ပြောင်းရွှေ့လိုက်ရတဲ့ သတင်းစာဆရာကြီး ဟံသာဝတီဦးဝင်းတင် နောက်ဆုံးနေထိုင်ခဲ့တဲ့ နေအိမ်အတိုင်း ပုံစံတူဆောက်လုပ်ကာ ဆရာကြီး နောက်ဆုံးကျန်ရှိခဲ့တဲ့ အသုံးအဆောင်တွေကို စုပြီး နေအိမ်ပြတိုက် အဖြစ်ထားရှိလိုက်ပြီဖြစ်ပါတယ်။ရန်ကုန်မြို့ ရန်ကင်းမြို့နယ် ကျောက်ကုန်းက ခြံနံပါတ်(၁၀) ဒီနေအိမ်လေးဟာ သတင်းစာဆရာ စာရေးဆရာကြီး ဟံသာဝတီဦးဝင်းတင် နောက်ဆုံးခေါင်းချခဲ့တဲ့နေရာဖြစ်ပါတယ်။ ဟံသာဝတီဦးဝင်းတင်ဟာ လူ့အခွင့် အရေးနဲ့ဒီမိုကရေစီအရေးဆောင်ရွက်ရင်း နှစ်ပေါင်း(၂၀)၀န်းကျင် ထောင်ချခံခဲ့ရသူတစ်ဦး ဖြစ်ပါ တယ်။၂၀၀၈ခုနှစ် စက်တင်ဘာမှာ ထောင်ကပြန်လည်လွတ်မြောက်လာပြီးနောက် သူ့မိတ်ဆွေရဲ့ အခုဒီနေအိမ်မှာ ကွယ်လွန်ချိန် အထိ နေထိုင်ခဲ့တာဖြစ်ပါတယ်။ဆရာကြီးကွယ်လွန်ပြီးနောက် ဒီခြံကိုလည်း ရောင်းလိုက်တာကြောင့် ဒီအိမ်မှာရှိတဲ့ ဟံသာဝတီ ဦးဝင်းတင်ရဲ့ အမှတ်တရအသုံးအဆောင်တွေနဲ့ နေအိမ်ကို ရွှေ့ပြောင်းထားခဲ့ရတာဖြစ်ပါတယ်။

အခုတော့ ဟံသာဝတီဦးဝင်းတင်အတွက် အမှတ်တရအဖြစ် သူနောက်ဆုံးနေအိမ်ခဲ့တဲ့ နေအိမ်အတိုင်း ပြန်လည်တည်ဆောက်ပြီး ဆရာကြီးနောက်ဆုံးကျန်ရှိခဲ့တဲ့ အသုံးအဆောင်ပစ္စည်းတွေကိုလည်း ပုံစံမပျက် ထိန်းသိမ်းထားပြီဖြစ်ပါတယ်။ဒီအမှတ်တရနေအိမ်ကိုတော့ ရန်ကုန်မြို့ ဒဂုံမြို့သစ်အရှေ့ပိုင်းမြို့နယ်မှာရှိတဲ့ NLD AIDS Center ၀င်း အတွင်း မှာ ဆောက်လုပ်ထားတာဖြစ်ပြီး ဆရာကြီးကွယ်လွန်တဲ့ (၅)နှစ်ပြည့်နေ့ဖြစ်တဲ့ ဧပြီလ(၂၁)ရက် မှာ ဖွင့်လှစ် လိုက်တာဖြစ်ပါတယ်။နောက်ပိုင်းမှာ ပြည်သူတွေလာရောက်ကြည့်ရှုနိုင်ဖို့ စီစဉ်ထားတယ်လို့သိရပါတယ်။ဟံသာဝတီ သတင်းစာရဲ့အယ်ဒီတာချုပ် ဖြစ်တဲ့ဆရာကြီးဟာ ဧပြီလ(၂၁)ရက်မှာကွယ်လွန်ခဲ့ တာဖြစ်ပြီး ကွယ်လွန်ချိန်မှာ အသက်(၈၅)နှစ်ရှိပြီဖြစ်ပါတယ်။ မကွယ်လွန်ခင် ဟံသာဝတီဖောင်ဒေးရှင်းကို တည်ထောင်ခဲ့ပြီး နိုင်ငံရေးအကျဉ်းသား တွေနဲ့သူတို့ရဲ့ မိသားစုဝင်တွေအတွက် ထောက်ပံ့မှု တွေပြုလုပ်ပေးခဲ့ပါတယ်။

 

 

Related News