ရန်ကုန်တိုင်းဒေသကြီးအတွင်း မော်တော်ဆိုင်ကယ်တရားဝင် စီးနင်းခွင့်ပြုထားသောမြို့နယ်များတွင် မော်တော်ဆိုင်ကယ်လိုင်စင်များ ပုံမှန်ပြုလုပ်ပေးနိုင်ရန်အစီအစဉ်ရှိတယ်လို့ ရန်ကုန်တိုင်းဒေသကြီး အစိုးရအဖွဲ့ လျှပ်စစ်၊စစ်မှုလက်မှုနှင့် လမ်းပန်းဆက်သွယ်ရေးဝန်ကြီး ဒေါ်နီလာကျော်က ရန်ကုန်တိုင်းဒေသကြီးလွှတ်တော် ဆဋ္ဌမပုံမှန်အစည်းအဝေးရဲ့ (၄၂)ရက်မြောက်နေ့မှာ ပြောကြားပါတယ်။ကုန်းလမ်းပို့ဆောင်ရေးညွှန်ကြားမှုဦးစီးဌာနရဲ့ ရုံးအမိန့် အမှတ်- ၃၆/၁၄ အရ လိုင်စင်ပြုလုပ်ရန်ကျန်သည့် မော်တော်ဆိုင်ကယ်နှင့် တရားမ၀င်ထပ်မံရောက်ရှိလာသည့်မော်တော်ဆိုင်ကယ်များအား နေပြည်တော်ကောင်စီ နှင့် သက်ဆိုင်ရာ တိုင်းဒေသကြီး ပြည်နယ်အစိုးရအဖွဲ့များမှ တိုက်ရိုက်တာဝန်ယူကြီးကြပ်ပြီး စိစစ်တွေ့ရှိရသောမော်တော်ဆိုင်ကယ်များအပေါ် ဒေသပေါက်ဈေး၏ ၅၀ရာခိုင်နှုန်း(သို့မဟုတ်)၅၀ရာခိုင်နှုန်း အောက်မလျော့သော ဒဏ်ငွေကို သတ်မှတ်ကောက်ခံရန်၊ ဒဏ်ကြေးငွေပေးသွင်းခြင်းမပြုပါက ပို့ကုန်သွင်းကုန်ဥပဒေအရ သက်ဆိုင်ရာတရားရုံးတွင် တရားစွဲဆိုပြီးသက်သေခံပစ္စည်းဖြစ်သော  လိုင်စင်မဲ့ မော်တော်ဆိုင်ကယ်အား ပြည်သူ့ဘဏ္ဍာအဖြစ်သိမ်းဆည်းပြီး လုပ်ထုံးလုပ်နည်းနဲ့အညီလေလံတင်ရောင်းချရန် လုပ်ဆောင်ခြင်းဖြင့် တိုင်းဒေသကြီးအစိုးရအဖွဲ့ ရန်ပုံငွေရရှိခြင်း၊လိုင်စင်မဲ့မော်တင်ယာဉ်များပပျောက်ပြီး မော်တော်ဆိုင်ကယ်ဖြင့် ရာဇ၀တ်ကျူးလွန်ခြင်းများ ပပျောက်သွားမယ်လို့ဆိုပါတယ်။

ရန်ကုန်တိုင်းဒေသကြီးအတွင်း မော်တော်ဆိုင်ကယ်တရားဝင်စီးနင်းခွင့်ပြုထားသော မြို့နယ်များတွင် မော်တော်ဆိုင်ကယ်လိုင်စင်များလွယ်ကူစွာပုံမှန် ပြုလုပ်ပေးနိုင်ရန် အစီအစဉ်ရှိမရှိ၊ လှိုင်သာယာမြို့နယ်အပါအ၀င် ရန်ကုန်တိုင်းဒေသကြီးအတွင်းမော်တော်ဆိုင်ကယ်ဖြင့် ရာဇ၀တ်မှုများကျူးလွန်နေခြင်းများကို လျော့ကျစေရန်အတွက် လိုင်စင်မဲ့မော်တော်ဆိုင်ကယ်များအား ထိရောက်စွာအရေးယူဆောင်ရွက်ရန်အစီအစဉ်ရှိမရှိကို ဇွန်လ (၈)ရက် က ပြုလုပ်တဲ့  ရန်ကုန်တိုင်းဒေသကြီးလွှတ်တော် ဆဋ္ဌမပုံမှန်အစည်းအဝေး မှာ လှိုင်သာယာမြို့နယ် မဲဆန္ဒနယ်အမှတ် (၁) လွှတ်တော်ကိုယ်စားလှယ် မေးမြန်းက မေးမြန်းခဲ့တာပါ။ မော်တော်ဆိုင်ကယ်ဖြင့် ရာဇဝတ်မှုများကျူးလွန်နေခြင်းများကို လျော့ကျစေရန်အတွက် လိုင်စင်မဲ့ မော်တော်ဆိုင်ကယ်များ ပပျောက်ရန်လိုအပ်ကြောင်းနှင့် မော်တော်ဆိုင်ကယ်မှတ်ပုံတင်ခြင်းဖြင့် အုပ်ချုပ်မှုလွယ်ကူပြီး အရေးယူအပြစ်ပေးနိုင်ခြင်းတို့ကြောင့် ရာဇဝတ်မှုကျူးလွန်ခြင်းကို ဟန့်ထားနိုင်လိမ့်မယ်လို့ လျှပ်စစ်၊စက်မှုလက်မှုနှင့် လမ်းပန်းဆက်သွယ်ရေးဝန်ကြီး ဒေါ်နီလာကျော်က ထည့်သွင်းဖြေကြားသွားပါတယ်။ 

 

 

Related News