အင်းစိန်ဗဟိုအကျဉ်းထောင်အတွင်း ပြစ်ဒဏ်ကျနေသူတွေထဲက အခုနှစ် တက္ကသိုလ်ဝင်တန်းကို ၀င်ရောက်ဖြေဆိုပြီး အောင်မြင်ခဲ့သူတွေကို အကျဉ်းဦးစီးဋ္ဌာနက ဇွန်လ(၁၉)ရက်နေ့မှာ ဂုဏ်ပြုခဲ့ပါတယ်။အခုနှစ် တက္ကသိုလ်ဝင်စာမေးပွဲကို အင်းစိန်ထောင်က အကျဉ်းသား ၃၂ဦး၊ အကျဉ်းသူတစ်ဦး၊ အချုပ်သား ၁ဦး စုစုပေါင်း ဖြေဆိုသူ ၃၄ ဦးဝင်ရောက်ဖြေဆိုခဲ့ရာ ၁၉ဦး အောင်မြင်ခဲ့ကာ သုံးဘာသာ ဂုဏ်ထူးရှင်တစ်ဦး၊ နှစ်ဘာသာဂုဏ်ထူးရ သူတစ်ဦးနဲ့ တစ်ဘာသာ ဂုဏ်ထူးရသူလေးဦး ထွက်ပေါ်ခဲ့ပါတယ်။

ဒီလို ထူးချွန်စွာအောင်မြင်ခဲ့သူတွေ၊ ဂုဏ်ထူးရထူးချွန်အကျဉ်းသားတွေနဲ့ သင်ကြားရေးပိုင်းမှာ ပါဝင်ကူညီပေးခဲ့တဲ့ အင်းစိန်မြို့နယ်က ပညာရေးဝန်ထမ်းတွေ၊ ထောင်တွင်းအနီးကပ် သင်ကြားပေးခဲ့တဲ့ ထောင်တွင်း ပြစ်ဒဏ်ကျသူတွေကို ဂုဏ်ပြုပေးခဲ့တာ ဖြစ်ပါတယ်။တက္ကသိုလ်ဝင်တန်းအောင်မြင်ခဲ့သူတွေကို အနောက်ပိုင်းတက္ကသိုလ်နဲ့ချိတ်ဆက်ပြီး အဝေးသင်ပညာရေးကို ဆက်လက် သင်ယူနိုင်အောင် ဆောင်ရွက်ပေးမယ်လို့ သိရပါတယ်။အင်းစိန်အကျဉ်းထောင်မှာ၂၀၁၄ ကနေ လက်ရှိအချိန်ထိ ဆယ်တန်းအောင်မြင်သူ ၂၉ ဦး အထိရှိခဲ့ပါတယ်။

အခုပညာသင်နှစ် မှာလည်း အင်းစိန်အကျဉ်းထောင်မှာ ပညာသင်ကြားနေတဲ့ ငါးတန်း ၁၀ဦး၊ ခြောက်တန်း ၉ဦး၊ ခုနှစ်တန်း ၃ဦး၊ ရှစ်တန်း ၁၀ဦး ၊ ကိုးတန်း ၁၇ဦးနဲ့ တက္ကသိုလ်ဝင်တန်း ၃၅ ဦးရှိတယ်လို့ သိရပါတယ်။အခုနှစ် တက္ကသိုလ်ဝင်တန်းစာမေးပွဲကို အင်းစိန်  အပါအဝင် တစ်နိုင်ငံလုံးက အကျဉ်းထောင်တွေကနေ အကျဉ်းသား၊အကျဉ်းသူ ၉၃ဦး အချုပ်သား ၁၁ဦး စုစုပေါင်း ၁၀၄ ဦးဝင်ရောက်ဖြေဆိုခဲ့ပြီး ၄၇ဦး အောင်မြင်ခဲ့ပါ တယ်။ 

 

 

Related News