လက်ရှိ ရန်ကုန်မြို့တော်စည်ပင်သာယာရေးကော်မတီမှအကောင်အထည်ဖော်ဆောင်ရွက်နေတဲ့ စမ်းချောင်းမြို့နယ်နောက်ဖေးလမ်းကြားရှင်းလင်းမှုအစီအစဉ်ကို   ပြည်သူတွေအနေနဲ့ ပူးပေါင်းပါဝင် ဆောင်ရွက်ဖို့လိုအပ်တယ်လို့ စမ်းချောင်းမြို့နယ်၊ မဲဆန်္ဒနယ်အမှတ်(၂) တိုင်းဒေသကြီး လွှတ်တော် ကိုယ်စားလှယ် ဦးသော်တာအောင်က ပြောပါတယ်။ 
 
ရန်ကုန်မြို့၊ စမ်းချောင်းမြို့နယ်အတွင်းမှာရှိတဲ့ နောက်ဖေးလမ်းကြားတွေက စွန့်ပစ်အမှိုက် တွေကို စက်တင်ဘာလ(၁၂)ရက် ကနောက်ဖေးလမ်းကြားစီမံချက်နဲ့ ရန်ကုန်မြို့တော် စည်ပင် သာယာရေးကော်မတီ ပတ်ဝန်းကျင်ထိန်းသိမ်းရေးနှင့်သန့်ရှင်းရေးဌာနမှဝန်ထမ်းတွေက စတင်ရှင်းလင်းပေးနေတာဖြစ်ပါတယ်။ ယခုရှင်းလင်းနေတဲ့ စမ်းချောင်းမြို့နယ်၊ မြေနီကုန်း ၀န်းကျင်က မြေနီကုန်းတောင်ရပ်ကွက်နဲ့ မြေနီကုန်းမြောက်ရပ်ကွက်က လူနေအထူ ထပ်ဆုံးဖြစ်တဲ့ အတွက်ကြောင့် နောက်ဖေးလမ်းကြားအမှိုက်အများဆုံးထွက်ရှိတယ်လို့သိရပါတယ်။
 
ရန်ကုန်မြို့စမ်းချောင်းမြို့နယ်အတွင်းမှာတော့ ရပ်ကွက်ပေါင်း(၁၈)ရပ်ကွက်ရှိပြီး နောက်ဖေး လမ်းကြားပေါင်း(၁၃၀)ကျော်ရှိပါတယ်။ နောက်ဖေးလမ်းကြားစီမံချက်ကို စက်တင်ဘာ(၁၂)ရက်က စတင်ရှင်းလင်းခဲ့တာဟာ ယခုဆိုရင် ရှင်းလင်းခဲ့တဲ့ အချိန်(၁)လအတွင်းမှာ နောက်ဖေးလမ်းကြား ပေါင်း (၂၁)ခု ရှင်းလင်းခဲ့ပြီးဖြစ်တယ်လို့သိရပါတယ်။
 
နောက်ဖေးလမ်းကြားရှင်းလင်းတာတွေကိုလုပ်ဆောင်တဲ့အခါ နောက်ဖေးလမ်းကြား(၁)ခုကို (၂)ရက်ရှင်းလင်းရတယ်လို့သိရပါတယ်။ နောက်ဖေးလမ်းကြားရှင်းလင်းတာကိုတော့ စည်ပင်ဝန်ထမ်း (၃၀)ဦးနဲ အမှိုက်သိမ်းကား(၆)စီးတို့နဲ့ ရှင်းလင်းနေတာဖြစ်တယ်လို့ပြောပါတယ်။ ဒီလို နောက်ဖေး လမ်းကြားရှင်းလင်းမှုတွေပြုလုပ်နေပေမယ့် ပြည်သူတွေအနေနဲ့ စည်းကမ်းမဲ့ အမှိုက်စွန့်ပစ် တာတွေအပြင် တိုက်ရဲ့အနောက်ဖက်တွေကပျက်စီးနေတဲ့ ရေဆိုးပိုက်တွေ မိလ်္လာပိုက်တွေရှိနေတဲ့ အတွက်ကြောင့် နောက်ဖေးလမ်းကြား ရှင်းလင်းတဲ့အခါအချိန်ကြာမှုတွေဖြစ်နေတယ်လို့သိရပါတယ်။ 
 
ရန်ကုန်မြို့စမ်းချောင်းမြို့နယ်အတွင်းက နောက်ဖေးလမ်းကြားအမှိုက်တွေကို လိုက်လံ ရှင်းလင်းလာတာဟာ တစ်ရက်ကို အမှိုက်တန်ချိန်(၂၅)တန်ထွက်ရှိပြီး ယခုသိမ်းဆည်းလာတဲ့ အချိန်(၁)လအတွင်းမှာ အမှိုက်တန်ချိန် (၈၀၀)နီးပါးသိမ်းဆည်းရရှိတယ်လို့ သိရပါတယ်။
 
 

Related News