တိုက်ကြီးမြို့နယ်၊ ချောင်းကျိုးကျေးရွာ၊ အာစိဏ္ဏသီရိပရဟိတကျောင်းက ကလေးငယ်တွေကို ငယ်စဉ်ကတည်းက အမှိုက်ကိုစည်းကမ်းတကျစွန့်ပစ်တတ်စေဖို့ အမှိုက်စွန့်ပစ်မှုဆိုင်ရာအသိပညာတွေကို Clean Yangon မင်္ဂလာပါပရဟိတလူငယ်များအသင်းက စေတနာ့ဝန်ထမ်းသင်ကြားရေးဆရာ၊ဆရာမတွေနဲ့  ပတ်ဝန်းကျင်ထိန်းသိမ်းရေးပညာရှင်တို့ကသွားရောက်သင်ကြားပေးနေတာဖြစ်ပါတယ်။

တိုက်ကြီးမြို့နယ် ချောင်းကျိုးကျေးရွာ၊ အာစိဏ္ဏသီရိပရဟိတကျောင်းမှာနေထိုင်ပြီး ပညာသင်ယူနေတဲ့ ကလေးငယ်တွေ အမှိုက်ကိုစည်းကမ်းတကျစွန့်ပစ်တတ်စေဖို့ သူတို့နေထိုင်တဲ့ ကျောင်းက ကျောင်းထိုင်ဆရာတော်ကလေ့ကျင့်သင်ကြားပေးထားလို့ ကလေးငယ်တွေအနေနဲ့ အမှိုက်စနစ်တကျစွန့်ပစ်မှုတွေကို သိရှိနားလည်နေတာကို တွေ့ရှိရတယ်လို့ သိရပါတယ်။ အာစိဏ္ဏသီရိပရဟိတကျောင်း ကျောင်းပတ်ဝန်းကျင်သန့်ရှင်းဖို့အတွက် အမှိုက်တွေကို မိုးတွင်းကာလမှာ  ကျောင်းအတွင်းက အမှိုက်ကန်မှာအမှိုက်စုစည်းထားပြီး နွေရာသီမှာ အမှိုက်တွေကို မီးရှို့ဖျက်စီးပြီး မြေသြဇာအဖြစ်ပြန်လည်အသုံးပြုနေတယ်လို့သိရပါတယ်။

အမှိုက်စွန့်ပစ်မှုဆိုင်ရာအသိပညာပေးပြုလုပ်တာတွေကို စေတနာ့ဝန်ထမ်းသင်ကြားရေးဆရာတွေက ကလေးငယ်တွေကို သင်ကြားပေးရာမှာ ကလေးတွေအလွယ်တကူသိရှိနားလည်နိုင်မယ့်အမှိုက်စွန့်ပစ်မှုဆိုင်ရာကဗျာလေးတွေနဲ့ သင်ကြားပေးနေတာဖြစ်ပါတယ်။ သင်ကြားမှုအပေါ် ကလေးငယ်တွေစိတ်ဝင်စားမှုရှိအောင် စည်းကမ်းတကျအမှိုက်စွန့်ပစ်မှုနဲ့ ပတ်သက်တဲ့ မေးခွန်းများမေးမြန်းပြီး မှန်ကန်အောင်ဖြေနိုင်တဲ့ကလေးငယ်တွေကို မုန့်တွေပေးပြီး သင်ကြားမှု ပိုမိုထိရောက်အောင် ပြုလုပ်သင်ကြားပေးနေတာကိုလည်းတွေ့ရပါတယ်။စည်းကမ်းမဲ့အမှိုက်စွန့်ပစ်မှုတွေကို လိုက်လံစစ်ဆေးကြည့်တဲ့အခါ လူတွေအနေနဲ့ ငယ်စဉ်ကတည်းကစည်းကမ်းရှိစွာအမှိုက်ပစ်တက်ဖို့ကို  စနစ်တကျသင်ကြားပေးခြင်း မခံခဲ့ရတာတွေကြောင့် ကလေးငယ်တွေကနေတစ်ဆင့် မိဘတွေပါသိရှိနားလည်အောင် အခုလို အမှိုက်စွန့်ပစ်မှုဆိုင်ရာအသိပညာတွေကို ပြုလုပ်သင်ကြားဖို့စီစဉ်ဖြစ်တာလို့သိရပါတယ်။

Clean Yangon မင်္ဂလာပါပရဟိတလူငယ်များအသင်းက အခုလို အမှိုက်လျော့ချရေးဆိုင်ရာ အသိပညာပေးအစီအစဉ်တွေကိုရန်ကုန်မြို့တော်စည်ပငသာယာရေးကော်မတီနဲ့ ပတ်ဝန်းကျင်ထိန်းသိမ်းရေးပညာရှင်တွေနဲ့ ပူးပေါင်းပြီး  အခြေခံပညာကျောင်းတွေမှာ အထက်တန်းအဆင့်အသိပညာပေးဟောပြောခြင်းကို ဇူလိုင်လ(၆)ရက်က အ.ထ.က(၃) မင်္ဂလာတောင်ညွန့်မှာ စတင်ပြုလုပ်ခဲ့တယ်လို့သိရပါတယ်။

 

 

 

Related News