(၂၀၁၉)ခုနှစ် ဇန်န၀ါရီလမှ ဧပြီ အထိ (၄) လတာကာလအတွင်း ရန်ကုန်တိုင်းဒေသကြီးရဲ့မှုခင်းဖြစ်စဉ်ဖြစ်ပွားမှုမှာ အမှုကြီး(၁၀)မျိုးအနက် လူသတ်မှုက အများဆုံးဖြစ်ပွားနေပြီး လူသတ်မှုပေါင်း(၆၄)မှုရှိခဲ့တယ်လို့ ရန်ကုန်တိုင်းဒေသကြီး ရဲတပ်ဖွဲ့က ထုတ်ပြန်ပေးထားတဲ့ မှုခင်းစာရင်းအရ သိရပါတယ်။ ရန်ကုန်တိုင်းဒေသကြီးရဲတပ်ဖွဲ့က ထုတ်ပြန်ပေးထားတဲ့ မှုခင်းစာရင်းတွေအရ အမှုကြီး(၁၀)မျိုးကတော့ လူသတ်မှု၊ ဓါးပြမှု၊ လုယက်မှု၊ ပြန်ပေးမှု၊ မုဒိမ်းမှု၊ ဖောက်ထွင်းမှု၊ တိရစ္ဆာန်ခိုးမှု၊ သစ္စာဖောက်မှု၊ လက်နက်မှုနဲ့ မတရားအသင်းတို့ ဖြစ်ပါတယ်။ (၂၀၁၉)ခုနှစ် ရဲ့ (၄)လတာ ကာလအတွင်း လူသတ်မှုက (၆၄)မှု၊ လုယက်မှုက(၄)မှု၊ မုဒိမ်းမှုက (၅၇)မှု၊ တိရစ္ဆာန်ခိုးမှုက(၃)မှုဖြစ်ပွားခဲ့ပြီး စုစုပေါင်းအမှု(၁၂၈)မှု ဖြစ်ပွားခဲ့ပါတယ်။ အမှုကြီး(၁၀)မျိုးအနက် ဒီ(၄)မျိုးသာ ဖြစ်ပွားခဲ့ကာ ကျန်အမှုကြီး တွေကတော့ မဖြစ်ပွားခဲ့ဘူးလို့ သိရပါတယ်။ ဖြစ်ပွားခဲ့တဲ့ အမှုကြီးတွေအနက် လူသတ်မှုက အများဆုံးဖြစ်ပွားခဲ့တာဖြစ်ပြီး တစ်လကိုအနည်းဆုံး(၁၀)မှုနဲ့အထက် ဖြစ်ပွားနေတယ်လို့ ရန်ကုန်တိုင်းဒေသကြီးရဲတပ်ဖွဲ့က ထုတ်ပြန်ပေးထားတဲ့ မှုခင်းစာရင်းတွေအရ သိရပါတယ်။

မှုခင်းဖြစ်စဉ်ဖြစ်ပွားမှုတွေကို အမှုကြီး(၁၀)မျိုးနဲ့ အခြားအမှု(၁၀)မျိုးအဖြစ်ခွဲခြားထားတာဖြစ်ပြီး အခြားအမှုတွေမှာတော့ ခိုးမှုအမျိုးမျိုး၊ နာကျင်စေမှု(၂)မျိုးနဲ့ လိမ်လည်မှု၊ တစ်လင်တစ်မယားစနစ်နဲ့ အရေးယူမှုတွေပါဝင်တဲ့ ကျန်အခြားအမှုတွေ ပါဝင်ပါတယ်။  ဒီ(၄)လတာအတွင်း အခြားအမှုတွေမှာပါဝင်တဲ့ ခိုးမှု(၇)မျိုးပေါင်းက အမှုပေါင်း(၃၀၀)ကျော်၊ နာကျင်စေမှု (၂)မျိုးပေါင်းက အမှုပေါင်း(၁၄၀၀)နီးပါး၊ လိမ်လည်မှု၊ တစ်လင်တစ်မယားစနစ်နဲ့ အရေးယူမှုတွေပါဝင်တဲ့ ကျန်အခြားအမှုတွေက အမှုပေါင်း(၂၉၀၀)ကျော်ဖြစ်ပွားခဲ့ပါတယ်။ အခြားအမှုအားလုံးစုစုပေါင်း အမှုပေါင်း(၄၆၀၀)ကျော် ဖြစ်ပွားခဲ့တယ်လို့ သိရပါတယ်။

ဒီလိုမှုခင်းဖြစ်စဉ်တွေ လျော့ကျနိုင်ရေးအတွက် ကြိုတင်ကာကွယ်ဖမ်းဆီးမှုတွေကို လစဉ် အရှိန်အဟုန်မြှင့်ဖမ်းဆီး နေတယ်လို့ သိရပါတယ်။ ကြိုတင်ကာကွယ်ဖမ်းဆီးမှုတွေအနေနဲ့(၁၀)မျိုးရှိပြီး ဒီအမှုတွေကတော့ လက်နက်ပုန်း၊ လောင်းကစား၊ ပြည့်တန်ဆာ၊ ကျင့်(၅၄)၊ ယစ်မျိုး၊ ရဲအက်၊ ခြေချုပ်၊ မူးယစ်ဆေးဝါး၊ ဆင်ဆာမဲ့ဗီဒီယို၊ မော်တော်ယာဉ်စတာတွေဖြစ်ပါတယ်။ ပြီးခဲ့တဲ့(၄)လတာအတွင်း ကြိုတင်ကာကွယ်ဖမ်းဆီးမှု(၁၀)မျိုးကို စုစုပေါင်း အမှုပေါင်းသုံးသောင်းကျော် ကြိုတင်ဖမ်းဆီးနိုင်ခဲ့တယ်လို့ ရန်ကုန်တိုင်းဒေသကြီးရဲတပ်ဖွဲ့က ထုတ်ပြန်ပေးထားတဲ့ မှုခင်းစာရင်းအရ သိရပါတယ်။ 


 

Related News