အဂတိလိုက်စားမှုတိုက်ဖျက်ရေးကော်မရှင်၊ မန္တလေးရုံးခွဲကို မေလ(၁၁)ရက်က မန္တလေးမြို့၊ ကွင်းအမှတ်-၄၀၇၊ ဗာဂျီးနီးယား ဆေးလုပ်ငန်းစက်ရုံဝင်း၊ တမ္ပဝတီရပ်ကွက်၊ ချမ်းမြသာစည်မြို့နယ်မှာ ဖွင့်လှစ်ခဲ့ပါတယ်။ အဂတိလိုက်စားမှုကော်မရှင်ရုံးကို နေပြည်တော်နဲ့ရန်ကုန်မြို့တွေမှာ ဖွင့်လှစ်ထားပြီး အခုမန္တလေးမြို့မှ တတိယမြောက်ရုံးခွဲအဖြစ် ဖွင့်လှစ်ခဲ့တာပါ။

ကော်မရှင်အနေနဲ့မန္တလေးရုံးခွဲကို ဗဟိုပြုပြီး မန္တလေးတိုင်းဒေသကြီးနဲ့ ဆက်စပ်နေတဲ့ တိုင်းဒေသကြီးနဲ့ ပြည်နယ်တွေမှာ အဂတိလိုက်စားမှုတိုက်ဖျက်ရေး၊ ပညာပေးရေး၊ တားဆီးကာကွယ်ရေးနဲ့ စုံစမ်းစစ်ဆေးရေးလုပ်ငန်းတွေကို ပိုမိုထိရောက်လျင်မြန်စွာ ဆောင်ရွက်နိုင်မယ့်အပြင် အစိုးရဌာန၊ စီးပွားရေးလုပ်ငန်း၊ အရပ်ဖက်အဖွဲ့အစည်းနဲ့ ဒေသခံပြည်သူ လူထုကို ပိုမိုနီးကပ်စွာဆက်ဆံဆွေးနွေးနိုင်စွမ်းရရှိနိုင်မယ်လို့ အဂတိလိုက်စားမှု တိုက်ဖျက်ရေးကော်မရှင်ဥက္ကဋ္ဌ ဦးအောင်ကြည်က အဖွင့်အမှာစကားမှာ ပြောကြားခဲ့ပါတယ်။

အဂလိုက်စားမှုတိုက်ဖျက်ရေးဟာ ဖွံ့ဖြိုးဆဲနိုင်ငံတွေ၊ အသွင်ကူးပြောင်းရေးကာလမှာ ရောက်ရှိနေတဲ့ နိုင်ငံတွေအတွက် အလွန်အရေးကြီးတဲ့ လုပ်ငန်းစဉ်တစ်ခုဖြစ်ပြီး နိုင်ငံဝန်ထမ်းတွေဟာကိုယ့်ရဲ့ လုပ်ပိုင်ခွင့်သြဇာကို တလွဲအသုံးမပြုဖို့နဲ့ ပြည်သူ့ဘဏ္ဍာအခွန်ငွေကို အလေအလွင့်မရှိအောင် ထိန်းသိမ်းဖို့ လိုအပ်တယ်လို့ မန္တလေးတိုင်းဒေသကြီးဝန်ကြီးချုပ် ဒေါက်တာဇော်မြင့်မောင်က ဖွင့်ပွဲအမှာစကားမှာ ပြောကြားပါတယ်။

အခုဖွင့်လှစ်လိုက်တဲ့ အဂတိလိုက်စားမှုတိုက်ဖျက်ရေးကော်မရှင်၊ မန္တလေးရုံးခွဲကိုလိပ်မူကာ တိုင်ကြားမှုတွေဆောင်ရွက်နိုင် ပြီးစုံစမ်းစစ်ဆေးမှုလွယ်ကူအောင် တိုင်းတန်းလိုတဲ့အချက်ကို အကြောင်းအရာမှန်ကန်ပြည့်စုံစွာ ပေါ်လွင်အောင် ဖော်ပြဖို့ လိုအပ်ပြီး မမှန်မကန်တိုင်ကြားမှုတွေအတွက် မိမိတိုင်ကြားစာအပေါ်တာဝန်ယူရမှာ ဖြစ်တယ်လို့ သိရပါတယ်။

အဂတိလိုက်စားမှုတိုက်ဖျက်ရေးကော်မရှင်၊ မန္တလေးရုံးခွဲဖွင့်ပွဲကိုတော့ မန္တလေးတိုင်းဒေသကြီးဝန်ကြီးချုပ် ဒေါက်တာဇော်မြင့်မောင်နဲ့ အစိုးရအဖွဲ့ဝင်ဝန်ကြီးတွေ၊ အဂတိလိုက်စားမှုတိုက်ဖျက်ရေးကော်မရှင်ဥက္ကဋ္ဌ ဦးအောင်ကြည်နှင့် တာဝန်ရှိသူတွေ၊ တိုင်းဒေသကြီးတရားလွှတ်တော်တရားသူကြီးချုပ်နှင့် တရားသူကြီးတွေ၊ ဌာနဆိုင်ရာတာဝန်ရှိသူတွေ၊ လွှတ်တော်ကိုယ်စားလှယ်တွေ၊ UNDP၊ UNODC နဲ့ ကုလသမဂ္ဂအဖွဲ့အစည်းမှ ကိုယ်စားလှယ်များ၊ မန္တလေးတိုင်းဒေသကြီး ကုန်သည်များနှင့် စက်မှုလက်မှုလုပ်ငန်းရှင်များအသင်း တာဝန်ရှိသူတွေ၊ INGO အဖွဲ့အစည်းတွေ၊ အရပ်ဖက် အဖွဲ့အစည်းတွေနဲ့ သတင်းမီဒီယာတွေ တက်ရောက်ခဲ့ကြပါတယ်။

 

 

Related News