည်နယ် ဖွံ့ဖြိုးတိုးတက်ရေးဆိုင်ရာ ကိစ္စရပ်များနှင့်ပတ်သက်သည့် လုပ်ငန်းစဉ်အနှစ်ချုပ်ကို ရှင်းလင်းတင်ပြပြီး ရခိုင်ပြည်နယ်မြောက်ပိုင်း မောင်တောဒေသတွင် အမြန်ဆုံး ဦးစားပေးဆောင်ရွက်ရမည့် အပိုင်းများကို ရှင်းလင်းတင်ပြခဲ့သည်။

ရခိုင်ပြည်နယ်ဖွံ့ဖြိုးတိုးတက်ရေးဆိုင်ရာ အကောင်အထည်ဖော်ဆောင်ရွက်ရေး ညှိနှိုင်းအစည်းအဝေးကို တက်ရောက်လာကြသည့် အမြဲတမ်းအတွင်းဝန်များနှင့် ဌာနဆိုင်ရာ အကြီးအကဲများက ၀န်ကြီးဌာနအလိုက် ဆောင်ရွက်ရမည့်နေအိမ်များ ပြန်လည်တည်ဆောက်ခြင်း ကိစ္စ၊ လျှပ်စစ်မီးရရှိရေးကိစ္စ၊ လမ်းပန်းဆက် သွယ်ရေးကိစ္စ၊ လယ်ယာစိုက်ပျိုးရေး၊ မွေးမြူရေးနှင့် ငါးဖမ်းလုပ်ငန်းကိစ္စ  အခြားအသက်မွေးဝမ်းကျောင်းဆိုင်ရာကိစ္စ၊NCV  လုပ်ငန်းကိစ္စ၊ နိုင်ငံသား စိစစ်ရေးလုပ်ငန်းကိစ္စ၊ ပညာရေး၊ ကျန်းမာရေးကိစ္စ၊ တယ်လီဖုန်းဆက်သွယ်ရေးဆိုင်ရာ ကိစ္စ၊FM  အပါအ၀င် သတင်းမီဒီယာလုပ်ငန်းဆောင်ရွက်နေမှု ကိစ္စရပ်များမှ အချိန်တိုတိုအတွင်း အမြန်ဆုံးအကောင်အထည်ဖော် ဆောင်ရွက်မည့် ဦးစားပေးလုပ်ငန်းများကို ဆွေးနွေးတင်ပြကြသည်။

တင်ပြချက်များနှင့်ပတ်သက်ပြီး ဒုတိယ၀န်ကြီး ဦးခင်မောင်တင်က ဖြည့်စွက်ဆွေးနွေးပြီး နိဂုံးချုပ်အမှာစကားပြောကြားခဲ့တယ်လို့ သတင်းထုတ်ပြန်ရေးကော်မတီက သတင်းထုတ်ပြန် ထားပါတယ်။ 

 

 

Related News