ပြည်ထောင်စုအဆင့်ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ (JMC-U) ရဲ့ (၁၄)ကြိမ်မြာက် အစည်းအဝေးကို ရန်ကုန်မြို့ ရွှေလီလမ်းမှာရှိတဲ့ အမျိုးသား ပြန်လည်သင့်မြတ်ရေးနှင့်ငြိမ်းချမ်းရေး ဗဟိုဋ္ဌာန(NRPC)ရန်ကုန်မှာ ပြုလုပ်နေပါတယ်။ဒီအစည်းအဝေးရဲ့ အဖွင့်မိန့်ခွန်းမှာ JMC-U  ဒုတိယဥက္ကဋ္ဌဖြစ်တဲ့ ဦးပြည့်စုံကထည့်သွင်း ပြောကြားခဲ့တာပါ။ လက်ရှိမှာ တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA)လက်မှတ်ရေးထိုးထားတဲ့အဖွဲ့တွေထက် NCA မထိုးထားပဲအစိုးရနဲ့ တစ်ဖွဲ့ချင်း နှစ်ဖက် သဘောတူညီချက်(ဘိုင်လက်ထရယ်)ပြုလုပ်ထားတဲ့အဖွဲ့တွေက အခွင့်အရေးပိုရနေသလို ဖြစ်နေတယ်လို့ ပြောပါတယ်။
 
အဆိုပါအဖွဲ့တွေထက် JMC မှာ ပါတဲ့ NCA လက်မှတ်ထိုးပြီးအဖွဲ့တွေက ကန့်သတ်ချက် တွေ ပိုကြုံနေရတယ်လို့ ဦးပြည့်စုံက ပြောပါတယ်။ လက်မှတ်ထိုးပြီးအဖွဲ့တွေကို အခွင့်အရေးပိုပေးဖို့နဲ့ တဖွဲ့ချင်း အပစ်ရပ်စာချုပ်ချုပ်ထားပြီး NCA လက်မှတ်မထိုး သေးတဲ့အဖွဲ့တွေကြား ထင်ရှားမြင်သာ တဲ့ အခွင့်အရေးကွာဟမှုတွေ ရှိစေဖို့လုပ်ဆောင်သင့်ပြီး ငြိမ်းချမ်းရေးလုပ်ငန်းစဉ် ကြာမြင့်မှု တွေကြောင့် ငြီးငွေ့မှုတွေမဖြစ်ဖို့ လိုတယ်လို့လည်း ဆက်ပြောပါတယ်။
 
ငြိမ်းချမ်းရေးလုပ်ငန်းစဉ်တွေကို အခက်အခဲမရှိဆောင်ရွက်နိုင်ဖို့နှစ်ဖက် ရည်မှန်းချက်တူညီဖို့ လိုသလို ရည်မှန်းချက်အတွက် သွားရာလမ်းကြောင်းလမ်းတူညီဖို့ အရေးကြီးတယ်လို့ JMC-U  ရဲ့ ဥက္ကဋ္ဌက ပြောပါတယ်။ JMC-U  ရဲ့ တိုင်းရင်းသားလက်နက်ကိုင်အစုအဖွဲ့ ကိုယ်စားပြု ဒုတိယဥက္ကဋ္ဌ စောအိုက်ဇက်ဖိုးကတော့ နိုင်ငံရေးဆွေးနွေးပွဲများ အောင်မြင်စွာ ကျင်းပနိုင်ဖို့ NCA ပါ စစ်ဘက်ဆိုင်ရာ စည်းမျဉ်းစည်းကမ်းတွေကို နှစ်ဖက်လက်နက်က်ုင်များ ဖောက်ဖျက်မှု ရှိမရှိ စောင့်ကြည့်စစ်ဆေးအရေးယူတာတွေ လုပ်ရမှာဖြစ်တယ်လို့ပြောပါတယ်။
 
NCA စာချုပ်အကောင် အထည်ဖော်ရာမှာ ထင်သလောက် မလွယ်ကြောင်း၊ လက်ရှိအချိန်ထိ နှစ်ဖက် လက်နက်ကိုင် တွေကြား စိုးရိမ်စိတ်နဲ့သံသယတွေရှိနေသေးတာကြောင့် အပြောအဆို၊အပြုအမူတွေကို အထူးသတိထားကြရမယ်လို့ စောအိုက်ဇက်ဖိုးက ပြောပါတယ်။ (၁၄)ကြိမ်မြောက်ပြည်ထောင်စုအဆင့်ပစ်ခတ် တိုက်ခိုက်မှုရပ်စဲရေးဆိုင်ရာပူးတွဲစောင့်ကြည့်ရေးကော်မတီ(JMC-U) အစည်းအဝေးတွေကိုတော့ ဇန်န၀ါရီ(၁၇)ရက်ကနေ (၁၉)ရက်နေ့အထိ ပြုလုပ်နေတာဖြစ်ပါတယ်။ 
 
 
 

Related News