မြန်မာနိုင်ငံအထက်ပိုင်းရှိ ပညာရေးဆိုင်ရာ အဖွဲ့အစည်း (၁၄၀)ဝန်းကျင်အတွက် စာအုပ်ပေါင်း(၆၀၀၀)ကျော်ကို  မေလ(၁၀) ရက်က မန္တလေးမြို့ ဂျက်ဖာဆန်စင်တာမှာ လှူဒါန်းခဲ့ပါတယ်။

မြန်မာနိုင်ငံအထက်ပိုင်းရှိ ပညာရေးဆိုင်ရာအဖွဲ့အစည်း (၁၄၀) ဝန်းကျင်အတွက် အမေရိကန်သံရုံးနဲ့ အာရှဖောင်ဒေးရှင်းတို့ ပူးပေါင်းပြီး စာအုပ်ပေါင်း (၆၀၀၀)ကျော် လှူဒါန်းတာ ဖြစ်ပါတယ်။ အမေရိကန်သံရုံးနဲ့ အာရှဖောင်ဒေးရှင်းတို့ဟာ တက္ကသိုလ်တွေ၊ လူမှုအဖွဲ့အစည်းတွေ၊ အစိုးရကျောင်းတွေ၊ အစိုးရအေဂျင်စီစာကြည့်တိုက်တွေ အပါအဝင် နိုင်ငံတစ်ဝှမ်း ပညာရေးဆိုင်ရာ အဖွဲ့အစည်းတွေအတွက် စာအုပ်လှူဒါန်းလာတာ(၁၂)နှစ် ရှိပြီဖြစ်တယ်လို့ သိရပါတယ်။

အခုလိုလှူဒါန်းတာဟာ အသိပညာပြည့်ဝတဲ့ လူ့အဖွဲ့အစည်းနဲ့ လုပ်သားအင်အားတစ်စုကို အကျိုးပြုနိုင်တဲ့ အသိပညာနဲ့ စွမ်းရည်အတွက် ပြည်သူလူထုကို ပညာရေးဆိုင်ရာ အရင်းအမြစ်တွေ ရရှိစေဖို့၊ ခေတ်မီသတင်းအချက်အလက်တွေ ရရှိစေဖို့ ရည်ရွယ်ပြီး လှူဒါန်းတာဖြစ်တယ်လို့ အာရှဖောင်ဒေးရှင်း တာဝန်ရှိသူက ပြောပါတယ်။

အခုပြုလုပ်ခဲ့တဲ့ စာအုပ်လှူဒါန်းပွဲမှာ အင်္ဂလိပ်ဘာသာနဲ့ ထုတ်ဝေထားတဲ့ ဆေးပညာဆိုင်ရာစာအုပ်၊ IT နည်းပညာစာအုပ်၊ နိုင်ငံရေးသိပ္ပံ၊ လူမှုရေးသိပ္ပံနဲ့ပတ်သက်တဲ့ အဆင့်မြင့်နည်းပညာဆိုင်ရာ အရည်အသွေးမြင့်စာအုပ်တွေနဲ့ ကလေးစာအုပ်တွေ အပါအဝင် ဘာသာရပ်မျိုးစုံ၊ စာအုပ်မျိုးစုံလှူဒါန်းခဲ့တာဖြစ်ပြီး မန္တလေးတိုင်းဒေသကြီး၊ မကွေးတိုင်းဒေသကြီး၊ စစ်ကိုင်းတိုင်းဒေသကြီး၊ နေပြည်တော်ပြည်ထောင်စုနယ်မြေ၊ ချင်းပြည်နယ်၊ ကယားပြည်နယ်၊ ရှမ်းပြည်နယ်အတွင်းရှိ လွှတ်တော်စာကြည့်တိုက်တွေ၊ တက္ကသိုလ်စာကြည့်တိုက်တွေ၊ ဘုန်းတော်ကြီးသင်ပညာရေးကျောင်း စာကြည့်တိုက်တွေနဲ့ ပညာရေးဆိုင်ရာအဖွဲ့အစည်းတွေကိုလှူဒါန်းခဲ့တာ ဖြစ်ပါတယ်။ အခုလို အရည်အသွေးမြင့် စာအုပ်တွေ လှူဒါန်းပေးတဲ့အတွက် တက္ကသိုလ်ရှိကျောင်းသား၊ ကျောင်းသူတွေ ပညာရေးကဏ္ဍတိုးတက်ရေးအတွက် လေ့လာရာမှာ အထောက်အကူရရှိစေမှာ ဖြစ်တယ်လို့ မုံရွာတက္ကသိုလ် ဒုတိယပါမောက္ခချုပ် ဒေါက်တာသက်နိုင်ဦးက ပြောပါတယ်။

အမေရိကန်သံရုံးနဲ့ အာရှဖောင်ဒေးရှင်းတို့ဟာ ပြီးခဲ့တဲ့ ဧပြီလအတွင်းက မြန်မာနိုင်ငံအောက်ပိုင်းရှိ အဖွဲ့အစည်းပေါင်း(၁၃၁)ခုအတွက် စာအုပ်ပေါင်း (၉၀၀၀)ကျော် လှူဒါန်းခဲ့ပြီး ဖြစ်တယ်လို့ သိရပါတယ်။

 

Related News