ယခုနှစ် ငါးမဖမ်းရရာသီမှာ ကမ်းဝေးငါးဖမ်းရေယာဉ်တွေထွက်ခွင့်ကို သုညရာခိုင်နှုန်းအထိ လျှော့ချပစ်မှာ ဖြစ်တယ်လို့ ငါးလုပ်ငန်းဦးစီးဌာနမှ သိရပါတယ်။ငါးသယံဇာတ ထိန်းသိမ်းတဲ့အနေနဲ့ မြန်မာ့ ပင်လယ်ရေပြင်မှာ ငါးမဖမ်းရ ရာသီနဲ့ ငါးမဖမ်းရ ဧရိယာတွေ နှစ်စဉ် သတ်မှတ်နေကျဖြစ်ပါတယ်။ ငါးမဖမ်းရ ရာသီသတ်မှတ်တာကိုတော့ ပြီးခဲ့တဲ့ ငါးနှစ်ကတည်းက စတင်ဆောင်ရွက်ခဲ့တာဖြစ်ပြီး ငါး၊ပုစွန်သားပေါက်ဖွားရာသီချိန်ဖြစ်တဲ့ မေလကနေ သြဂုတ်လအထိ သတ်မှတ်လေ့ရှိပါတယ်။ ဒီနှစ် ငါးမဖမ်းရာသီသတ်မှတ်ရင်တော့ ငါးမဖမ်းရ ဧရိယာတွေထဲမှာ ငါးဖမ်းခွင့် လုံးဝခွင့်ပြုမှာ မဟုတ်ပဲ သုညရာခိုင်နှုန်းအထိ လျှော့ချပစ်ဖို့အစီအစဉ်ရှိတယ်လို့သိရပါတယ်။

ယခင်နှစ်ကတော့ ငါးမဖမ်းရရာသီအတွင်းကမ်းဝေးငါးဖမ်းလုပ်ငန်းလုပ်ကိုင်နေတဲ့ ရေယာဉ်တွေထဲက (၂၀) ရာခိုင်နှုန်းကို ငါးဖမ်းထွက်ခွင့်ပြုခဲ့တာတွေရှိပါတယ်။ ပင်လယ်ငါးဖမ်းလုပ်ငန်းရှင်တွေက လုပ်ငန်းလည်ပတ်မှု ရပ်ဆိုင်းလိုက်ရင် အလုပ်လက်မဲ့ ဖြစ်သွားနိုင်တဲ့ ရေလုပ်သားတွေ၊ စက်ရုံ၊ အလုပ်ရုံတွေ ရှိနေတာကြောင့် ငါးဖမ်းခွင့်ပြုပေးရန် ငါးလုပ်ငန်းဦးစီးဌာနကို စာတင် တောင်းဆိုခဲ့မှုကြောင့် ငါးဖမ်းရေယာဉ်တွေရဲ့ (၂၀) ရာခိုင်နှုန်းကို ဖမ်းဆီးခွင့်ပြုခဲ့တာဖြစ်ပါတယ်။ 

ငါး၊ ပုစွန်သားပေါက်ဖွားရာသီချိန်တွေမှာ ငါးဖမ်းတာကိုရပ်ထားမှ ငါးသယံဇာတကို ထိန်းသိမ်းရာရောက်ပြီး ငါး၊ပုစွန်မျိုးပွားလာဖို့ အထောက်အကူပြုနိုင်မှာဖြစ်ပါတယ်။ ဒါကြောင့် ယခုနှစ်မှာတော့ ကမ်းဝေးရေယာဉ်ငါးဖမ်းထွက်ခွင့်ကို ဌာနဆိုင်ရာတာဝန်ရှိသူတွေ၊ ပင်လယ်ငါးဖမ်းလုပ်ငန်းရှင်တွေနဲ့ ဆွေးနွေးပြီးရင် ရာနှုန်းပြည့်ပိတ်ပင်ဖွယ်ရှိနေပါတယ်။

 

 

Related News