မူးယစ်ဆေးဖြတ်ပြီးသူများ ပြန်လည်ထူထောင်ရေးသင်တန်းအပတ်စဉ်(၃)သင်တန်းဆင်းပွဲကို ဒီကနေ့ ဇူလိုင်လ(၁၁)ရက်မှာ ကမ္ဘာအေးဘုရားလမ်းရှိ ပြန်လည်ထူထောင်ရေးစခန်း(ရန်ကုန်)မှာ ပြုလုပ်ခဲ့ပါတယ်။ မူးယစ်ဆေး ဖြတ်ပြီးသူတွေကို ပြန်လည်ထူထောင်ရေးလုပ်ငန်းဆောင်ရွက်ပေးဖို့အတွက် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊ ပြန်လည်ထူထောင်ရေးဦးစီးဌာနလက်အောက်မှာ ပြန်လည်ထူထောင်ရေးစခန်း(ရန်ကုန်) ဖွင့်လှစ်ထားတာဖြစ်ပါတယ်။

ပြန်လည်ထူထောင်ရေးစခန်း(ရန်ကုန်) မှာမူးယစ်ဆေးဖြတ်ပြီးသူတွေကိုသာလက်ခံတာဖြစ်ပြီး မူးယစ်ဆေးဖြတ်ပြီးကြောင်းထောက်ခံစာကိုတော့ ရွာသာကြီးစိတ်ကျန်းမာရေးဆေးရုံနဲ့ အစိုးရအသိအမှတ် ပြုဆေးရုံဆေးခန်းတွေရဲ့ ထောက်ခံစာရရှိမှ တက်ရောက်ရမှာဖြစ်တယ်လို့သိရပါတယ်။ သင်တန်းသားတွေကို စိတ်ဓါတ်ပိုင်းဆိုင်ရာ လေ့ကျင့်မှု၊ ခန္ဓာကိုယ်ကျန်းမာဖို့အတွက် အားကစားနည်းများ အပြင် အသက်မွေးဝမ်းကျောင်းပညာတွေဖြစ်တဲ့ ဆပ်ပြာဆီလုပ်ငန်းနဲ့ တံဆိပ်ရိုက်လုပ်ငန်းတွေကို သင်ကြားပေးနေတယ်လို့သိရပါတယ်။ သင်တန်းဆင်းပြီး သင်တန်းသားတွေကိုလည်း စေတနာ့ဝန်ထမ်းတွေက(၁)နှစ်အထိ စောင့်ကြည့်ထိန်းသိမ်းခြင်းတွေလုပ်ဆောင်ပေးတယ်လို့သိရပါတယ်။

သင်တန်းသားတွေကတော့ အခုလိုမူးယစ်ဆေးဖြတ်ပြီးပြန်လည်ထူထောင်ရေးလုပ်ငန်းလုပ်ဆောင်နေချိန်မှာ အသက်မွေးဝမ်းကျောင်းပညာပါသင်ကြားပေးတဲ့အတွက် ဘ၀အတွက်ရည်မှန်းချက်တွေရှိလာတယ်လို့ပြောပါတယ်။ ဒါ့အပြင် သင်တန်းကသင်ကြားပေးတဲ့ အသက်မွေးဝမ်းကျောင်းပညာတွေကိုသင်ယူပြီး သင်တန်းဆင်းပြီးရင် လုပ်ငန်းခွင်ထဲမှာပြန်လည်အသုံးချသွားမယ်လို့ပြောပါတယ်။ သင်တန်းတက်နေချိန်မှာ ခန္ဓာကိုယ်ကျန်းမာဖို့အတွက် အားကစားနည်းတွေအပြင် စိတ်ဓါတ်ပိုင်းဆိုင်ရာလေ့ကျင့်မှုကိုပါသင်ကြားပေးတာကြောင့် စိတ်ဓါတ်တွေပြန်လည်ကြံ့ခိုင်လာတယ်လို့သင်တန်းသားတွေကပြောပါတယ်။

သင်တန်းသားတွေရဲ့မိဘတွေကလဲ မူးယစ်ဆေးသုံးစွဲသူတွေနဲ့ မူးယစ်ဆေးဖြတ်ပြီးသူတွေအတွက် ဒီလိုသင်တန်းမျိုးတွေဟာ ကောင်းမွန်တာကြောင့် အမှန်တစ်ကယ် လိုအပ်တယ်လို့ပြောပါတယ်။ပြန်လည်ထူထောင်ရေးစခန်း(ရန်ကုန်)မှာ သင်တန်းအပတ်စဉ်တစ်ခုကို(၃၅)ရက်သင်ကြားပေးတာဖြစ်ပြီး၊ သင်တန်းသားတွေအနေနဲ့ သင်တန်းအပတ်စဉ်တစ်ခုနဲ့လုံလောက်မှုမရှိပါက သင်တန်းအပတ်စဉ်(၂)ခုထိ သင်ကြားပေးသွားမယ်လို့ သိရပါတယ်။ သင်တန်းအပတ်စဉ်တစ်ခုမှာ သင်တန်းသား(၂၀)လက်ခံတာဖြစ်ပြီး အခုအပတ်စဉ်(၃)အထိ သင်တန်းသား(၅၀)ကျော် သင်တန်းဆင်းပြီးဖြစ်တယ်လို့သိရပါတယ်။ 

 

 

 

Related News