မှန်ပေါ်မှာအခြေခံပြီး ဓါးကိုအသုးံပြုကာ ရေးဆွဲရတဲ့ မှန်ပန်းချီရေးဆွဲနည်းတွေကို မသန်စွမ်းသူတွေရဲ့ဘ၀ရပ်တည်မှုအတွက် မရမ်းကုန်းမြို့နယ် ကျိုက်ဝိုင်းမသန်စွမ်းသက်ကြီးသင်တန်းကျောင်းမှာ သင်ကြားပေးနေတယ်လို့ သိရပါတယ်။ ဦးဝင်းတင်ဟာ မှန်ပန်းချီရေးဆွဲရာမှာ ကျွမ်းကျင်သူတစ်ဦးဖြစ်ပါတယ်။ သူ့အနေနဲ့ ဒီမှန်ပန်းချီပညာရပ်ကို လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေးဝန်ကြီးဌာန၊လူမှုဝန်ထမ်းဦးစီးဌာန မသန်စွမ်းသက်ကြီး သင်တန်းကျောင်းမှာ တံဆိပ်ရိုက်ပညာကိုသင်ကြားပေးရင်းနဲ့ မှန်ပေါ်မှာတံဆိပ်ရိုက်လို့ရတယ်ဆိုတာကို သိရှိခဲ့ပါတယ်။ အဲဒီ့နောက် တီထွင်စမ်းသပ်ရင်းနဲ့ မှန်ပေါ်မှာပန်းချီဆွဲလို့ရတယ်ဆိုတာကို ထပ်မံသိရှိ ခဲ့ပါတယ်။ ဦးဝင်းတင်ပထမဦးဆုးံစမ်းသပ်ရေးဆွဲတာက လှည်းယာဉ်ပုံဖြစ်ပြီး သူကျွမ်းကျင်လာတဲ့အခါမှာ သင်တန်းသားတွေကို သင်ကြားပေး ခဲ့ပါတယ်။ ဒီပညာရပ်ဟာ ခြေထောက်မသန်တဲ့သူတွေအတွက် လက်တစ်ခုတည်းနဲ့ဖန်တီးလို့ရတဲ့ပညာရပ်ဖြစ်ပြီး အသက်မွေးဝမ်းကြောင်း အဖြစ် ရပ်တည်လို့ရတာကြောင့် အများကြီးအကျိုးရှိတဲ့ပညာရပ်ဖြစ်တယ်လို့ မှန်ပန်းချီရေးဆွဲသူဦးဝင်းတင်က ပြောပါတယ်။

မှန်ပန်းချီဆိုတာ ကြည့်မှန်ပေါ်မှာ ဓါးကိုအသုးံပြုပြီး ကိုယ်လိုချင်တဲ့ပန်းချီပုံစံရေးဆွဲရတဲ့ ပညာရပ်တစ်ခုဖြစ်ပါတယ်။ ဒီမှန်ပန်းချီမှာ အနည်းဆုးံ (၉)လက်မ(၁၂)လက်မကနေ အများဆုးံ(၂)ပေ(၃)ပေဆိုဒ်အထိရှိတယ်လို့သိရပါတယ်။ မှန်ပန်းချီမှာ အဓိကလူကြိုက်များတာက လှည်းယာဉ်ပုံ၊ ဇီးကွက်ပုံ ၊ကိန္နရီကိန္နရာပုံ စတဲ့ပုံတွေဖြစ်ပြီး ခရစ်စ္စမတ်၊ မင်္ဂလာဆောင်ရာသီတွေမှာ အများဆုးံမှာယူမှုတွေရှိနေပါတယ်။ မှန်ပန်းချီတစ်ချပ် ရေးဆွဲရာမှာတော့ အနည်းဆုးံတစ်နာရီကနေ တစ်ရက်ခန့်အထိကြာမြင့်တယ်လို့သိရပါတယ်။ ဒီမှန်ပန်းချီကို သင်ကြားသူ သင်တန်းသား (၇)ဦးခန့်ရှိပြီး သူတို့ရေးဆွဲထားတဲ့ပုံတွေကိုကြိုက်နှစ်သက်လို့မှာယူမှုတွေရှိနေတယ်လို့ လူမှုဝန်ထမ်းဦးစီးဌာန၊ မသန်စွမ်း သက်ကြီးသင်တန်း ကျောင်းကကျောင်းအုပ်ဦးကျော်ဇင်ဦးက ပြောပါတယ်။

မသန်စွမ်းသက်ကြီးသင်တန်းကျောင်:ကို (၁၉၅၄)ခုနှစ်၊ သြဂုတ်လ(၃၀)ရက်နေ့မှာ စတင်တည်ထောင်ခဲ့ပြီး မသန်စွမ်းသူတွေရဲ့ ဘ၀ဖွံ့ဖြိုး တိုးတက်ပြီး လူ့အသိုင်းအ၀ိုင်းမှာဂုဏ်သိက္ခာရှိရှိရပ်တည်နိုင်ဖို့အတွက် အသက်မွေးဝမ်းကြောင်းပညာရပ်တွေကို သင်ကြားပေးနေတာဖြစ်ပြီး လက်ရှိမှာတော့ မှန်ပန်းချီပညာရပ်အပြင် အီလက်ထရောနစ်သင်တန်း၊ တံဆိပ်ရိုက်သင်တန်း၊ စက်ချုပ်သင်တန်း၊ ဆံသသင်တန်း၊ ကွန်ပျူတာ သင်တန်း ဘုရားဆင်းတုတော်ထုလုပ်တဲ့ သင်တန်းတို့ကို သင်ကြားပေးနေတယ်လို့ သိရပါတယ်။  

 

 

Related News