(၇၁)နှစ်မြောက် အာဇာနည်နေ့အခမ်းအနားကို ဗဟန်းမြို့နယ်ရှိ အာဇာနည်ဗိမာန်မှာ ကျင်းပပြုလုပ်မည်ဖြစ်ရာ ဇူလိုင်လ(၁၉)ရက် နံနက်(၄)နာရီမှ အခမ်းအနားပြီးဆုံးသည်အထိ သတ်မှတ်ထားတဲ့နေရာတွေမှာ လမ်းပိတ်လမ်းလွှဲလုပ်ဆောင်သွားမယ်လို့  အာဇာနည်နေ့အခမ်းအနားလုံခြုံရေးနှင့် ရန်ကုန်တိုင်းဒေသကြီး  ယာဉ်စည်းကမ်းထိန်းသိမ်းရေးကြီးကြပ်မှုကော်မတီမှ သိရပါတယ်။

လမ်းပိတ်လမ်းလွှဲလုပ်ဆောင်သွားမယ့်နေရာတွေကတော့ အနောက်ရွှေဂုံတိုင်လမ်းနှင့် လင့်လမ်းဆုံ၊ ဓမ္မစေတီလမ်းနဲ့ အင်းယားလမ်းဆုံ၊ ရွှေတိဂုံမြောက်ဘက်မုခ်၊ အနောက်ရွှေဂုံတိုင် - အာဇာနည်လမ်းဆုံ၊ရွှေတိဂုံအရှေ့ဘက်မုခ် - ရွှေတိဂုံတောင်ဘက်မုခ်၊ အနောက်ရွှေဂုံတိုင် - ဦးဝိစာရလမ်း၊ ဦးဝိစာရလမ်း - ဓမ္မစေတီလမ်း တို့ဖြစ်တယ်လို့ သိရပါတယ်။ ဒီနေရာ(၈)နေရာမှာ လမ်းပိတ်လမ်းလွှဲဆောင်ရွက်ရတာဟာ အာဇာနည်ဗိမ္မာန်ကို လာရောက်ဂါဝရပြုမယ့် ပြည်သူတွေယာဉ်အန္တရာယ်ကင်းရှင်းစွာနဲ့ဂါရ၀ပြုနိုင်ဖို့အတွက် ဆောင်ရွက်ရခြင်းဖြစ်တယ်လို့သိရပါတယ်။ အာဇာနည်နေ့အခမ်းအနားကို တက်ရောက်ဂါရ၀ပြုမယ့် အရေးကြီးပုဂ္ဂိုလ်တွေ၊ အသင်းအဖွဲ့ကပုဂ္ဂိုလ်တွေနဲ့ အခမ်းအနားကိုတက်ရောက်မယ့် သံရုံးတွေက သံအမတ်ကြီးတွေ ယာဉ်အန္တရာယ်ကင်းရှင်းစွာနဲ့ ၀င်ထွက် သွားလာနိုင်ဖို့ကိုလည်း ယာဉ်လမ်းကြောင်းရှင်းလင်းရေး အင်အား (၃၀၀)ကျော်ချထားဆောင်ရွက်သွားမယ်လို့ ရဲမှူးမျိုးအောင်မြင့်ကပြောပါတယ်။

ဇူလိုင်လ(၁၉)ရက်မှာ ကျရောက်မယ့် (၇၁)နှစ်မြောက် အာဇာနည်နေ့ အခမ်းအနားမှာ အာဇာနည်ဗိမာန်ကိုလာရောက် ကြမယ့် ပြည်သူတွေအနေနဲ့ နေ့လည် (၁၁)နာရီခွဲအချိန်မှ စ၍ ၀င်ရောက်ကြည့်ရှု့သူ ကုန်ဆုံးချိန်အထိဖွင့်လှစ်ပေးထားမှာဖြစ်တယ်လို့သိရပါတယ်။ လာရောက်ကြည့်ရှု့မယ့် ပြည်သူတွေအနေနဲ့ အနောက်ရွှေဂုံတိုင်လမ်း M3 ရှေ့ပေါက်မှဝင်ရာက်ပြီး ရွှေတိဂုံဘုရားမြောက်ဘက်မုဒ် အပေါက်ကနေပြန်လည်ထွက်ခွာရမှာဖြစ်တယ်လို့သိရပါတယ်။

အာဇာနည်ဗိမာန် ၊ ဗိုလ်ချုပ်အောင်ဆန်းနေအိမ်ပြတိုက်နှင့် ၀န်ကြီးများရုံး( အတွင်းဝင်များရုံးဟောင်း) သို့ ယာဉ်အန္တရာယ်ကင်းရှင်းစွာသွားလာနိုင်ရန် ဗိုလ်ချုပ်ပြတိုက်လမ်းကိုလည်း ဇူလိုင်လ(၁၉)ရက်နံနက် (၅)နာရီအချိန်မှ ပြတိုက်ပိတ်ချိန်အထိ မော်တော်ယာဉ်ဝင်ရောက်ခွင့် ပိတ်ပင်ထားမှာဖြစ်ပြီး သတ်မှတ်ထားတဲ့ လမ်းကြောင်းတွေမှသာ စည်းကမ်းတကျ ၀င်ရောက်ထွက်ခွာကြပါရန် အာဇာနည်နေ့အခမ်းအနားလုံခြုံရေးနှင့် ရန်ကုန်တိုင်းဒေသကြီး ယာဉ်စည်းကမ်းထိန်းသိမ်းရေးကြီးကြပ်မှုကော်မတီမှ မေတ္တာရပ်ခံထားပါတယ်။

 

 

 

Related News