မြစ်ဆုံနဲ့သံလွင်ရေကာတာစီမံကိန်းတွေအပါအ၀င် ကျောက်မီးသွေးစီမံကိန်းကြီးတွေနဲ့ ပတ်သက်တဲ့ သတင်းအချက်အလက်တွေကို အများပြည်သူကို ပွင့်လင်းမြင်သာစွာချပြဖို့ မြန်မာနိုင်ငံ ပွင့်လင်းမြင်သာမှုနဲ့ တာဝန်ယူမှုတာဝန်ခံမှုဆိုင်ရာအရပ်ဘက်မဟာမိတ်အဖွဲ့ (MATA)က အစိုးရထံ အကြံပြုတိုက်တွန်းလိုက်ပါတယ်။မြန်မာနိုင်ငံရဲ့ဒီမိုကရေစီ၊ဖက်ဒရယ်၊လူ့အခွင့်အရေးနဲ့ကောင်းမွန်သောသယံဇာတစီမံ အုပ်ချုပ်မှုနဲ့ ပတ်သတ်ပြီး MATA အဖွဲ့မှာပါတဲ့ တစ်နိုင်ငံလုံးကအရပ်ဘက်အဖွဲ့(၃၀၀)ကျော်က ကိုယ်စားလှယ် တွေဆွေးနွေးခဲ့ကြပြီးနောက် စွမ်းအင်ကဏ္ဍအတွက်အခုလို ထုတ်ပြန်လိုက်တာ ဖြစ်ပါတယ်။
 
လက်ရှိအစိုးရသစ်လက်ထက် ဖွဲ့စည်းထားတဲ့ ဧရာဝတီ-မြစ်ဆုံ မြစ်ညာ၊မြစ်ဝှမ်းရေအား လျှပ်စစ်စီမံကိန်းဆိုင်ရာ လေ့လာဆန်းစစ်ရေးကော်မရှင်အစီရင်ခံစာအပါအ၀င် သံလွင်ရေကာတာနဲ့ ကရင်ကျောက်မီးသွေးစီမံကိန်းဆိုင်ရာ အချက်အလက်တွေကို ပွင့်လင်းမြင်သာစွာထုတ်ပြန်ပေးဖို့ ဆိုလိုတယ်လို့လည်း အခုထုတ်ပြန်ချက်မှာ ထည့်သွင်းထားပါတယ်။MATA အနေနဲ့ ရေကာတာစီမံကိန်းကြီးအားလုံးကို ကန့်ကွက်တာမဟုတ်ပဲ စီမံကိန်းနဲ့ ပတ်သက်လို့ ပွင့်လင်းမြင်သာစွာချပြမှုမရှိလို့ ကန့်ကွက်တာဖြစ်တယ်လို့ပြောပါတယ်။လက်ရှိ အချိန်မှာ စွမ်းအင်၊သယံဇာတထုတ်ယူသုံးစွဲမှုတွေထက်လုပ်ထုံးလုပ်နည်းဥပဒေတွေ ပြည့်စုံအောင် ဦးစားပေးလုပ်ဆောင်သင့်တယ်လို့ MATA က သုံးသပ်ပါတယ်။
 
စွမ်းအင်နဲ့သယံဇာတထုတ်ယူသုံးစွဲမှုဆိုင်ရာ မူဝါဒနဲ့လုပ်ထုံးလုပ်နည်းတွေဟာ ဗဟိုချုပ်ကိုင် မှုများနေဆဲဖြစ်ပြီးပွင့်လင်းမြင်သာမှုနဲ့ တာဝန်ယူမှုတာဝန်ခံမှုမရှိသေးဘူးလို့ပြောပါတယ်။MATAဟာ မြန်မာနိုင်ငံရဲ့စွမ်းအင်နဲ့သယံဇာတစီမံအုပ်ချုပ်မှုတွေနဲ့ပတ်သက်ပြီး အစဉ်တစိုက်လေ့လာ စောင့်ကြည့်မှုတွေလုပ်ဆောင်နေတဲ့အရပ်ဘက်အဖွဲ့ ကွန်ရက်ဖြစ်ပါတယ်။MATA အဖွဲ့အနေနဲ့လက်ရှိမှာ အရပ်ဘက်အဖွဲ့ကိုယ်စားပြုအနေနဲ့ အစိုးရ၊လုပ်ငန်းရှင်တွေနဲ့ အတူ EITI သုံးပွင့်ဆိုင်ညွှန်ပေါင်းအဖွဲ့မှာပါဝင်လုပ်ဆောင်နေတာဖြစ်ပါတယ်။မြန်မာနိုင်ငံအနေနဲ့ EITI တင်းပြည့် အဖွဲ့ဝင်နိုင်ငံဖြစ်ဖို့ သယံဇာတတူးဖော်ထုတ်လုပ်သည့် လုပ်ငန်းများပွင့်လင်း မြင်သာမှုဖော်ဆောင်ရေး(EITI) နှစ်နှစ်စာအစီရင်ခံစာကို လာမယ့်မတ်လမှာ တင်သွင်းရမှာ ဖြစ်ပါတယ်။
 
 
 

Related News