တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA)လက်မှတ်မရေးထိုးရသေးတဲ့မြောက်ပိုင်း တိုင်းရင်းသား လက်နက်ကိုင်(၇)ဖွဲ့နဲ့ကရင်နီအမျိုးသားတိုးတက်ရေးပါတီ(KNPP)တို့ကို နေပြည်တော်မှာ ငြိမ်းချမ်းရေးဆိုင်ရာ တွေ့ဆုံဆွေးနွေးမှုတွေဆောင်ရွက်ဖို့ အစိုးရဘက်က ဖိတ်ကြားလိုက်ပါတယ်။

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဥက္ကဋ္ဌအဖြစ်တာဝန်ယူထားတဲ့ အမျိုးသား ပြန်လည်သင့်မြတ် ရေးနှင့် ငြိမ်းချမ်းရေးဗဟိုဌာန (NRPC) က ဖိတ်ကြားလိုက်တာဖြစ်ပါတယ်။ ရှေ့ဆောင်ရွက်မည့် ငြိမ်းချမ်းရေးလုပ်ငန်း စဉ်တွေနဲ့ ပတ်သက်ပြီး ဆွေးနွေးဖို့ဖြစ်တယ်လို့ NRPC ရဲ့ဖိတ်ကြားချက်မှာ ဖော်ပြထားပါတယ်။

ဆွေးနွေးပွဲကိုတော့ မတ်လ(၂၁)ရက်နေပြည်တော်မှာရှိတဲ့ အမျိုးသားပြန်လည်သင့်မြတ်ရေးနှင့်ငြိမ်းချမ်း ရေးဗဟိုဌာန (NRPC)မှာ ပြုလုပ်မှာဖြစ်ပြီး ဖိတ်ကြားခံရတဲ့တိုင်းရင်းသားလက်နက်ကိုင် အဖွဲ့တစ်ဖွဲ့ကို ခေါင်းဆောင်တစ်ဦး ၊ကိုယ်စား လှယ်တစ်ဦး စုစုပေါင်း နှစ်ဦးနှုန်းနဲ့ဖိတ်ကြားခဲ့တာဖြစ်ပါတယ်။

တပ်မတော်အနေနဲ့NCA မထိုးရသေးတဲ့အဖွဲ့တွေ ငြိမ်းချမ်းရေးဆိုင်ရာ ဆွေးနွေးမှုတွေဆောင်ရွက်နိုင်ဖို့ ပြီးခဲ့တဲ့ (၂၀၁၈)ခုနှစ် ဒီဇင်ဘာ(၂၁)ရက်ကစပြီး တိုင်းစစ်ဌာနချုပ်နယ်မြေငါးခုမှာ လေးလကြာစစ်ရေးဆိုင်ရာ လှုပ်ရှားမှု အားလုံးကို ရပ်ဆိုင်းထားခဲ့တာဖြစ်ပါတယ်။

ဒီထုတ်ပြန်ချက်အတိုင်း အခု NRPC နဲ့တွေ့ဆုံပြီးရင် တပ်မတော်ညှိနှိုင်းဆွေးနွေးရေးအဖွဲ့ကလည်း တစ်ဖွဲ့ချင်းစီနဲ့ မတ်လ(၂၂)ရက်မှာ တွေ့ဆုံဆွေးနွေးမှာဖြစ်တယ်လို့သိရပါတယ်။ နေပြည်တော်မှာ ပြုလုပ်မယ့် မတ်လ(၂၁)ရက် ဆွေးနွေးပွဲကို မြောက်ပိုင်းတိုင်းရင်းသားလက်နက်ကိုင်အဖွဲ့တွေအ နေနဲ့တက်ရောက်မှာဖြစ်တယ်လို့ သိရပါတယ်။

တပ်မတော်ရဲ့လေးလကြာအပစ်ရပ်ကာလကတော့ လာမယ့်ဧပြီလ(၃၀)ရက်မှာ ကုန်ဆုံးမှာဖြစ်ပါတယ်။ လက်ရှိနှစ်လကျော်ကာလအတွင်းမှာတော့ NCAလက်မှတ်မထိုးရသေးတဲ့အဖွဲ့တွေထဲက ငြိမ်းချမ်းရေးအတွက် အစိုးရ၊ တပ်မတော်နဲ့ တရားဝင်တွေ့ဆုံဆွေးနွေးမှုအဖြစ် SSPP တစ်ဖွဲ့သာရှိသေးပြီး KNPP အဖွဲ့ကတော့ မတ်လ(၁၈)ရက်မှာ အစိုးရ၊မတ်လ(၁၉)ရက်မှာ တပ်မတော်ညှိနှိုင်းရေးအဖွဲ့နဲ့တွေ့ဆုံဖို့ရှိတယ်လို့ သိရပါတယ်။

 

 

Related News