ရန်ကုန်တိုင်းဒေသကြီးအတွင်း ဖြစ်ပွားခဲ့တဲ့မှုခင်းဖြစ်စဉ်တွေမှာ  အမှုကြီးတွေအဖြစ်(၁၀)မျိုးခွဲထားပါတယ်။ ပြီးခဲ့တဲ့ ဖေဖော်ဝါရီလက အမှုကြီး(၁၀)မျိုးအနက် လူသတ်မှုနဲ့မုဒိမ်းမှု(၂)မျိုးဖြစ်ပွားခဲ့တယ်လို့ ရန်ကုန်တိုင်းဒေသကြီး ရဲတပ်ဖွဲ့ကထုတ်ပြန်ထားတဲ့ မှုခင်းစာရင်းအရ သိရပါတယ်။အမှုကြီး(၁၀)မျိုးကတော့ လူသတ်မှု၊ ဓါးပြမှု၊ လုယက်မှု၊ ပြန်ပေးမှု၊ မုဒိမ်းမှု၊ ဖောက်ထွင်းမှု၊ တိရစ္ဆာန်ခိုးမှု၊ နိုင်ငံတော် ပုန်ကန်မှု၊ လက်နက်မှု၊ မတရားအသင်းတို့ ဖြစ်ပါတယ်။ ဒီအမှုကြီး(၁၀)မျိုးအနက် လူသတ်မှုက (၁၀)မှု၊ မုဒိမ်းမှုကအမှု(၂၀)ဖြစ်ပွားခဲ့ပြီး ကျန်အမှုကြီး(၈)မျိုးကတော့မဖြစ်ပွားခဲ့ဘူးလို့ သိရပါတယ်။ ပြီးခဲ့တဲ့ဇန်န၀ါရီလက အမှုကြီး(၁၀)မျိုးမှာ လူသတ်မှု၊ လုယက်မှု၊ မုဒိမ်းမှုနဲ့ တိရိစ္ဆာန်ခိုးမှုစတဲ့(၄)မျိုးဖြစ်ပွားခဲ့ကာ စုစုပေါင်းအမှု(၄၀)ရှိခဲ့တာဖြစ်ပြီး ဖေဖော်ဝါရီလမှာ အမှုကြီး(၁၀)မျိုးပေါင်းက (၁၀)မှုလျော့ကျခဲ့ပါတယ်။

မှုခင်းဖြစ်စဉ်ဖြစ်ပွားမှုတွေမှာအမှုကြီးနဲ့ အခြားအမှုတွေအဖြစ်အဆင့်(၂)ဆင့်ခွဲခြားထားတာဖြစ်ပါတယ်။ အခြားအမှုတွေကိုလည်း(၁၀)မျိုးထပ်မံခွဲခြားထားတာဖြစ်ပါတယ်။ အခြားအမှု(၁၀)မျိုးဖြစ်ပွားမှုတွေမှာလည်း  ပြီးခဲ့တဲ့ဇန်န၀ါရီလကထက် ဖေဖော်ဝါရီလမှာ အခြားအမှု(၁၀)မျိုးကလည်း  အမှုပေါင်း(၈၀)ကျော် လျော့ကျခဲ့တယ်လို့ ပါတယ်။ အခြားအမှု(၁၀)မျိုးမှာ ခိုးမှုအမျိုးမျိုးနဲ့ နာကျင်စေမှုတွေ၊ ကျန်အခြားအမှုတွေ ပါဝင်တာ ဖြစ်ပါတယ်။ ခိုးမှုအမျိုးမျိုးအဖြစ်(၇)မျိုးရှိပြီး ခိုးမှုအမျိုးမျိုးက အမှုပေါင်း(၇၀)ကျော်၊ နာကျင်စေမှု(၂)မျိုးပေါင်းက (၃၂၀)ကျော်၊ ကျန်အခြားအမှုတွေက(၇၅၀)ကျော် ဖြစ်ပွားခဲ့ပြီး အခြားအမှု(၁၀)မျိုးစုစုပေါင်းအမှု (၁၀၀၀)ကျော် ဖေဖော်ဝါရီလမှာ ဖြစ်ပွားခဲ့ပါတယ်။ရန်ကုန်တိုင်းဒေသကြီးအတွင်းမှာ အမှုကြီးနဲ့ အခြားအမှုစတဲ့ မှုခင်းဖြစ်စဉ်ဖြစ်ပွားမှုတွေ လျော့ကျရေးအတွက် ကြိုတင်ကာကွယ်ဖမ်းဆီးမှုတွေကို အရှိန်အဟုန်မြင့် ဖမ်းဆီးနေတယ်လို့လည်း သိရပါတယ်။

ပြီးခဲ့တဲ့ ဇန်န၀ါရီလကထက် ဖေဖော်ဝါရီလမှာ ကြိုတင်ကာကွယ်ဖမ်းဆီးမှုပေါင်း(၃၆၀၀)ကျော် ပိုမိုဖမ်းဆီးနိုင်ခဲ့တယ်လို့ သိရပါတယ်။ ကြိုတင်ကာကွယ်ဖမ်းဆီးမှုတွေအနေနဲ့ လက်နက်ပုန်း၊ လောင်းကစား၊ ပြည့်တန်ဆာ၊ ကျင့် ၅၄၊ ယစ်မျိုး၊ ရဲအက်၊ ခြေချုပ်၊ မှုယစ်ဆေးဝါး၊ ဆင်ဆာမဲ့ဗီဒီယို၊ မော်တော်ယာဉ်စတဲ့ အမှုတွေဖြစ်ပြီး ဒီကြိုတင်ကာကွယ်ဖမ်းဆီးမှု(၁၀)မျိုးပေါင်းကို အမှုပေါင်း(၈၀၀၀)ကျော်ထိ ဖေဖော်ဝါရီလအတွင်းဖမ်းဆီးခဲ့တယ်လို့ ရန်ကုန်တိုင်းဒေသကြီးရဲတပ်ဖွဲ့က ထုတ်ပြန်ထားတဲ့ မှုခင်းစာရင်းအရ သိရပါတယ်။

 

 

Related News