သဘာဝဘေးအန္တရာယ်တွေဖြစ်ပွားလာပါက ထိခိုက်ဆုံးရှုံးမှုတွေလျော့နည်းစေဖို့အတွက် ကြိုတင် ပြင်ဆင်မှုတွေ ဆောင်ရွက်ထားတယ်လို့ လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေး ၀န်ကြီးဌာန ပြည်ထောင်စုဝန်ကြီး ဒေါက်တာ ၀င်းမြတ်အေးကပြောပါတယ်။မြန်မာနိုင်ငံဟာ သဘာဝဘေးအန္တရာယ်တွေ ဖြစ်ပွားလာပါက ထိခိုက်ဆုံးရှုံးမှုအများဆုံးနိုင်ငံထဲမှာပါဝင်နေပြီး အဆင်သင့်ဖြစ်မှုနည်းပါးတယ်လို့ သတ်မှတ်ထားပါတယ်။

ဒါကြောင့် မြန်မာနိုင်ငံအနေနဲ့ သဘာဝဘေးအန္တရာယ် စီမံခန့်ခွဲမှုတွေနဲ့ပတ်သက်ပြီး မူဝါဒတွေ ၊ အုပ်ချုပ်မှုစနစ်တွေကိုပြောင်းလဲကာသဘာဝ ဘေးအန္တရာယ်တွေအတွက် ကြိုတင်ပြင်ဆင်မှုတွေဆောင်ရွက်ဖို့ လုပ်ဆောင်ထားတယ်လို့နေပြည်တော်မှာရှိတဲ့ ဟိလ်တန်ဟိုတယ်မှာ မေလ(၁၀) ရက်က ပြုလုပ်ခဲ့တဲ့ ပထမအကြိမ်မြန်မာနိုင်ငံ ဘေးအန္တရာယ်ကြောင့်ထိခိုက်ဆုံးရှုံးနိုင်ခြေ ဆန်းစစ် အကဲဖြတ်ချက်နှင့် ထိခိုက်ဆုံးရှုံးနိုင်ခြေပြမြေပုံ ရေးဆွဲ ရေး လမ်းညွှန် ပြုစုခြင်းဆိုင်ရာ အလုပ်ရုံ ဆွေးနွေးပွဲမှာ ဒေါက်တာဝင်းမြတ်အေးကပြောကြားခဲ့တာပါ။

၂၀၁၆ခုနှစ်အတွင်း ကမ္ဘာ့နိုင်ငံတွေရဲ့ခန့်မှန်းလေ့လာချက်တွေအရ မြန်မာနိုင်ငံအနေနဲ့ သဘာဝဘေးအန္တရာယ် တွေဖြစ်ပွားပါက ထိခိုက်ဆုံးရှုံးနိုင်ခြေဟာ လေ့လာမှုပြုလုပ်ခဲ့တဲ့ နိုင်ငံ(၁၇၁) နိုင်ငံ အနက် အဆင့်(၄၂) မှာ တည်ရှိနေတယ်လို့ သိရပါတယ်။ ဒါ့အပြင်သဘာဝဘေးအန္တရာယ်တွေ ဖြစ်ပွားလာပါက အသက် အိုးအိမ် စည်းစိမ် ဆုံးရှုံးမှုတွေနည်းပါးအောင် အသင့်ပြင်ဆင်တုံ့ပြန်နိုင်မှုမှာတော့ အောက်ဆုံး နိုင်ငံ(၁၅)နိုင်ငံ ထဲမှာ ပါဝင်နေတယ်လို့ သိရပါတယ်။ အဲဒီအလုပ်ရုံဆွေးနွေးပွဲမှာ မြန်မာနိုင်ငံအနေနဲ့ သဘာဝဘေးအန္တရာယ်တွေဖြစ်ပွားလာပါက ဘယ်ဒေသတွေမှာ သဘာဝဘေးအန္တရာယ်တွေ ကြုံတွေ့နိုင်ပြီး ထိခိုက်ဆုံးရှုံးနိုင်မှု ဘယ်လောက်ရှိတယ်၊ မြေပုံရေးဆွဲကာ ကြိုတင်ပြင်ဆင်မှုတွေ ဆောင်ရွက်ဖို့ ဆွေးနွေးသွားခဲ့တယ်လို့ သိရပါတယ်။

 

Related News