ရခိုင်ပြည်နယ်မြောက်ပိုင်းဒေသတွေဖြစ်တဲ့ ဘူးသီးတောင်၊ မောင်တောနဲ့ ရသေ့တောင်မြို့နယ်တွေမှာရှိတဲ့ လူဦးရေစာရင်းကိုအတိအကျရရှိဖို့ ဖြစ်နိုင်မယ့်နည်းလမ်းတွေကိုအသုံးပြုပြီး ဆောင်ရွက်သွားမယ်လို့ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေက ပြောပါတယ်။ပြီးခဲ့တဲ့ (၂၀၁၄)ခုနှစ်ကကောက်ခံခဲ့တဲ့ လူဦးရေနှင့်အိမ်အကြောင်းအရာသန်းခေါင်စာရင်းမှာ စာရင်းကောက်ယူနိုင်ခြင်းမရှိတဲ့ လူမျိုးတွေရဲ့လူဦးရေစာရင်းကို အတိအကျရရှိနိုင်ဖို့အတွက် အဲဒီဒေသတွေမှာ မြေပုံရေးဆွဲခြင်းလုပ်ငန်းတွေ အဆောက်အဦစာရင်းတင်သွင်းခြင်းလုပ်ငန်းတွေ အိမ်ထောင်စုလူဦးရေစာရင်းစစ်ဆေးခြင်း လုပ်ငန်းတွေကို နှစ်စဉ်ဆောင်ရွက်နေပြီး လူဦးရေအတိအကျရရှိအောင်လုပ်ဆောင်နေတယ်လို့ ပြည်ထောင်စုဝန်ကြီး ဦးသိန်းဆွေကပြောပါတယ်။

အထက်ပါအကြောင်းအရာတွေနဲ့ ပတ်သက်ပြီး ရခိုင်ပြည်နယ်အတွင်းရှိ စာရင်းမကောက်ယူရသေးသော ဘင်္ဂါလီခန့်မှန်းဦးရေ ဆယ်သိန်းကိုးသောင်း(၁၀၉၀၀၀၀)စာရင်းကို မည်သို့တွက်ချက်ရယူပြီး မည်မျှတိကျမှန်ကန်မှုရှိပါသနည်း၊ လူဦးရေစာရင်းကို အတိအကျရရှိအောင် မည်ကဲ့သို့ ဆက်လက်ဆောင်ရွက်မည်နှင့် နိုင်ငံသားစိစစ်ရေးလုပ်ငန်းများ အောင်မြင်စွာပြီးစီးနိုင်ရန် မည်သို့ ဆောင်ရွက်သွားမည်ကိုသိလိုခြင်းနှင့် ပတ်သက်ပြီး မြေပုံမဲဆန္ဒနယ်က ပြည်သူ့လွှတ်တော် ကိုယ်စားလှယ် ဦးဖေသန်းရဲ့မေးမြန်းမှုကို ပြည်ထောင်စုဝန်ကြီးကပြန်လည်ဖြေကြားခဲ့တာပါ။

အဆိုပါမေးခွန်းကိုဇွန်လ(၁၃)ရက်က ပြုလုပ်တဲ့ဒုတိယအကြိမ် ပြည်သူ့လွှတ်တော် အဋ္ဌမပုံမှန် အစည်းအဝေးမှာမေးမြန်းခဲ့တာပါ။ မေးမြန်းခဲ့တဲ့ ပြည်သူ့လွှတ်တော် ကိုယ်စားလှယ် ဦးဖေသန်းက ဒေသတွင်းရေရှည်တည်တံ့အေးချမ်းဖို့ လူဦးရေစာရင်းကို အသေးစိတ်တိတိကျကျမှတ်တမ်းတင်ဖို့ လိုအပ်တဲ့ အတွက် မေးမြန်းခဲ့တာလို့ပြောပါတယ်။အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာနအနေနဲ့ ယခင်ကတည်းက စာရင်းမကောက်ခံတဲ့ လူမျိုးများအတွက် အိမ်ထောင်စုအလိုက် အမည်စာရင်းနဲ့တကွ သက်ဆိုင်ရာမြို့နယ်ဦးစီးရုံးများတွင် စာရင်းများပြုစုထားတယ်လို့ သိရပါတယ်။

 

 

Related News