အင်းစိန် စက်မှုလက်မှုသိပ္ပံ (လျှပ်စစ်စွမ်းအား အင်ဂျင်နီယာဌာန) ကျောင်းသားဟောင်းများ (၂၁)ကြိမ်မြောက်အာစရိယ ပူဇော်ပွဲ အခမ်းအနားကို ရန်ကုန်မြို့ M3 ခန်းမ မှာ ကျင်းပခဲ့ပါတယ်။ ၁၉၉၆ ခုနှစ်ကတည်း စတင်ပြီး ပြုလုပ်လာခဲ့တဲ့ ဒီအာစရိယပူဇော်ပွဲ အခမ်းအနားကို ၂၁ ကြိမ်မြောက်အဖြစ်ကျင်းပနိုင်ခဲ့ပြီဖြစ်ပါတယ်။ ဒီအခမ်းအနားမှာ ကန်တော့ခံ ဆရာကြီး ဆရာမကြီး ၆ ဦးကို ပူဇော်ခဲ့တာလည်းဖြစ်ပါတယ်။
 
ကန်တော့ခံဆရာကြီးတွေကတော့ အသက် ၇၅ နှစ်နဲ့ အထက် ဆရာကြီး ၄ဦး၊ အသက် ၇၅ နှစ်အောက် ဆရာမကြီး ၂ ဦးပါဝင်ခဲ့တာပါ။  ဒါအပြင် ၂၀၁၇ အောက်တိုဘာ (၅) ရက် ကမ္ဘာ့ဆရာများနေ့ မှာ ပညာရေးဝန်ကြီးဌာန က ထူးချွန်ဆရာ(သင်ကြားရေး)ဆု ရရှိခဲ့တဲ့ စက်မှုလက်မှုသိပ္ပံ (လျှပ်စစ်စွမ်းအားဌာန) ရွှေပြည်သာကဌာနမှူး ကထိက ဆရာဦးတင်မောင်လွင်အား ဂုဏ်ပြုရွှေပြားတံဆိပ် ချီးမြှင့်ခဲ့တာပါ။ အာစရိယပူဇော်ပွဲမှာ ဆရာကြီးဆရာမကြီး တွေကို ပူဇော်ကန်ခဲ့ကြတဲ့ အပြင် အသက် ၆၅ နှစ် အထက် ကျောင်းသားဟောင်းများကို ဂုဏ်ပြုခဲ့ပါသေးတယ်။
 
၁၉၉၆ ခုနှစ် အာစရိယ ပူဇော်ပွဲ စတင်ပြုလုပ်စဉ်က ကန်တော့ခံ ဆရာ ဆရာမကြီး ၈ ဦးခန့် ရှိခဲ့ပေမဲ့ အခုနှစ်မှာတော့ ကန်တော့ခံ ဆရာကြီး၊ ဆရာမကြီး ၆ ဦးသာ ပူဇော်ပွဲကို တက်ရောက်နိုင်တော့တာလည်း ဖြစ်ပါတယ်။ အခုနှစ်အာစရိယ ပူဇော်ပွဲမှာတော့ အသက် ၇၅ နှစ်အထက် ဆရာကြီးများကို တစ်ဦးကျပ် ဆယ့်ငါးသိန်း ၊ အသက် ၇၅ ခုနှစ်အောက်ဆရာမကြီး နှစ်ဦးကိုတော့ ကျပ်ဆယ့်နှစ်သိန်းကန်တော့ခဲ့ကြပါတယ်။
 
 

Related News