အပစ်ရပ်ဒေသတွေမှာ ထိတွေ့မှုတွေမဖြစ်ပေါ်လာအောင် ဒေသခံအရပ်သားစောင့်ကြည့်သူတွေ ထားရှိတော့ မယ်လို့သိရပါတယ်။ ပဋိပက္ခဖြစ်နိုင်ချေအရှိဆုံးနေရာတွေမှာ ရှေ့ပြေးစီမံချက်အနေနဲ့စတင် ဆောင်ရွက်မှာဖြစ်တယ်လို့ ပစ်ခတ်တိုက်ခိုက်မှုရပ်စဲရေးဆိုင်ရာ ပူးတွဲစောင့်ကြည့်ရေးကော်မတီ(JMC)ထံကသိရပါတယ်။   

ဒါကို အခုနောက်ဆုံးပြုလုပ်ထားတဲ့ JMCU အစည်းအဝေးမှာ ထည့်သွင်းဆွေးနွေးခဲ့တာဖြစ်ပြီး မွန်နဲ့ကရင်ပြည်နယ်က ကျေးရွာအုပ်စုတစ်ချို့ကို ရွေးချယ် ထားတယ်လို့သိရပါတယ်။မွန်ပြည်နယ် ကျိုက်မရော မြို့နယ်က လမုခိုကျေးရွာအုပ်စုနဲ့ ကရင်ပြည်နယ် ကော့ကရိတ်မြို့နယ်က လောင်းကိုင် နဲ့ နောင်တပွဲ ကျေးရွာအုပ်စုတွေမှာ ရှေ့ပြေးအနေနဲ့စတင်မှာဖြစ်ပါတယ်။

လက်ရှိမှာ အဆိုပါ ကျေးရွာအုပ်စုတွေကို သွားရောက်ပြီး ဒီလုပ်ငန်းစဉ်နဲ့ပတ်သက်လို့ ဒေသခံတွေကိုရှင်းပြတာတွေပြုလုပ်နေပြီး အခုလအတွင်း စတင်ရွေးချယ်မှာဖြစ်ပါတယ်။ ဒေသခံအရပ်သားစောင့်ကြည့်သူ (LCM)တွေဟာ NCA စာချုပ်ပါအချက်တွေနဲ့ပစ်ခတ်တိုက်ခိုက်မှုရပ်စဲရေးဆိုင်ရာ စည်းမျဉ်းစည်းကမ်းတွေကို ချိုးဖောက်မှုရှိမရှိ စောင့်ကြည့်ပြီး JMC ကို တင်ပြရမှာဖြစ်သလို နှစ်ဖက်တပ်ဖွဲ့ဝင်တွေရဲ့ စည်းမျဉ်းစည်းကမ်းချိုးဖောက်မှုရှိလာနိုင်တဲ့အခြေအနေရှိပါက ပဋိပက္ခဖြစ်ပွားတဲ့ အဆင့်မရောက်မီ သတင်းပေးပို့ရမှာ ဖြစ်ပါတယ်။ပြည်ထောင်စုအဆင့် ပစ်ခတ်တိုက်ခိုက်မှုရပ်စဲရေးဆိုင်ရာပူးတွဲစောင့်ကြည့်ရေးကော်မတီ အနေနဲ့ ၄င်းတို့ရဲ့ လုပ်ငန်းစဉ်တွေအတွက် လာမယ့်နှစ်မှာဘတ်ဂျက်အမေရိကန်ဒေါ်လာ သုံးသန်းကျော် အသုံးပြုမှာဖြစ်ပြီး  ဒီထဲက ဒေါ်လာ (၁)သန်းကတော့ ဒီဒေသခံအရပ်သားစောင့်ကြည့်သူတွေအတွက် အသုံးပြုဖို့လျာထား တယ်လို့သိရပါတယ်။

လာမယ့်နှစ်မှာတော့ရှိပြီးသားစောင့်ကြည့်ရေးလုပ်ငန်းစဉ်တွေအပြင် ဒေသခံအရပ်သားစောင့်ကြည့်သူတွေဖွဲ့စည်းနိုင်ရေး အဓိကဆောင်ရွက် သွားမယ်လို့ JMC- U ရဲ့ အတွင်းရေးမှူး (၁) ဒေါက်တာရွှေခါးရ်က ပြောပါတယ်။ ပစ်ခတ်တိုက်ခိုက်မှုရပ်စဲရေးဆိုင်ရာပူးတွဲစောင့်ကြည့်ရေးကော်မတီ(JMC)ဖွဲ့စည်းတာ သုံးနှစ်နီးပါး သက်တမ်းရှိပြီဖြစ်ပြီး  လက်ရှိအချိန်ထိ ရှမ်း၊ တနင်္သာရီ၊ ကရင်၊ မွန်၊ပဲခူးမှာ တိုင်းဒေသကြီးနဲ့ပြည်နယ်အဆင့်စောင့်ကြည့်ရေးကော်မတီတွေကို ဖွဲ့စည်းပြီး ဖြစ်သလို ရှမ်းပြည်နယ် လင်းခေးနဲ့ကရင်ပြည်နယ် ဖာပွန်မှာလည်း ဒေသဆိုင်ရာအဆင့်စောင့်ကြည့်ရေးကော်မတီတွေကို ဖွဲ့စည်းထားပြီးဖြစ်ပါတယ်။ 

 

 

Related News