၂၀၁၇ နှစ်အကုန်အတွင်း ဖွင့်လှစ်ရန် ပြင်ဆင်နေတဲ့ လှိုင်သာယာမြို့နယ်ရှိ လေလွင့်ခွေးများ ထိန်းသိမ်းရေးဂေဟာမှာ စမ်းသပ်ကာလအနေနဲ့ မင်္ဂလာတောင်ညွန့်နဲ့ စမ်းချောင်းမြို့နယ်က လေလွင့်ခွေး ၅၂ ကောင်ကို ခေါ်ယူပြီး ထိန်းသိမ်းစောင့်ရှောက်နေတာ အဆင်ပြေမှုရှိတယ်လို့  ရန်ကုန်မြို့တော်စည်ပင်သာယာရေး ကော်မတီ၊ တိရစ္ဆာန်ဆေးကုနှင့် သားသတ်ရုံများဌာနမှ သိရပါတယ်။ခွေးရှင်းလင်းရေး မလုပ်ဆောင်ရတဲ့ နယ်မြေအဖြစ် MOU လက်မှတ်ရေးထိုးထားတဲ့ မင်္ဂလာတောင်ညွန့်နဲ့ စမ်းချောင်းမြို့နယ်က လေလွင့်ခွေး ၅၂ ကောင်ကို မေ့ဆေးနဲ့ ဖမ်းပြီး လှိုင်သာယာမြို့နယ်မွေးမြူရေးနှင့် မွေးမြူရေး ထုတ်ကုန်ပစ်္စည်းများ ထုတ်လုပ်ရေးဇုန်အတွင်းက လေလွင့်ခွေးများ ထိန်းသိမ်းရေးဂေဟာမှာ ခေါ်ယူထိန်းသိမ်းထားတာ ဖြစ်ပါတယ်။
 
ခြံလှောင်စနစ်နဲ့ လေလွင့်ခွေးတွေကို ထိန်းသိမ်းထားတာဖြစ်ပြီး သီးသန့်စားဖိုဆောင်နဲ့ ချက်တဲ့ ထမင်းနဲ့အသားကို တစ်နေ့ နှစ်ကြိမ်ကျွေးတယ်လို့သိရပါတယ်။လေလွင့်ခွေးတွေကို လက်ခံပြီးတာနဲ့ ကနဦးလက်ခံထိန်းသိမ်းရေးခန်းမှာ ထားရှိပြီး ခွေးရူးရောဂါကာကွယ်ဆေး ထိုးနှံပေးတာ၊ သန်ချဆေး တိုက်ကျွေးတာနဲ့ မျိုးဆက်ပွားထိန်းချုပ်ရေး ခွဲစိတ်မှုတွေ လုပ်ဆောင်ပြီးမှ ဂေဟာအတွင်း နေသားတကျရှိစေဖို့ လေ့ကျင့်ပေးနေတယ်လို့ သိရပါတယ်။ ဂေဟာမှာ နေသားကျပြီး ယဉ်ပါးမှုရှိလာတဲ့ ခွေးတွေကိုတော့ သီးသန့်အဆောင် ငါးခုမှာ အထီး၊ အမခွဲခြားပြီး ထိန်းသိမ်းသွားမှာဖြစ်ပါတယ်။ 
 
လေလွင့်ခွေးများ ထိန်းသိမ်းရေးဂေဟာကို ၂၀၁၆ခုနှစ် နိုဝင်ဘာလကတည်းက တင်ဒါစနစ်နဲ့ မြသက်တင် ဆောက်လုပ်ရေးကုမ္ပဏီက တည်ဆောက်နေတာဖြစ်ပြီး ဂေဟာအဆောက်အဦးက ပေ ၁၅၀ ပေ ၁၀၀ ကျယ်ဝန်းတယ်လို့သိရပါတယ်။ လေလွင့်ခွေးများ ထိန်းသိမ်းရေးဂေဟာကို ဒီနှစ်အကုန် ဖွင့်လှစ်မှာ ဖြစ်ပြီး ရန်ကုန်မြို့တော်စည်ပင်သာယာရေးကော်မတီက  ကျပ်သိန်ပေါင်း နှစ်ထောင်ကျော် အကုန်အကျခံကာ တည်ဆောက်ပေးတာဖြစ်တယ်လို့သိရပါတယ်။
 
 
 

Related News