၂၀၁၉ ခုနှစ် အပြည်ပြည်ဆိုင်ရာ သူနာပြုများနေ့ ဂုဏ်ပြုအထိမ်းအမှတ်အခမ်းအနားကို မေလ(၁၂)ရက်က မန္တလေးမြို့၊ သူနာပြုနှင့် သားဖွားအသင်း၊ နိုက်တင်ဂေးလ်ခန်းမမှာ ပြုလုပ်ခဲ့ပါတယ်။ မေလ(၁၂)ရက်မှာ ကျရောက်ခဲ့တဲ့ အပြည်ပြည်ဆိုင်ရာသူနာပြုများနေ့နဲ့ မေလ(၅)ရက်မှာ ကျရောက်ခဲ့တဲ့ အပြည်ပြည်ဆိုင်ရာ သားဖွားဆရာမများနေ့ဂုဏ်ပြုအခမ်းအနားကို မန္တလေးတိုင်းဒေသကြီး၊ သူနာပြုနှင့်သားဖွားအသင်းက ဦးဆောင်ကျင်းပတာ ဖြစ်ပါတယ်။ အခုပြုလုပ်ခဲ့တဲ့ အခမ်းအနားဟာ သူနာပြု မိခင်ကြီး ဖလော့ရင့်(စ်) နိုင်တင်ဂေးမွေးနေ့ကို ဂုဏ်ပြုကျင်းပခဲ့တာပါ။ သူနာပြုသားဖွားအသင်းရဲ့ ရည်ရွယ်ချက်တွေနဲ့ ကျင့်ဝတ်သိက္ခာထိန်းသိမ်းပြီး သူနာပြုသားဖွားတရပ်လုံး အချင်းချင်း ရိုင်းပင်းကူညီဆောင်ရွက်သွားကြဖို့ရည်ရွယ်ပြီး ပြုလုပ်တာဖြစ်ပါတယ်။

မေလ (၁၂)ရက်မှာကျရောက်ခဲ့တဲ့  အပြည်ပြည်ဆိုင်ရာသူနာပြုများနေ့ဆောင်ပုဒ်ဖြစ်တဲ့"ပြည်သူအားလုံးကျန်းမာဖို့၊ သူနာပြုများ ဦးဆောင်စို့"ဖြစ်ပြီး အပြည်ပြည်ဆိုင်ရာသားဖွားဆရာမများနေ့ဆောင်ပုဒ်ဖြစ်တဲ့ "အမျိုးသမီးအခွင့်အရေး အလေးထား၊ ကာကွယ်သူများ ဒို့သားဖွား"ခေါင်းစဉ်နဲ့ ဟောပြောဆွေးနွေးခဲ့ကြပြီး သက်ပြည့်ပင်စင်ခံစားမယ့် အသင်းဝင်သူနာပြု၊ သားဖွားဆရာမကြီးတွေကို ဂုဏ်ပြုလက်ဆောင်ပေးအပ်ခြင်း၊ ဆေးရုံတက်ရောက်နေကုသနေရတဲ့ သူနာပြု၊ သားဖွားဆရာမ များအား ကျန်းမာရေးထောက်ပံ့ ပေးအပ်ခြင်းတွေကို ပြုလုပ်ခဲ့ပါတယ်။မန္တလေးမြို့မှာ ကျင်းပခဲ့တဲ့အပြည်ပြည်ဆိုင်ရာသူနာပြုများနေ့အခမ်းအနားကို မန္တလေးတိုင်းဒေသကြီးအစိုးရအဖွဲ့  စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီး ဦးစိုးသန်းနဲ့ ဌာနဆိုင်ရာတာဝန်ရှိသူတွေ၊ ဆရာဝန်ကြီးတွေ၊ သူနာပြု၊ သားဖွားဆရာမကြီးတွေနဲ့ ဆရာမတွေ တက်ရောက် ခဲ့ကြပါတယ်။ 

 

 

Related News