ကိတ်မုန့်၊ ကွတ်ကီး၊ ရိုးရာမုန့်များ တန်ဖိုးမြင့် စားသောက်ကုန် သရုပ်ပြဆွေးနွေးပွဲကို မေလ (၁၂) ရက်က စစ်ကိုင်းမြို့ စစ်ကိုင်းခရိုင်ကုန်သည်များနှင့် စက်မှုလက်မှုလုပ်ငန်းရှင်များအသင်းရုံးမှာ ပြုလုပ်ခဲ့ပါတယ်။ အခုပြုလုပ်ခဲ့တဲ့ တန်ဖိုးမြင့် စားသောက်ကုန် သရုပ်ပြဆွေးနွေးပွဲကို စစ်ကိုင်းခရိုင်ကုန်သည်များနှင့် စက်မှုလက်မှု လုပ်ငန်းရှင်များအသင်း(SDCCI)နဲ့ ရှမ်းမောမြေအစိမ်းရောင်နည်းပညာဖွံ့ဖြိုးရေးအဖွဲ့တို့ ပူးပေါင်းပြုလုပ်တာဖြစ်တယ်လို့ သိရပါတယ်။ ဒီသရုပ်ပြဆွေးနွေးပွဲကို စစ်ကိုင်းခရိုင်အတွင်းရှိ အသေးစား၊ အလတ်စားလုပ်ငန်းတွေလုပ်ကိုင်နေကြတဲ့ စီးပွားရေးလုပ်ငန်းရှင်တွေ ဖွံ့ဖြိုးတိုးတက်စေဖို့၊ တစ်နိုင်တစ်ပိုင်လုပ်ကိုင်နေကြတဲ့ မုန့်ဖုတ်လုပ်ငန်းတွေ အဆင့်မြှင့်တင်နိုင်စေဖို့၊ စီးပွားရေးနဲ့ ပတ်သက်တဲ့အသိပညာ၊ နည်းပညာတွေ ရရှိနိုင်စေဖို့ ပြုလုပ်ရတာဖြစ်တယ်လို့ သိရပါတယ်။ ဒါ့အပြင်ဆန်အခြေခံ၊ ပဲအခြေခံဆန်မှုန့်နဲ့ ပြုလုပ်တဲ့ ကိတ်မုန့်၊ ကွတ်ကီးနဲ့ မြန်မာ့ရိုးရာ မုန့်အမျိုးမျိုးပြုလုပ်နိုင်တဲ့ အိမ်တွင်းစီးပွားရေးတစ်ရပ် ပေါ်ပေါက်လာစေဖို့ ရည်ရွယ်ပြီး ပြုလုပ်ရတာ ဖြစ်တယ်လို့ SDCCI မှ တာဝန်ရှိသူတစ်ဦးက ပြောပါတယ်။

ဒီဆွေးနွေးပွဲမှာ ကိတ်မုန့်၊ ကွတ်ကီးအပါအဝင် မုန့်အမျိုးအမည်(၁၀) မျိုးဝန်းကျင်ကို တန်ဖိုးမြင့်စားသောက် ကုန်ထုတ်လုပ်နိုင်တဲ့အထိ သရုပ်ပြဆွေးနွေးပို့ချပေးသွားမယ်လို့ သိရပါတယ်။ ဒီဆွေးနွေးပွဲကိုတော့ စစ်ကိုင်းမြို့မှာရှိတဲ့ မုန့်ဖုတ်လုပ်ငန်း ဝါသနာပါသူတွေ၊ မုန့်ဖုတ်လုပ်ငန်းစီးပွားဖြစ်လုပ်ကိုင်နေသူတွေ တက်ရောက်ခဲ့ကြပြီး ကျွမ်းကျင်တဲ့ မုန့်ဖုတ်ပညာရှင်တွေက ဆန်အခြေခံ၊ ပဲအခြေခံ တန်ဖိုးမြင့်ထုတ်ကုန်ထုတ်လုပ်နည်း၊ ဂျုံအစားထိုးဆန်မှုန့် ပြုလုပ်တဲ့ချီဖွန်ကိတ်၊ ကိတ်လိပ်စတဲ့ မုန့်ဖုတ်နည်းပညာတွေကို ဆွေးနွေးပို့ချပေးသွားမယ်လို့ သိရပါတယ်။ စစ်ကိုင်းခရိုင်ကုန်သည်များနှင့်စက်မှုလက်မှုလုပ်ငန်းရှင်များအသင်း(SDCCI)နဲ့ ရှမ်းမောမြေအစိမ်းရောင်နည်းပညာ ဖွံ့ဖြိုးရေးအဖွဲ့အနေနဲ့ အခုပြုလုပ်ခဲ့တဲ့ တန်ဖိုးမြင့် စားသောက်ကုန် သရုပ်ပြဆွေးနွေးပွဲအပြင် စပါး၊ ပဲ၊ ဟင်းသီးဟင်းရွက်နှင့် သစ်သီးဝလံများ ဇီဝအခြေပြု အထွက်တိုးနည်းပညာ ဟောပြောဆွေးနွေးပွဲကိုလည်း ပြုလုပ်ပေးသွားမယ်လို့ သိရပါတယ်။


 

Related News