ရန်ကုန်မြို့တော်စည်ပင်သာယာရေးကော်မတီ ပတ်ဝန်းကျင်ထိန်းသိမ်းရေးနှင့် သန့်ရှင်းရေးဌာနက ပြုလုပ်နေတဲ့ နောက်ဖေးလမ်းကြားရှင်းလင်းမှုစီမံချက်ကို လာမယ့် ဒီဇင်ဘာ(၄)ရက်မှာ ကြည့်မြင်တိုင်မြို့နယ်ကနေ ပြန်လည်စတင်တော့မယ်လို့ ပတ်ဝန်းကျင်ထိန်းသိမ်းရေးနှင့် သန့်ရှင်းရေးဌာနမှတာဝန်ရှိသူရဲ့ပြောကြားချက်အရသိရပါတယ်။ရန်ကုန်မြို့တော်စည်ပင်သာယာရေးကော်မတီ ပတ်ဝန်းကျင်ထိန်းသိမ်းရေးနှင့် သန့်ရှင်းရေးဌာနအနေနဲ့ (၂၀၁၆)ခုနှစ်ကတည်းက စီမံချက်ရေးဆွဲပြီးနောက်ဖေးလမ်းကြားရှင်းလင်းမှုကို ဆောင်ရွက်နေတာဖြစ်ပါတယ်။

ဒီလိုဆောင်ရွက်တဲ့အခါမှာလည်း နောက်ဖေးလမ်းကြားမှာစည်းကမ်းမဲ့အမှိုက် ရှင်းလင်းသိမ်းဆည်းရေးလုပ်ငန်းကော်မတီ နဲ့ဆောင်ရွက်ရေးကော်မတီဆိုပြီး ကော်မတီ(၂)ခုနဲ့ ဆောင်ရွက်နေတာဖြစ်ပါတယ်။

နောက်ဖေးလမ်းကြားအမှိုက်သိမ်းဆည်းရှင်းလင်းရေးလုပ်ငန်းတွေကို မိုးမကျမီကာလမှာ ရေစီးရေလာကောင်းမွန်စေဖို့အတွက် ချောင်းတွေမြောင်းတွေအမှိုက်ရှင်းလင်းသိမ်းဆည်းရေး ဆောင်ရွက်တာဖြစ်တာကြောင့် မိုးမကျမီကာလနဲ့ မိုးတွင်းကာလတွေမှာတော့ ခေတ္တရပ်ဆိုင်းခဲ့ရတယ်လို့သိရပါတယ်။ ဒီလိုလုပ်ဆောင်နေတဲ့ နောက်ဖေးလမ်းကြားရှင်းလင်းမှုစီမံချက်ကို လာမယ့် ဒီဇင်ဘာ(၄)ရက်မှာတော့ ကြည့်မြင်တိုင်မြို့နယ်က နောက်ဖေးလမ်းကြားတွေကိုရှင်းလင်းမှာဖြစ်ပြီး နောက်ဖေးလမ်းကြားတစ်လမ်းကို လူအင်အား (၃၀)နဲ့ စတင်ဆောင်ရွက်သွားမှာဖြစ်တယ်လို့သိရပါတယ်။

ပြည်သူတွေအနေနဲ့နောက်ဖေးလမ်းကြားတွေမှာ စည်းကမ်းမဲ့အမှိုက်စွန့်ပစ်ကြတဲ့အခါ အမှိုက်မှတစ်ဆင့် ကူးစက်ရောဂါတွေပေါက်ဖွားလာနိုင်တာကြောင့် ရန်ကုန်မြို့တော်စည်ပင်သာယာရေးကော်မတီ ပတ်ဝန်းကျင်ထိန်းသိမ်းရေးနှင့် သန့်ရှင်းရေးဌာနမှ စီမံချက်ရေးဆွဲဆောင်ရွက်နေတာဖြစ်ပါတယ်။

အခုလိုနောက်ဖေးလမ်းကြားရှင်းလင်းမှုစီမံချက်တွေနဲ့ ရှင်းလင်းလာကြတဲ့အခါ နောက်ဖေးလမ်းကြားအမှိုက်ရှင်းလင်းသွားတဲ့အတွက် အရေးပေါ်ကြုံလာရင်လည်းအလွယ်တစ်ကူ နောက်ဖေးလမ်းကြားမှ ၀င်ထွက်သွားလာနိုင်မှာဖြစ်တယ်လို့သိရပါတယ်။ ယခုထပ်မံရှင်းလင်းဖို့နောက်ဖေးလမ်းကြားတွေကို ကွင်းဆင်းကြည့်ရှုရာမှာ အမှိုက်သိမ်းဆည်းမှုနည်းပါးလာတယ်လို့  ပတ်ဝန်းကျင်ထိန်းသိမ်းရေးနှင့်သန့်ရှင်းရေးဌာနက ဒုတိယညွှန်ကြားရေးမှူး ဦးဇော်ဝင်းနိုင်ကပြောပါတယ်။နောက်ဖေးလမ်းကြားစီမံချက်ကို ပြီးခဲ့တဲ့ (၂၀၁၆)ခုနှစ်ကနေစတင်ဆောင်ရွက်လာခဲ့ရာ မြို့နယ်အလိုက် နောက်ဖေးလမ်းကြားပေါင်း (၆၂၇)လမ်း နဲ့အမှိုက်တန်ချိန်ပေါင်း တစ်သောင်း သုံးထောင်ကျော် သိမ်းဆည်းရရှိခဲ့တယ်လို့သိရပါတယ်။

 

 

Related News