အရေးပေါ်လူနာတင်ယာဉ်စနစ် ဖော်ဆောင်ဖို့ ရန်ကုန်တိုင်းဒေသကြီးအစိုးရဖွဲ့က ကော်မတီဖွဲ့စည်းဆောင်ရွက်နေပြီး လာမယ့်ခြောက်လအတွင်း ဒီစနစ်ကို ရန်ကုန်တိုင်းဒေသကြီး တစ်ခုလုံးမှာ ကျင့်သုံးမယ်လို့သိရပါတယ်။ 

အရေးပေါ်လူနာတင်ယာဉ်စနစ် ဖြစ်မြောက်ရေး အလုပ်ရုံဆွေးနွေးပွဲကို ရန်ကုန်တိုင်းဒေသကြီးအစိုးရအဖွဲ့က ဦးဆောင်ပြီး စက်တင်ဘာ ၁၆ ရက်က ဆေးတက္ကသိုလ်(၁) အပန်းဖြေခန်းမမှာ ပြုလုပ်ခဲ့ပါတယ်။ ဒီ အလုပ်ရုံဆွေးနွေးပွဲက ထွက်ရှိလာတဲ့ ရလဒ်တွေကိုတော့ တိုင်းအစိုးရထံ တင်ပြပြီး လာမယ့် ခြောက်လအတွင်းမှာ စနစ်တစ်ခု ပေါ်ထွက်ရေး ဆောင်ရွက်သွားမယ်လို့သိရပါတယ်။

အရေးပေါ်လူနာတင်ယာဉ်စနစ်ထူထောင်ရေးအတွက် ရန်ကုန်တိုင်းဒေသကြီးအစိုးရအဖွဲ့က လူမှုကူညီရေးအသင်းတွေကို တရားဝင်မှတ်ပုံတင်ပေးတာအပြင် ရန်ကုန်တိုင်းဒေသကြီး သယ်ယူပို့ဆောင်ရေး ကြီးကြပ်ကွပ်ကဲမှု အာဏာပိုင်အဖွဲ့(YRTA)နဲ့ ပူးပေါင်းကာ  ဆက်သွယ်ရေးကွန်ရက်စနစ်  ထူထောင်သွားမယ်လို့သိရပါတယ်။

ရန်ကုန်တိုင်းဒေသကြီးအတွင်း မတော်တဆမှုတွေဖြစ်ပွားခဲ့တဲ့ နေရာမှ လူနာတွေကို လက်ရှိ လူမှုကူညီရေးအသင်းတွေက အသင်းပိုင်အရေးပေါ်လူနာတင်ယာဉ်တွေ အသုံးပြုပြီး ဆေးရုံပို့ပေးနေကြတာပါ။ ဒီလိုဆောင်ရွက်နေတဲ့ လူမှုကူညီရေးအသင်းတွေက ရန်ကုန်တိုင်းမှာ တစ်ရာကျော်ရှိပြီး အရေးပေါ်လူနာတင်ယာဉ်စနစ် ပေါ်ပေါက်လာခဲ့ရင်တော့ အသင်းတွေကို ဒီစနစ်အတွင်း ထည့်သွင်းကာ ဥပဒေဘောင်အတွင်းကပဲ ဆောင်ရွက်နိုင်အောင် တိုင်းဒေသကြီးအစိုးရက ကူညီမယ်လို့သိရပါတယ်။ 

အရေးပေါ်လူနာတင်ယာဉ်စနစ်ဖြစ်မြောက်ရေး အလုပ်ရုံဆွေးနွေးပွဲကို ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းတက်ရောက်ခဲ့ပြီး အထွေထွေအုပ်ချုပ်ရေးဦးစီးဌာန၊ ရဲတပ်ဖွဲ့၊ မီးသတ်တပ်ဖွဲ့၊ ယာဉ်ထိန်းရဲတပ်ဖွဲ့၊ YRTA နဲ့ လူမှုကူညီရေးအသင်းကိုယ်စားလှယ်တွေက ဒီစနစ်ဖြစ်မြောက်ရေးကို ဆွေးနွေးခဲ့ကြပါတယ်။  အရေးပေါ်လူနာတင်ယာဉ်စနစ်ဟာ မြန်မာနိုင်ငံမှာယနေ့အထိမရှိသေးပဲ စစ်တမ်းတွေအရတော့ မတော်တဆဖြစ်တဲ့နေရာတွေကို အရေးပေါ်လူနာတင်ယာဉ် ရောက်ရှိတဲ့အချိန်ဟာ တစ်နာရီကနေ နှစ်နာရီအတွင်းဖြစ်နေတယ်လို့သိရပါတယ် ။

 

 

Related News