အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၊ အလုပ်ရုံနှင့် အလုပ်သမားဥပဒေစစ်ဆေးရေးဦးစီးဌာနက (၂၀၁၇)ခုနှစ် နိုဝင်ဘာလအထိ စည်းကမ်းလိုက်နာမှု မရှိတဲ့ စက်ရုံ၊ အလုပ်ရုံတွေကို တရားစွဲဆိုမှု (၁၈)မှုထိရှိနေတယ်လို့သိရပါတယ်။
 
အလုပ်သမား၊လူဝင်မှုကြီးကြပ်ရေးနှင့်ပြည်သူ့အင်အားဝန်ကြီးဌာန၊ အလုပ်ရုံနှင့် အလုပ်သမားဥပဒေစစ်ဆေးရေးဦးစီးဌာနက အလုပ်ရုံ၊ စက်ရုံ၊ ဆိုင်များနဲ့ အလုပ်ဌာနတွေကို (၁၉၅၁)ခုနှစ် အလုပ်ရုံများ အက်ဥပဒေ၊ (၁၉၅၁)ခုနှစ် ခွင့်ရက်နဲ့ အလုပ်ပိတ်ရက် အက်ဥပဒေ၊ (၂၀၁၆)ခုနှစ် ဆိုင်များနှင့် အလုပ်ဌာနများ ဥပဒေ၊ (၂၀၁၆)ခုနှစ် အခကြေးငွေ ပေးချေရေးဥပဒေ စတဲ့  ဥပဒေ (၄)ခုနဲ့ စစ်ဆေးစည်းကြပ်လျက်ရှိတယ်လို့ သိရပါတယ်။ 
 
အလုပ်ရုံနဲ့ အလုပ်သမား ဥပဒေစိစစ်ရေးဦးစီးဌာနက စည်းကမ်းလိုက်နာမှု မရှိတဲ့ စက်ရုံ၊ အလုပ်ရုံတွေကို တရားစွဲဆိုထားတာဟာ (၂၀၁၆)ခုနှစ်က တရားစွဲဆိုဆောင်ရွက်မှု (၆၂)မှု ရှိခဲ့ပြီး (၂၀၁၇)ခုနှစ်အခုလက်ရှိအချိန်အထိတော့ တရားစွဲဆိုဆောင်ရွက်မှု (၁၈)မှုသာ ရှိတော့တယ်လို့ သိရပါတယ်။  (၂၀၁၆)ခုနှစ် ၀န်ခံကတိ လက်မှတ်ရေးထိုးတဲ့ စက်ရုံ၊ အလုပ်ရုံကတော့ (၁၉)မှုရှိခဲ့ပြီး (၂၀၁၇)ခုနှစ်မှာ အခုလက်ရှိအချိန်အထိ ၀န်ခံကတိ လက်မှတ်ရေးထိုးရတဲ့ စက်ရုံ၊ အလုပ်ရုံကတော့ (၂၆)မှုထိ တိုးလာတယ်လို့ သိရပါတယ်။ 
 
စက်ရုံ၊ အလုပ်ရုံတွေကို တရားစွဲဆိုထားတဲ့ အမှုတွေနဲ့ ၀န်ခံကတိထိုးထားတဲ့ အမှုတွေကတော့ အချိန်ပိုနဲ့ပတ်သက်ပြီး အများပြည်သူ ရုံးပိတ်ရက်တွေမှာ အလုပ်သမား သဘောတူညီမှု မရှိတာတွေနဲ့ သက်ဆိုင်ရာဌာနတွေရဲ့ ခွင့်ပြုမိန့်မရတောတွေကြောင့် အများဆုံးဖြစ်တယ်လို့ သိရပါတယ်။
 
အလုပ်ရုံနဲ့ အလုပ်သမားဥပဒေစစ်ဆေးရေးဦးစီးဌာနအနေနဲ့ စက်ရုံတွေကို စီမံချက်နဲ့အညီ လုပ်ငန်းခွင် ဘေးအန္တရာယ်ကင်းရှင်းရေးနဲ့ ကျန်းမာရေးအပြင် အလုပ်သမားဥပဒေတွေကို လိုက်နာမှုရှိ၊ မရှိ စစ်ဆေးနေပြီး ရှောင်တခင်စစ်ဆေးတာတွေနဲ့ တိုင်ကြားထားတာတွေကြောင့် စစ်ဆေးမှုတွေလည်း ရှိနေတယ်လို့သိရပါတယ်။   
 
 
 

Related News