တစ်နိုင် - တစ်ပိုင်ယာဉ် ရောင်းဝယ်ရေးအကျိုးဆောင်များအတွက် တရားဝင်ဥပဒေပြဌာန်းပေးပြီး လုပ်ပိုင်ခွင့်ပေးဖို့ ရန်ကုန်တိုင်းဒေသကြီးဝန်ကြီးချုပ်ထံ  အသနားခံစာတင်ထားတယ်လို့ ရောင်းဝယ်ရေးအကျိုးဆောင်များလူမှုရေးအသင်း၊ ရန်ကုန် (ASTADG)ကပြောပါတယ်။ ဒီအသနားခံစာကို ယာဉ်ရောင်းဝယ်ရေးအကျိုးဆောင်များ လူမှုရေးအသင်း(ရန်ကုန်)က ဦးဆောင်ပြီး သီရိမင်္ဂလာဈေးဟောင်းနဲ့ လှိုင်ယာဉ်ရောင်းဝယ်ရေးစခန်းတွေက အသင်းအဖွဲ့ဝင်မဟုတ်တဲ့ ဘယ်အသင်းအဖွဲ့မှာမှလည်း ပါဝင်ထားခြင်းမရှိတဲ့ တစ်နိုင်-တစ်ပိုင် ယာဉ်ရောင်းဝယ်ရေး အကျိုးဆောင်ဦးရေ(၂၀)ရဲ့ လက်မှတ်တွေနဲ့အတူ နိုဝင်ဘာလ(၃၀)ရက်ကပေးပို့ထားတယ်လို့ သိရပါတယ်။

ဒီအသနားခံစာမှာတော့ သင့်တင့်တဲ့ ရောင်း/၀ယ်ခွန်တရားဝင်ကောက်ခံတာ၊ လူတစ်ဦးချင်းစီအတွက် စနစ်တကျအရောင်းအ၀ယ် ပြုလုပ်နိုင်ဖို့ ရောင်းဝယ်ခွင့်မှတ်ပုံတင်ကဒ်ပြားတွေ စီစဉ်ဆောင်ရွက်ပေးစေဖို့ စတာတွေပါဝင်ပါတယ်။ ဒါ့အပြင် လူလတ်တန်းစား တစ်ပိုင်တစ်နိုင် ယာဉ်ရောင်းဝယ်ရေးစခန်းတွေကို တစ်စုတစ်စည်းတည်းမဟုတ်ဘဲ  သင့်တင့်လျောက်ပတ်တဲ့ ခရိုင်အလိုက် ယာဉ်ဝင်ခ၊ ရပ်နားခ၊ ညသိပ်ခွင့်တွေ ကောက်ခံဖို့၊ One Stop Service အနေနဲ့ ယာဉ်စစ်တာ၊ အခွန်ကောက်ခံတာ၊ အရောင်းအ၀ယ်တရားဝင်မှတ်ပုံတင်ပြုလုပ်တာ စတဲ့ကိစ္စအားလုံးကို တစ်နေရာတည်းမှာ ပြီးပြတ်အောင် စီစဉ်ဆောင်ရွက်ပေးစေဖို့ စတာတွေပါဝင်ပါတယ်။

သြဂုတ်လ(၂၄)ရက်ကပြုလုပ်တဲ့ ရန်ကုန်တိုင်းဒေသကြီးအစိုးရအဖွဲ့ရဲ့ဒုတိယတစ်နှစ်တာ ဆောင်ရွက်ချက်များ သတင်းစာရှင်းလင်းပွဲမှာ ရန်ကုန်တိုင်းဒေသကြီးဝန်ကြီးချုပ် ဦးဖြိုးမင်းသိန်းက ရန်ကုန်မြို့က ကားရောင်းဝယ်ရေးစနစ်တွေထဲမှာ  တစ်နိုင်တစ်ပိုင်ကားတင်သွင်းကာ ယာဉ်ရောင်းဝယ်ရေးစခန်းတွေသွားပြီး ရောင်းချနေတဲ့ကိစ္စကလည်း စိတ်ခေါ်မှုတစ်ခုအဖြစ်နဲ့ ရှိနေတယ်လို့ ၀န်ကြီးချုပ်ကပြောကြားထားပါတယ်။

ဥပဒေ၊ လုပ်ထုံးလုပ်နည်းအရ ကားသစ်တွေနဲ့ ပြည်ပကတင်သွင်းလာတဲ့ တစ်ပတ်ရစ်ကားတွေကို ကားအရောင်းစင်တာဖွင့်လှစ်ပြီး စနစ်တကျရောင်းချရမှာဖြစ်သလို တစ်နိုင်တစ်ပိုင် ကားစီးနိုင်ခွင့်ပေးလိုက်တာရယ်၊ တစ်ဦးချင်းပိုင်ကားတွေကို တင်သွင်းလာပြီး လမ်းဘေးမှာ ရောင်းချတာ၊ ဂျပန်တစ်ပတ်ရစ်ကားတွေကို တင်သွင်းပြီး ယာဉ်ရပ်နားစခန်းတွေမှာ တရားမ၀င်ရောင်းဝယ်နေတာတွေကို ကြုံတွေ့နေရတယ်လို့ ပြောကြားတာကြောင့် တစ်နိုင်တစ်ပိုင် ယာဉ်ရောင်းဝယ်ရေး လောကသားတွေ အနေနဲ့ ယခုလိုအသနားခံစာတင်သွင်းရတာဖြစ်တယ်လို့လည်း သိရပါတယ်။

 

 

Related News