မြန်မာဒေသမွေးမြူရေးလုပ်ငန်းတွေနဲ့ ကိုက်ညီတဲ့ သင်ရိုးညွှန်းတမ်းကိုWin Rock International အဖွဲ့အစည်းမှ ရေးဆွဲသွားမှာဖြစ်ပြီး သင်တန်းလိုအပ်တဲ့ တိုင်းဒေသကြီးနဲ့ ပြည်နယ်တွေကို ၂၀၁၈ နှစ်ကုန်ပိုင်းမှာ သင်တန်းပို့ချသွားမှာ ဖြစ်ပါတယ်။ပြည်တွင်းရှိ မွေးမြူရေးတောင်သူတွေ ကိုယ်တိုင်က မွေးမြူရေးကဏ္ဍနဲ့ ပတ်သက်တဲ့ သင်တန်းတွေကို တောင်းဆိုတာကြောင့် မြန်မာနိုင်ငံ မွေးမြူရေးလုပ်ငန်းအဖွဲ့ချုပ်နဲ့ မြန်မာနိုင်ငံ မွေးမြူရေး စွမ်းအားစုများ ဖွံ့ဖြိုးတိုးတက်ရေး သုသေတနအသင်းက ယခု ၂၀၁၈ နှစ်ကုန်အတွင်း စီစဉ်ပေးမှာ ဖြစ်ပါတယ်။ အဆိုပါသင်တန်းအတွက် သင်ရိုးညွှန်းတမ်းကို Win Rock International ရဲ့ အကူအညီနဲ့ တက္ကဆက်ပြည်နယ်မှ ပရော်ဖက်ဆာနှစ်ဦးက ရေးဆွဲပေးမှာဖြစ်ပြီး ပြည်တွင်းမှ မွေးမြူရေးပညာရှင် ၉ ဦးက ပါဝင်ကူညီမှာ ဖြစ်ပါတယ်။

ယခု ပို့ချသွားမယ့် သင်တန်းက မွေးမြူရေးကဏ္ဍမှာ ပါဝင်လုပ်ကိုင်နေတဲ့ လူငယ်တွေကို ဦးတည်ထားတာဖြစ်ပြီး မွေးမြူရေးလုပ်ငန်းတွေကို စနစ်တကျလုပ်ကိုင်တတ်အောင် ရည်ရွယ်သင်ကြားပေးမယ်လို့ ပြောပါတယ်။သင်ရိုးညွှန်းတမ်းကို ၂၀၁၈ နှစ်လယ်ပိုင်းမှာ အပြီးသတ်ရေးဆွဲမှာဖြစ်ပြီး သင်တန်းမှာတော့ ကျွဲ၊ နွား၊ သိုး၊ ဆိတ်၊ ကြက်၊ ၀က် မွေးမြူရေး ကဏ္ဍတွေကို စီးပွားဖြစ်လုပ်ကိုင်ဖို့ လိုအပ်တဲ့ အချက်အလက်တွေနဲ့ အသားတိုးမွေးမြူတာကနေ ဈေးကွက်ထဲ ဖြန့်ချိတဲ့အထိ နည်းစနစ်ကျ လုပ်ကိုင်တတ်ရန် သင်ကြားပေးမှာ ဖြစ်ပါတယ်။ သင်ရိုးညွှန်းတမ်းကို မြန်မာ့ဒေသမှ မွေးမြူရေး လုပ်ငန်းတွေနဲ့ ကိုက်ညီအောင် ရေးဆွဲမှာဖြစ်ပြီး ပြည်တွင်းမှ မွေးမြူရေးတောင်သူတွေရဲ့ အတွေ့အကြုံတွေကိုပါ ထည့်သွင်းမယ်လို့ သိရပါတယ်။

လာမယ့်သင်တန်းမှာ မွေးမြူရေး တိရစ္ဆာန်တွေရဲ့ ကျန်းမာရေးကို ဂရုစိုက်ပြီး ရောဂါမဖြစ်ပွားအောင် ကြိုတင်ကာကွယ်ရေးတွေ လုပ်ဆောင်တတ်အာင် ဇီဝလုံခြုံရေး ဘာသာရပ်ကိုလည်း ပို့ချပေးမှာ ဖြစ်ပါတယ်။မွေးမြူရေးလုပ်ငန်းဆိုင်ရာ သင်ရိုးညွှန်းတမ်းရေးဆွဲပြီးတာနဲ့ မြန်မာနိုင်ငံ မွေးမြူရေး စွမ်းအားစုများ ဖွံ့ဖြိုးတိုးတက်ရေး သုသေတနအသင်းက သင်တန်းကို တာဝန်ယူပို့ချပေးသွားမှာ ဖြစ်ပါတယ်။ ယခု ၂၀၁၈ နှစ်ကုန်အတွင်း ပို့ချနိုင်ရန် ရည်ရွယ်ထားတဲ့ သင်တန်းကို ရန်ကုန်တိုင်းဒေသကြီး၊ ပဲခူးတိုင်းဒေသကြီး၊ မကွေးတိုင်းဒေသကြီး၊ ကရင်ပြည်နယ်နဲ့ မွန်ပြည်နယ်တို့မှ မွေးမြူရေး တောင်သူတွေကို သင်ကြားပေးသွားမယ်လို့ သိရပါတယ်။

 

 

 

Related News