တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA)ကို မွန်ပြည်သစ်ပါတီ (NMSP) နဲ့ လားဟူဒီမိုကရက်တစ်အစည်းအရုံး(LDU) တို့က လက်မှတ်ရေးထိုးခဲ့ကြပါတယ်။
 
လက်မှတ်ရေးထိုးခြင်းအခမ်းအနားကို နေပြည်တော်မှာရှိတဲ့ မြန်မာအပြည်ပြည်ဆိုင်ရာ ကွန်ဗစ်ရှင်းဗဟိုဌာန(၂) MICC 2မှာ ဒီကနေ့ ဖေဖေါ်ဝါရီလ ၁၃ ရက်က  ပြုလုပ်ခဲ့ပြီး နိုင်ငံတော်သမ္မတ ဦးထင်ကျော် နိုင်ငံတော်၏အတိုင်ပင်ခံပုဂ်္ဂိုလ်ဒေါ်အောင်ဆန်းစုကြည်၊ ဒုတိယသမ္မတတွေဖြစ်တဲ့ ဦးမြင့်ဆွေနဲ့ ဦးဟင်နရီဗန်ထီးယူတို့အပါအ၀င် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင် နဲ့ တာဝန်ရှိသူတွေ ပြည်ထာင်စုဝန်ကြီးတွေ၊ ဒုတိယ၀န်ကြီးတွေ နဲ့ နိုင်ငံတကာက တာဝန်ရှိသူတွေ ဖိတ်ကြားထားတဲ့ သူတွေတက်ရာက်ခဲ့ကြပါတယ်။
 
လက်မှတ်ရေးထိုးပွဲကို နိုင်ငံတော်၏အတိုင်ပင်ခံပုဂ်္ဂိုလ် ဒေါ်အောင်ဆန်းစုကြည်က အဖွင့်အမှာစကားပြောကြားရာမှာ NCA လက်မှတ်ရေးထိုးတဲ့အဖွဲတွေတိုးလာတဲ့ အတွက်ဝမ်းသာကြောင်း  NCA လက်မှတ်ရေးထိုးပြီးသားအဖွဲ့တွေနဲ့ ပစ်ခတ်တိုက်ခိုက်မှု ရပ်စဲရေးလုပ်ငန်းစဉ်တွေ ခိုင်မာအောင်ဆက်လက်ကြိုးပမ်းသွားမှာဖြစ်ပြီး နိုင်ငံရေးဆွေးနွေးပွဲတွေ ဆက်လုပ်ကာ အချင်းချင်းကြား သဘောထားကွဲလွဲမှုတွေကို ပင်လုံစိတ်ဓာတ်နဲ့ မျက်နှာချင်းဆိုင်ထိုင်ပြီး ဆွေးနွေးညှိနှိုင်း အဖြေရှာသွားမယ်လို့ ပြောကြားခဲ့ပါတယ်။
 
တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်အောင်လှိုင်ကလည်း လက်မှတ်ရေး ထိုးခဲ့တဲ့ မွန်ပြည်သစ်ပါတီနဲ့ လားဟူဒီမိုကရက်တစ် အစည်းအရုံးတို့ကိုဝမ်းမြောက်ဝမ်းသာ ကြိုဆိုကြောင်း ယခုလို ထာဝရငြိမ်းချမ်းရေးအတွက် ပူးပေါင်းဆောင်ရွက်လာမှုအတွက် ညီနောင်တိုင်းရင်းသား လက်နက်ကိုင် အဖွဲ့အစည်းတွေကြားယုံမှားသံသယစိတ်တွေ နဲ့ စိုးရိမ်ပူပန်မှုတွေ အတော်အတန် လျော့ပါးစေပြီး ပါဝင်လက်မှတ်ရေးထိုးဖို့ကျန်နေသေးတဲ့ တိုင်းရင်းသားလက်နက်ကိုင် အဖွဲ့အစည်းများ အနေနဲ့လည်း ဆုံးဖြတ်ချက်မမှားပဲ ဆက်လက်ပူးပေါင်းပါဝင်ဆောင်ရွက်လာလိမ့်မယ်လို့ မျှော်လင့်ကြောင်းပြောကြားခဲ့ပါတယ် ။
 
အဲဒီနောက် လက်မှတ်ရေးထိုးခဲ့တဲ့ အဖွဲ့နှစ်ဖွဲ့ကိုယ်စား မွန်ပြည်သစ်ပါတီ ဥက္ကဌ နိုင်ထောမွန်က လက်မှတ်ရေးထိုးခဲ့တာနဲ့ ပတ်သက်ပြီး မိန့်ခွန်းပြောကြားခဲ့ကာ နိုင်ငံတော် အကြီးအကဲတွေ ပြည်တွင်းပြည်ပ အသိသက်သေတွေရှေ့မှာ စာချုပ်လက်မှတ်ရေးထိုးခြင်းကိုပြုလုပ်ခဲ့ကြပါတယ်။ လက်ရှိမြန်မာနိုင်ငံမှာ ပြီးခဲ့တဲ့ အစိုးရလက်ထက်မှာ လက်မှတ်ရေးထိုးခဲ့တဲ့ အဖွဲ့ (၈) ဖွဲ့နဲ့ ယခု လက်မှတ်ရေးထိုးခဲ့တဲ့ အဖွဲ့နှစ်ဖွဲ့ စုစုပေါင်း (၁၀)ဖွဲ့ရှိသွားပြီ ဖြစ်ပါတယ်။
 
 

Related News