ရန်ကုန်ပညာရေးတက္ကသိုလ် ကျောင်းသား၊ ကျောင်းသူတွေပါဝင်ဆင်နွှဲတဲ့ ပြည်ထောင်စုနေ့အကြို ထမနဲထိုးပြိုင်ပွဲကို ဖေဖော်ဝါရီလ ၈ ရက်မနက်ပိုင်းက ရန်ကုန်ပညာရေးတက္ကသိုလ်၊ လေ့ကျင်ရေးအထက်တန်းကျောင်းဘောလုံးကွင်းမှာ ပြုလုပ်ခဲ့ပါတယ်။

ရန်ကုန်ပညာရေးတက္ကသိုလ်ရဲ့ ပြည်ထောင်စုနေ့အကြို ထမနဲထိုးပြိုင်ပွဲမှာ အတန်းသာယာရေးကော်မတီအလိုက် ပထမနှစ်ကနေ ပဉ္စမနှစ်အတန်း ကျောင်းသား၊ကျောင်းသူတွေ၊ ဒီပလိုမာတက်ရောက်နေသူတွေအပြင် မဟာတန်းတက်ရောက်နေတဲ့ ဘွဲ့လွန်သင်တန်းသားတွေ ပါဝင်တဲ့ အသင်းဆယ်သင်း ဝင်ရောက် ယှဉ်ပြိုင်ခဲ့ကြပါတယ်။ အသင်းတစ်သင်းစီမှာ ပါဝင်ယှဉ်ပြိုင်သူ ၁၅ ဦး၊ ကြီးကြပ်သူဆရာမတစ်ဦး၊ ရေထိုင်ဆရာတစ်ဦးစီနဲ့ ထမနဲထိုးကြတာပဲဖြစ်ပါတယ်။ ယှဉ်ပြိုင်ပြီးတဲ့ ထမနဲတွေကိုတော့ ပါမောက္ခဌာနမှူးတွေပါဝင်တဲ့အကဲဖြတ်အဖွဲ့က စစ်ဆေးအကဲဖြတ်ပြီး အနံ့အရသာပြည့်စုံတဲ့ ထမနဲဆု၊ စည်းလုံးညီညွတ်ဆုတွေအပြင် အသင်းတွေအကုန်ဆုရရှိအောင် နှစ်သိမ့်ဆုတွေပါ ထည့်သွင်းပေးအပ်သွားမယ်လို့ သိရပါတယ်။

ထမနဲထိုးပြိုင်ပွဲကို ဝင်ရောက်ယှဉ်ပြိုင်ကြတဲ့ ကျောင်းသား၊ ကျောင်းသူတွေကတော့ အသင်းလိုက် လူစုအားပေးတာတွေ ဆောင်ရွက်ခဲ့ကြပြီး အကအလှတွေအပြင် သံချပ်အဖွဲ့တွေနဲ့ပါ ထမနဲထိုးတဲ့သူတွေ အားတက်အောင် ဝိုင်းဝန်းအားပေးခဲ့ကြပါတယ်။

ယခုပြုလုပ်တဲ့ ပြည်ထောင်စုနေ့အကြို ထမနဲထိုးပြိုင်ပွဲက ရှစ်ကြိမ်မြောက်ပြုလုပ်တာဖြစ်ပြီး ကျောင်းသား၊ကျောင်းသူ သုံးရာခန့်လာရောက်ခဲ့ကြပါတယ်။ ရန်ကုန်ပညာရေးတက္ကသိုလ်က ပြီးခဲ့တဲ့နှစ်ကစတင်ကာ မိမိတက္ကသိုလ်အစီအစဉ်နဲ့ ဝင်ခွင့်ခေါ်ခွင့်ရတဲ့ တက္ကသိုလ်(၁၁)ခုထဲမှာ ပါဝင်ခဲ့ပြီး အထကမြန်မာပြည်က ကျောင်းသူ၊ကျောင်းသားတွေပါ လာရောက်လျှောက်ထားခဲ့တယ်လို့သိရပါတယ်။ ဒါကြောင့် ဒီနှစ် ပြည်ထောင်စုနေ့အကြို ထမနဲထိုးပြိုင်ပွဲမှာ တိုင်းရင်းသား ကျောင်းသူ၊ကျောင်းသားပေါင်းစုံ ပါဝင်ဆင်နွှဲနိုင်ခဲ့တယ်လို့သိရပါတယ်။

 

 

Related News