လက်ရှိ၂၀၁၇-၁၈ ဘဏ္ဍာနှစ်အတွင်း ပြီးခဲ့တဲ့ဧပြီလကနေ နိုဝင်ဘာလကုန်အထိ ပြည်တွင်းမှာ ရင်းနှီးမြုပ်နှံမှုပေါင်း အမေရိကန်ဒေါ်လာ ၄.၇ဘီလီယံကျော် ခွင့်ပြုထားပြီးဖြစ်တယ်လို့ ရင်းနှီးမြုပ်နှံမှုနှင့် ကုမ္ပဏီများ ညွှန်ကြားမှုဦးစီးဋ္ဌာန(DICA)ထံမှ သိရပါတယ်။ အခုဘဏ္ဍာနှစ် အတွက် လက်ရှိအချိန်ထိ လုပ်ငန်းပေါင်း(၁၆၃)ခုကို ခွင့်ပြုထားပြီးဖြစ်ပြီး ရင်းနှီးမြုပ်နှံမှု အမေရိကန်ဒေါ်လာ ၃.၈ ဘီလီယံကျော် ဖြစ်ပါတယ်။ ဒါ့အပြင် ခွင့်ပြုပြီးလုပ်ငန်းတွေရဲ့ ထပ်တိုးရင်းနှီးမြုပ်နှံမှုက အမေရိကန်ဒေါ်လာ သန်း၆၀၀ ကျော်ရှိသလို အခုဘဏ္ဍာနှစ်အတွင်း သီလ၀ါ အထူးစီးပွားရေးဇုန်ကို ၀င်ရောက်လာတဲ့ ရင်းနှီးမြုပ်နှံမှုက အမေရီကန် ဒေါ်လာ ၂၃၆သန်း ကျော်ရှိတာကြောင့် အခုဘဏ္ဍာနှစ်အတွင်း အမေရိကန်ဒေါ်လာ သန်း၄၇၀၀ ကျော် တနည်းအားဖြင့် အမေရိကန်ဒေါ်လာ ၄.၇ဘီလီယံကျော်ခွင့်ပြုထားပြီးဖြစ်တယ်လို့သိရပါတယ်။
 
နောက်ဆုံး နိုဝင်ဘာ(၃၀)ရက်က ပြုလုပ်တဲ့အစည်းအဝေးမှာတော့ DICA ကနေ နိုင်ငံခြားရင်းနှီးမြုပ်နှံမှု(၁)ခုကို ခွင့်ပြုပြီး(၃)ခုကိုအတည်ပြုပေးခဲ့သလို ရန်ကုန်၊ ပဲခူးနဲ့ဧရာဝတီ စတဲ့တိုင်းဒေသကြီး ရင်းနှီးမြုပ်နှံမှုကော်မတီတွေကလည်း လုပ်ငန်း(၆)ခုကို အတည်ပြု ပေးခဲ့တာကြောင့် စုစုပေါင်းလုပ်ငန်း(၁၀)ခု၊ ရင်းနှီးမြုပ်နှံမှု အမေရိကန်ဒေါ်လာ (၁၆၁)သန်း ကျော်နောက်ဆုံးခွင့်ပြုခဲ့တာဖြစ်ပါတယ်။ စက်မှုလုပ်ငန်းက အများဆုံးဖြစ်ပြီး ဒီကနေ အလုပ်အကိုင် အခွင့်အလမ်းပေါင်း ခုနှစ်ထောင်ကျော်ဖန်တီးပေးမှာ ဖြစ်တယ်လို့ ပြောပါတယ်။နောက်ဆုံး နိုဝင်ဘာ(၃၀)ရက်မှာတော့  မြန်မာနိုင်ငံရင်းနှီးမြုပ်နှံမှုကော်မရှင်နဲ့တိုင်းနဲ့ပြည်နယ် ကော်မတီတွေကနေ အလုပ်အကိုင်အခွင့်အလမ်းပေါင်း နှစ်ထောင့်သုံးရာကျော် ဖန်တီးနိုင်မယ့် ရင်းနှီးမြုပ်နှံမှုပမာဏ ကျပ်(၁.၄)ဘီလီယံရှိတဲ့ လုပ်ငန်း(၁၄)ခုကိုခွင့်ပြုအတည်ပြုပေးထားခဲ့ပါတယ်။
 
ဒါ့ကြောင့် လက်ရှိဘဏ္ဍာနှစ်အတွင်း မြန်မာနိုင်ငံသား ရင်းနှီးမြုပ်နှံမှုခွင့်ပြုပေးထားမှုဟာ အခုဘဏ္ဍာနှစ်စတဲ့ ဧပြီလ(၁)ရက်နေ့ကနေ လက်ရှိအချိန်ထိ မြန်မာနိုင်ငံသားရင်းနှီးမြုပ်နှံမှုလုပ်ငန်း(၇၂)ခု၊ ရင်းနှီးမြုပ်နှံမှုပမာဏ ကျပ်(၂.၈)ထရီလီယံ ၀န်းကျင်ခွင့်ပြုပေးထားပြီး ဖြစ်တယ်လို့ သိရပါတယ်။မြန်မာနိုင်ငံအတွင်း ပြည်တွင်းပြည်ပ ရင်းနှီးမြုပ်နှံမှုတွေအပြင် တစ်ဖက်မှာလည်း မြန်မာနိုင်ငံနဲ့အခြားနိုင်ငံတွေကြား ကုန်သွယ်မှုက ပြီးခဲ့တဲ့ ဧပြီလကနေ စက်တင်ဘာအထိ (၆)လတာ ကာလအတွင်း  အမေရိကန်ဒေါ်လာ  ၁၆ဘီလီယံကျော်ရှိပြီး ကုန်သွယ်မှုလိုငွေ ၁.၈ဘီလီယံကျော် ရှိခဲ့တယ်လို့ သိရပါတယ်။ 
 
 
 

Related News