အချက်အလက်တွေအရ ယနေ့ရန်ကုန်တိုင်းဒေသကြီးဟာ အကောင်းဆုံးရင်းနှီးမြှုပ်နှံနိုင်မယ့် နေရာဆိုတာ သက်သေ တည်လျက်ရှိတယ်လို့ ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးသောင်းထွန်းက ပြောပါတယ်။ မေလ(၁၀)ရက်ကနေ(၁၁)ရက်အထိ ပြုလုပ်ခဲ့တဲ့ ရန်ကုန်တိုင်းရင်းနှီးမြှုပ်နှံမှုဖိုရမ်မှာ ပြောကြားခဲ့တာ ဖြစ်ပါတယ်။ရန်ကုန်ဟာ နိုင်ငံ့ဂျီဒီပီရဲ့ (၂၄)ရာခိုင်နှုန်းကို ကိုယ်စားပြုနေပြီး နှစ်စဉ်(၉.၂)ရာခိုင်နှုန်းတိုးတက်နေကာ နိုင်ငံ့ဂျီဒီပီ တိုးတက်မှု ရဲ့ အဓိကမောင်းနှင်သူဖြစ်တယ်လိ်ု့ ဦးသောင်းထွန်းက ပြောပါတယ်။ မြန်မာနိုင်ငံရဲ့ အဓိကဘဏ်များ အားလုံးတည်ရှိရာ နေရာဖြစ်သလို ရန်ကုန်စတော့အိတ်ချိန်းလည်းရှိတဲ့ ဘဏ္ဍာရေးဗဟိုဌာနလည်းဖြစ်တယ်လို့ ပြောပါတယ်။အကြီးဆုံးလေကြောင်းဆက်သွယ်ရေး၊ မီးရထားနဲ့ ပင်လယ်ဆိပ်ကမ်းတွေရှိတဲ့အပြင် မြန်မာနိုင်ငံရဲ့ သွင်းကုန်တွေအတွက် အဓိက၀င်ပေါက်ဖြစ်ကာ နိုင်ငံ့ကုန်သွယ်မှုရဲ့(၈၅)ရာခိုင်နှုန်းနီးပါး ရှိနေပါတယ်။

စက်မှုဇုန်(၂၉)ခုနဲ့သီလ၀ါအထူးစီးပွားရေး ဇုန်လည်းရှိနေတာကြောင့် ရင်းနှီးမြှုပ်နှံမှုတွေအတွက် ၀န်းကျင်ကောင်းတစ်ခု ဖြစ်ကြောင်း ပြည်ထောင်စုဝန်ကြီး ဦးသောင်းထွန်းက ရင်းနှီးမြှုပ်နှံသူတွေထံ သတင်းပေးခဲ့ပါတယ်။ရန်ကုန်တိုင်းဒေသကြီးကို ရင်းနှီးမြှုပ်နှံမှုတွေ ပိုမိုဝင်ရောက်လာဖို့ အခုဖိုရမ်ကိုပြုလုပ်တာဖြစ်ကာဖိုရမ်ကို ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ပြည်ထောင်စုဝန်ကြီး ဦးသောင်းထွန်း၊ ရန်ကုန်တိုင်းဒေသကြီးဝန်ကြီးချုပ်၊ ပဲခူးတိုင်းဒေသကြီးဝန်ကြီးချုပ်နဲ့ စီးပွားရေးနယ်ပယ်ကာ တာဝန်ရှိသူ(၁၂၀၀)ကျော် တက်ရောက်ခဲ့ပါတယ်။ပြည်တွင်းပြည်ပ စိန်ခေါ်မှုတွေရှိနေပေမယ့် မြန်မာနိုင်ငံရင်းနှီးမြှုပ်နှံမှုဝန်းကျင်အတွက် ပြုပြင်ပြောင်းလဲမှုများစွာ ဖော်ဆောင် ပေးနိုင်ခဲ့ပြီး ကုမ္ပဏီဥပဒေအသစ်ကျင့်သုံးတာအပါအ၀င် အင်တာနက်ကနေ ကုမ္ပဏီထောင်နိုင်တဲ့အထိ ဖြစ်နေပြီလို့ လုပ်ငန်းရှင်တွေကို အသိပေးခဲ့ပါတယ်။လက်ရှိ ၂၀၁၈-၂၀၁၉ ဘဏ္ဍာရေးနှစ်အတွက် ဧပြီလ (၂၆)ရက်အထိ မြန်မာနိုင်ငံကို နိုင်ငံခြား ရင်းနှီးမြှုပ်နှံမှု ပမာဏ အမေရိကန်ဒေါ်လာ(၂)ဘီလီယံခွဲကျော် ၀င်ရောက်ထားကာ ဒီထဲက တစ်ဝက်က ရန်ကုန်ကို ၀င်ရောက်ထားတာ ဖြစ်တယ်လို့ ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနထံက သိရပါတယ်။

 

 

Related News