ရန်ကုန်တိုင်းအစိုးရအနေနဲ့ တာဝန်ယူခဲ့တဲ့ သုံးနှစ်ကျော်ကာလအတွင်းမှာ သတင်းမီဒီယာတွေနဲ့ ပုံမှန်တွေ့ဆုံမှုတွေ မရှိခဲ့တာဟာ ကြီးမားတဲ့ လိုအပ်ချက်တစ်ခုဖြစ်ခဲ့တယ်လို့ ရန်ကုန်တိုင်းဒေသကြီးဝန်ကြီးချုပ်ဦးဖြိုးမင်းသိန်းက ပြောပါတယ်။ ဒါ့ကြောင့် နောက်ပိုင်းမှာ သတင်းမီဒီယာ တွေနဲ့ တစ်လကို နှစ်ကြိမ်လောက် တိုင်းအစိုးရအဖွဲ့ရုံးမှာ ပုံမှန်တွေ့ဆုံပွဲတွေ ပြုလုပ်သွားမယ်လို့ မေလ(၁၀)ရက်က ပြုလုပ်ခဲ့တဲ့ ရန်ကုန်တိုင်း ရင်းနှီးမြှုပ်နှံမှု ဖိုရမ်မှာ ပြောကြားခဲ့တာပါ။

မီဒီယာသမားတွေအနေနဲ့ ရန်ကုန်တိုင်းအစိုးရအဖွဲ့ထံ ဖုန်းဖြင့်ဆက်သွယ်မေးမြန်းရာမှာ ဖြေဆိုဖို့အခက်အခဲရှိတာကြောင့် သတင်းမီဒီယာ သမားတွေ သတင်းအချက်အလက်မေးမြန်းမှုလွယ်ကူစေဖို့ စီစဉ်တာဖြစ်တယ်လို့ ပြောပါတယ်။ လက်ရှိမှာရန်ကုန်တိုင်းအစိုးရနဲ့  သတင်း မီဒီယာတွေကြားမှာ ထိတွေ့မှုနည်းတာကြောင့် ရန်ကုန်တိုင်းနဲ့ ပတ်သက်တဲ့ သတင်းဖော်ပြမှုတွေကလည်း လိုအပ်ချက်ရှိခဲ့တယ်လို့ ရန်ကုန်တိုင်းဒေသကြီးဝန်ကြီးချုပ်က ပြောပါတယ်။

ဒါ့အပြင် ရန်ကုန်တိုင်းအစိုးရက မီဒီယာသမားတွေကို ဖမ်းဆီးတယ်ဆိုတဲ့ ပြောဆိုမှုတွေဟာ အစိုးရသက်တမ်းတစ်လျှောက် အတော်ဆိုးတဲ့ တွေ့ကြုံမှုတစ်ခုဖြစ်ခဲ့တယ်လို့ ၀န်ကြီးချုပ်ကပြောပါတယ်။ နိုင်ငံဖွံ့ဖြိုးရေးနဲ့ ပြုပြင်ပြောင်းလဲမှုတွေမှာ သတင်းမီဒီယာတွေဟာ အရေးကြီးတဲ့ အတွက် လက်တွဲပူးပေါင်း ဆောင်ရွက်လိုတယ်လို့ ဝန်ကြီးချုပ် ဦးဖြိုးမင်းသိန်းက ပြောပါတယ်။ဒါဟာရန်ကုန်တိုင်းဒေသကြီးအစိုးရအဖွဲ့ သက်တမ်းသုံးနှစ်အတွင်း ၀န်ကြီးချုပ်ရဲ့ ပထမဆုံးအကြိမ် မီဒီယာနဲ့ ပုံမှန်တွေ့ဆုံမှု ဖြစ်လာမှာ ဖြစ်ပါတယ်။ အရင်ကတော့ တိုင်းအစိုးရရဲ့လုပ်ဆောင်ချက်တွေအပေါ် ရှင်းလင်းမှုတွေနဲ့ ၀န်ကြီးချုပ်နဲ့ ပတ်သက်တဲ့ အကြာင်းအရာ တစ်ချို့ပေါ်မှာသာ မီဒီယာနဲ့ တွေ့ဆုံရှင်းလင်းမှုတွေရှိခဲ့တာ ဖြစ်ပါတယ်။ 

Related News