အခု၂၀၁၇-၂၀၁၈ဘဏ္ဍာနှစ်အတွင်းရန်ကုန်တိုင်းဒေသကြီးအတွင်းရှိကာရာအိုကေ(ခေါ်)KTV   လုပ်ငန်းတွေကနေ အခွန်ငွေကျပ်(၅၄)သန်းကျော်ရရှိမှာဖြစ်တယ်လို့ ရန်ကုန်တိုင်းဒေသကြီး အစိုးရအဖွဲ့က ပြောကြားလိုက်ပါတယ်။ အခုဘဏ္ဍာနှစ်ရဲ့(၂၀၁၈)ဇန်န၀ါရီလ(၁)ရက်ထိရန်ကုန်တိုင်းဒေသကြီးအတွင်း (KTV)လုပ်ငန်း(၃၂၆)ခု ခွင့်ပြုပေးထားပါတယ်။ ခွင့်ပြုဖို့တင်ပြလာတဲ့ ကာရာအိုကေလုပ်ငန်းလိုင်စင် တွေကို တိုင်းဒေသကြီး ဗီဒီယိုလုပ်ငန်းစိစစ်ကြီးကြပ်ရေးကော်မတီအပါအ၀င် သက်ဆိုင်ရာ အဖွဲ့အစည်းတွေ၊ အုပ်ချုပ်ရေးဆိုင်ရာ အဖွဲ့အစည်းတွေရဲ့အတည်ပြုချက်တွေနဲ့ ခွင့်ပြုပေးနေတာပါ။ လုပ်ငန်းလိုင်စင်ကြေးအဖြစ် ကာရာအိုကေစက်တစ်လုံးကိုတစ်နှစ် ငွေကျပ်သုံးသောင်း၊ သက်တမ်းတိုးခအဖြစ် ငွေကျပ်နှစ်သောင်း ကောက်ခံနေပြီး ဒီနှုန်းထားဟာတိုင်းဒေသကြီးနဲ့ ပြည်နယ်တွေ အားလုံးမှာ တပြေးညီကောက်ခံနေတာဖြစ်တယ်လို့ ရန်ကုန်တိုင်းဒေသကြီး အစိုးရအဖွဲ့က ပြောပါတယ်။
 
အခုဘဏ္ဍာနှစ်အတွင်း ရန်ကုန်တိုင်းဒေသကြီးအတွင်းရှိ ကာရာအိုကေ(ခေါ်)KTV  တွေကို လိုင်စင်ထုတ်ပေးတာ၊ သက်တမ်းတိုးတာ၊ ရက်လွန်ကြေးတွေ စတာတွေက အခွန်ဝင်ငွေ စုစုပေါင်း ငွေကျပ်(၄၁.၁)သန်းရရှိထားပြီး ဘဏ္ဍာနှစ်ကုန်ရင် ငွေကျပ် (၅၄.၈)သန်းခန့်ရရှိမှာ ဖြစ်တယ်လို့ ရန်ကုန်တိုင်းဒေသကြီး အစိုးရအဖွဲ့ကပြောကြားပါတယ်။ဒီအခွန်ငွေတွေကို ၀န်ဆောင်မှုလုပ်ငန်းတွေကနေရရှိတဲ့ဝင်ငွေအဖြစ်နဲ့တိုင်းဒေသကြီးအစိုးရရဲ့ ဘဏ္ဍာရန်ပုံငွေအဖြစ် ပေးသွင်းနေတာပါ။ ဒီ KTV တွေအကြောင်းနဲ့ပတ်သက်လို့တိုင်းဒေသကြီး လွှတ်တော်မှာ ဖေဖော်ဝါရီ(၇)ရက်က ကျောက်တံတားမြို့နယ်အမတ် ဒေါ်ကြည်ပြာက မေးခွန်းမေးမြန်းလို့ ပြန်လည်ရှင်းလင်းဖြေကြားခဲ့တာလည်းဖြစ်ပါတယ်။ 
 
ရန်ကုန်တိုင်းဒေသကြီး အတွင်း လုပ်ကိုင်ဆောင်ရွက်ခွင့်ပြုထားတဲ့ ကာရာအိုကေလုပ်ငန်းပေါင်း၊ လိုင်စင်ကို ပြန်ကြားရေး ၀န်ကြီးဌာနက ဘယ်လိုစည်းကမ်းချက်တွေနဲ့အညီ ထုတ်ပေးနေသလဲ၊ လုပ်ငန်းလိုင်စင် သတ်မှတ်ချက်၊၂၀၁၇-၂၀၁၈ ဘဏ္ဍာနှစ်မှာ ကာရာအိုကေလုပ်ငန်းတွေအတွက် အခွန်ရရှိမှု စတာတွေကို  ဒေါ်ကြည်ပြာက မေးမြန်းခဲ့တာပါ။(KTV )လုပ်ငန်းတွေအနေနဲ့လက်ရှိအရှေ့ပိုင်းခရိုင်မှာ(၁၁၆)ခု၊ အနောက်ပိုင်းခရိုင်မှာ(၁၁၂)ခု၊  တောင်ပိုင်းခရိုင်မှာ(၁၀)ခု၊ မြောက်ပိုင်းခရိုင်မှာ(၇၈)ခုရှိတယ်လို့ သိရပါတယ်။ ကာရာအိုကေ သီဆိုခြင်းလုပ်ငန်းကို ဗီဒီယိုပြသခြင်းလုပ်ငန်းအဖြစ် ၁၉၉၆ ကတည်းက ရုပ်မြင်သံကြားနှင့်ဗီဒီယို ဥပဒေနဲ့အညီ ဗီဒီယိုပြသခြင်းလုပ်ငန်းလိုင်စင်တစ်ခုဖြစ် လုပ်ကိုင်စေခဲ့ပါတယ်။
 
တိုင်းဒေသကြီနဲ့ ပြည်နယ်အားလုံးမှာ စည်းကမ်းတကျ တပြေးညီလုပ်ကိုင်နိုင်ဖို့ ၂၀၀၀ခုနှစ် သြဂုတ်လမှာ ဗီဒီယိုလုပ်ငန်းစိစစ်ကြီးကြပ်ရေးဗဟိုကော်မတီ အစည်းအဝေးပြုလုပ်ကာ စည်းကမ်းချက် (၁၇)ချက်ကို ညှိနှိုင်းဆုံးဖြတ်ခဲ့ပြီး ရုပ်မြင်သံကြားနဲ့ဗီဒီယိုဥပဒေအရ ကော်မတီက လုပ်ငန်းလိုင်စင်ခွင့်ပြုတာ၊ ငြင်းပယ်တာတွေကိုလုပ်ဆောင်နေတယ်လို့သိရပါတယ်။
 
 

Related News