ယခုနှစ်မဟာသင်္ကြန်အတွက် ရန်ကုန်တိုင်းအတွင်း ဖျော်ဖြေရေးနှင့်ရေကစားမဏ္ဍပ်ဆောက်လုပ်သူတွေ အနေနဲ့ ယခင်နှစ်စည်းကမ်းချက်(၄၆)ချက်အတိုင်း လိုက်နာဆောင်ရွက်ရမှာ ဖြစ်တယ်လို့ သိရပါတယ်။ရန်ကုန်သင်္ကြန်မှာတော့ မနှစ်ကလိုပဲ စီးပွားဖြစ်မဏ္ဍပ်တွေခွင့်ပြုမှာ မဟုတ်သလို မဏ္ဍပ်အမည်တွေကို လည်းမြန်မာအမည်သာပေးရမှာဖြစ်ပါတယ်။အလုံပိတ်အခန်းများဆောက်လုပ်ခွင့်မရှိသလို နိုင်ငံတော် တည်ငြိမ်အေးချမ်းရေးနဲ့ ရိုးရာယဉ်ကျေးမှုကို ထိခိုက်စေတဲ့ အပြောအဆို၊၀တ်စားဆင်ယင်မှုတွေရှိလာပါက (၂)နှစ် မဏ္ဍပ် ဆောက်လုပ်ခွင့်ပိတ်ခံရမှာဖြစ်ပါတယ်။မဏ္ဍပ်အကြီးကို ပေ ၁၂၀ ကနေ ပေ ၁၅၀အထိ နဲ့ မဏ္ဍပ်အလတ်ကို ပေ ၅၀ ကနေ ပေ ၁၂၀ အထိ သတ်မှတ်ထားပါတယ်။ သတ်မှတ်အရွယ်အစားထက် ကျော်လွန်ဆောက်လုပ်ပါက တစ်ပေကို ကျပ်(၁၀)သိန်းဒဏ်ကြေးငွေပေးဆောင်ရမှာဖြစ်ပါတယ်။

မဏ္ဍပ်တွေကိုတော့ သင်္ကြန်မတိုင်ခင် (၃) ရက်အလိုမှာအပြီး တည်ဆောက်ရမှာဖြစ်ပြီး သင်္ကြန်အပြီး (၅)ရက်အတွင်းမှာလည်း အပြီးပြန်လည်ဖျက်သိမ်းရမှာဖြစ်ပါတယ်။ နောက်ကျရင်တော့ တစ်ရက်ကို (၅)သိန်းနှုန်းနဲ့ ဒဏ်ကြေးပေးဆောင်ရမှာဖြစ်ပါ တယ်။သင်္ကြန်မဏ္ဍပ်ဆောက်လုပ်ခွင့်တွေကိုတော့ မတ်လ(၃)ရက်ကနေ (၂၅)ရက်အထိ လျှောက်ထားနိုင်ပြီး စပေါ်ငွေအဖြစ် မဏ္ဍပ်အကြီးဖြစ်ပါက ကျပ်သိန်း(၂၀၀)နဲ့မဏ္ဍပ်အသေးက ကျပ်သိန်း(၁၀၀)သွင်း ရမှာဖြစ်ပါတယ်။ ဆောက်လုပ်ခွင့်ကို ဌားရမ်းလွှဲပြောင်းပါက ဒဏ်ကြေးအဖြစ် မဏ္ဍပ်အကြီးအတွက် ကျပ်သိန်း(၅၀)နဲ့မဏ္ဍပ်အသေးကို ကျပ်သိန်း(၃၀)ပေးဆောင်ရမှာဖြစ်ပါတယ်။မဏ္ဍပ်တွေမှာ စီးကရက်၊အရက်၊ဘီယာနဲ့ပတ်သက်တဲ့ကြော်ငြာတွေကိုခွင့်ပြုမှာမဟုတ်သလို ကျန်တဲ့ မဏ္ဍပ်တည်ဆောက်ရေးအပိုင်းနဲ့လုံခြုံရေးအပိုင်းကလည်း မနှစ်ကသတ်မှတ်ချက်တွေအတိုင်းဖြစ်တယ်လို့သိရပါတယ်။

ရန်ကုန်သင်္ကြန်အတွက် ရေကိုတော့  အင်လျားကန်၊ ကန်တော်ကြီးနဲ့ ရန်ကုန်မြို့တော်စည်ပင်သာယာ ရေးကော်မတီရဲ့ လှော်ကား၊ဂျိုးဖြူစတဲ့ ရေပေးဝေရေးလမ်းကြောင်းတွေကနေ အသုံးပြုရမှာဖြစ်ပြီး နှစ်စဉ် သင်္ကြန်လေးရက်အတွက် ရေဂါလန်(၁၃)သန်းကျော်အသုံးပြုနေတယ်လို့သိရပါတယ်။အခုနှစ်ရန်ကုန်မှာတော့ အဓိက မဏ္ဍပ်အကြီး၊နဲ့အလတ်တွေကို နေရာ(၃၅)ခုမှာ ခွင့်ပြုမှာဖြစ်ပြီး လမ်းလျှောက်သင်္ကြန်(၆)နေရာရှိမှာဖြစ်ပါတယ်။ ပြီးခဲ့နှစ်ကတော့ ရန်ကုန်မှာ မဏ္ဍပ်အကြီးနဲ့ အလတ် စုစုပေါင်း (၃၁)နေရာ မှာခွင့်ပြုခဲ့ပေမယ့် (၁၆)နေရာမှာသာ မဏ္ဍပ် ဆောက်လုပ်မှုရှိခဲ့ပြီး ဌာနဆိုင်ရာ မဏ္ဍပ်၊ မြို့နယ်မဏ္ဍပ်တွေအပါအ၀င် မဏ္ဍပ်အသေးကတော့ (၈၃)ခုနဲ့ လမ်းလျှောက်သင်္ကြန် (၄)နေရာ ရှိခဲ့ပါတယ်။

 

 

Related News