တာမွေမြို့နယ်က ၁.၄၈ ဧက ကျယ်ဝန်းတဲ့ စက်မှုဝန်ကြီးဌာန၊ မြန်မာ့ဆေးဝါးလုပ်ငန်းပိုင်မြေနေရာကို BOT  စနစ်ဖြင့် နှစ် ၅၀ လုပ်ပိုင်ခွင့်အတွက် ဂျပန်ကုမ္ပဏီ  NSKRE Residence (Myanmar)နှင့်  နှစ်ဖက်သဘောတူစာချုပ်ကို အောက်တိုဘာလ ၆ ရက်က ဆီဒိုးနားဟိုတယ်မှာ လက်မှတ်ရေးထိုးခဲ့ပါတယ်။ 

မြန်မာနိုင်ငံသားကုမ္ပဏီနှစ်ခုနဲ့ ဂျပန်ကုမ္ပဏီတစ်ခုတို့ ပူးပေါင်းဖွဲ့စည်းထားတဲ့ Nippon Steel Kowa Real Estate (NSKRE) Myanmar ကုမ္ပဏီလီမိတက်ကို စက်မှုဝန်ကြီးဌာနက မြန်မာ့ဆေးဝါးလုပ်ငန်းပိုင်မြေပေါ်မှာ နှစ်ရှည်စာချုပ်နဲ့ လုပ်ပိုင်ခွင့်ပေးလိုက်တာဖြစ်ပါတယ်။ ဒီစာချုပ်အရ ဂျပန်ကုမ္ပဏီက မြန်မာ့ဆေးဝါးလုပ်ငန်းပိုင်မြေပေါ်မှာ BOT စနစ်နဲ့ ၁၂ ထပ်အဆောက်အဦဆောက်လုပ်မှာဖြစ်ပြီး နိုင်ငံတော်အစိုးရကို အာမခံ ပရီမီယံကြေး ဒေါ်လာတစ်သန်း ပေးသွင်းရမယ်လို့ သိရပါတယ်။ မြန်မာ့ဆေးဝါးလုပ်ငန်းပိုင်မြေကတော့ ရန်ကုန်တိုင်းဒေသကြီး၊ တာမွေမြို့နယ်၊ တာမွေလေးရပ်ကွက်၊ သာရွှေပြည်လမ်း၊ မြေတိုင်းရပ်ကွက်၊ အမှတ် ၃၄(C)၊ မြေကွက်အမှတ် ၇၇(A) မှာတည်ရှိတဲ့ ၁.၄၈ ဧကကျယ်ဝန်းတဲ့ မြေကွက်ဖြစ်ပြီး ယခင်ကတော့ ဘဲနှစ်ကောင်မြူစွမ်စက်ရုံကို ငှားရမ်းခဲ့တာဖြစ်ပါတယ်။ 

မြန်မာ့ဆေးဝါးလုပ်ငန်းပိုင်မြေပေါ်မှာ လုပ်ပိုင်ခွင့်အတွက့် မြန်မာနိုင်ငံ ရင်းနှီးမြှုပ်နှံမှုကော်မရှင်က ခွင့်ပြုခဲ့တာဖြစ်ပြီး ဥပဒေပိုင်းဆိုင်ရာ အကြောင်းအရာတွေကို ရှေ့နေချုပ်ရုံးက ခွင့်ပြုပေးခဲ့တာဖြစ်ပါတယ်။

ဂျပန်ကုမ္ပဏီက အစိုးရပိုင်မြေမှာ လုပ်ပိုင်ခွင့်ရဖို့ BOT စနစ်အရ ပရီမီယံကြေးပေးသွင်းတာအပြင် ငှားရမ်းခအဖြစ် မြေကွက်ရဲ့ တစ်စတုရန်းမီတာကို ၁၃ ဒေါ်လာနှုန်းနဲ့ တစ်နှစ်ကို ဒေါ်လာ နှစ်သိန်းတစ်တောင်နီးပါး ပေးသွင်းရမယ်လို့ သိရပါတယ်။ ဒီမြေနေရာမှာ ၁၂ ထပ်ရှိတဲ့ Service Apartment ကို နိုင်ငံတကာ စံချိန်စံညွှန်းအမီ တည်ဆောက်မယ်လို့သိရပြီး ရုံးခန်းတွေ၊ မီနိမတ်တွေ၊ ကားပါကင်တွေနဲ့ စားသောက်ခန်းတွေအပြင် မြန်မာနိုင်ငံကို ရင်းနှီးမြှပ်နှံမှုအတွက် လာရောက်တဲ့ ဂျပန်နိုင်ငံသားတွေပါ တည်းခိုနိုင်မယ်လို့သိရပါတယ်။

ဂျပန်ကုမ္ပဏီက ဆောက်လုပ်မယ့် အဆောက်အဦအတွက် အမေရိကန်ဒေါ်လာ သန်း ၈၀ ကျော် ရင်းနှီးမြှုပ်နှံမှာဖြစ်ပြီး ငှားရမ်းလုပ်ကိုင်နေတဲ့ ၃၃ နှစ်အတွင်းမှာ အရင်းကျေမယ်လို့သိရပါတယ်။ ငှားရမ်းလုပ်ကိုင်ခွင့်စာချုပ်ကို ငါးနှစ်တစ်ကြိမ် ပြန်လည်ဆန်းစစ်တာတွေ  ပြုလုပ်သွားမယ်လို့  သိရပါတယ်။ 

 

Related News