ရန်ကုန်တိုင်းဒေသကြီးရဲ့ နောက်ထပ်စက်မှုဇုန်အသစ်တစ်ခုဖြစ်လာမယ့် ထန်းတပင်စက်မှုဇုန်စီမံကိန်းရဲ့ မြေတိုင်းတာမှုတွေကိုတော့ မေလ(၁၃)ရက်မှာစတင်ပြုလုပ်နေပြီဖြစ်ပါတယ်။ဧက(၁၈၀၀)ကျော်ရှိတဲ့ ထန်းတပင်စက်မှုဇုန်စီမံကိန်းကို ဟောင်ကောင်၊ တရုတ်နဲ့ မြန်မာကုမ္ပဏီသုံးခုကပူးပေါင်း အကောင်အထည်ဖော်မှာ ဖြစ်ပြီး အမေရိကန်ဒေါ်လာသန်း(၅၀၀)၀န်းကျင်ကုန်ကျမယ့် စီမံကိန်းတစ်ခုဖြစ်ပါတယ်။ ဒီစီမံကိန်းဖော်ဆောင်နိုင်ဖို့ ပြီးခဲ့တဲ့ရက်ပိုင်းက ပြုလုပ်တဲ့ ရန်ကုန်ရင်းနှီးမြှုပ်နှံမှုဖိုရမ်မှာ သဘောတူလက်မှတ်ရေးထိုး ခဲ့တာဖြစ်ပြီး စီမံကိန်းကာလက (၉)နှစ်ဝန်းကျင်ကြာမြင့်မယ်လို့ သိရပါတယ်။ဒီစီမံကိန်းမှာနည်းပညာဇုန်တွေ၊ ခရီးသွားကဏ္ဍအတွက် ရေပေါ်မြို့စီမံကိန်း၊ အထည်အလိပ်နဲ့ အထည်ချုပ်လုပ်ငန်းတွေ၊ ဆိပ်ကမ်းတွေနဲ့ လေးလမ်းသွားမြစ်ကူးတံတားတစ်စင်းလည်း ပါဝင်မှာဖြစ်ပြီး စီမံကိန်းပြီးရင် အလုပ်အကိုင်တစ်သိန်းခွဲရရှိနိုင်ဖို့ ခန့်မှန်းထားပါတယ်။

ရန်ကုန်မှာ လက်ရှိ စက်မှုဇုန်(၂၉)ခုနဲ့ အထူးစီပွားရေးဇုန်(၁)ခုရှိပြီး တစ်နိုင်ငံလုံးမှာရှိတဲ့ စက်မှုဇုန် တွေရဲ့(၅၃)ရာခိုင်နှုန်းက ရန်ကုန်မှာ ဖြစ်ပါတယ်။ ရန်ကုန်တိုင်းဒေသကြီးအစိုးရအနေနဲ့ ရန်ကုန်မြိုကအပြင်ဘက်မှာ စက်မှုဇုန်(၁၁)ခုကိုထပ်မံဖော်ဆောင်ဖို့ လျာထားတာဖြစ်ပါတယ်။ ဒီထဲမှာထန်းတပင်စက်မှုဇုန်ကလည်း တစ်ခုအပါအ၀င်ဖြစ်ပြီး နောက်ထပ်လှည်းကူး၊ ကော့မှူး၊ ကွမ်းခြံကုန်း၊ တွံ့တေး၊ ကျောက်တန်း၊ ခရမ်း၊ သုံးခွ၊ တိုက်ကြီးနဲ့ မှော်ဘီမြို့နယ်တွေမှာလည်း ဧကတစ်ထောင်ကျော်စီရှိမယ့် စက်မှုဇုန်သစ်(၁၀)ခုကို ဆက်လက်ဖော်ဆောင်မယ်လို့ သိရပါတယ်။ ရန်ကုန်တိုင်းဒေသကြီးကိုတော့ (၂၀၁၁)ခုနှစ် ဧပြီလ(၁)ရက်ကနေ (၂၀၁၉) မတ်လအထိ(၈)နှစ်အတွင်း ၀င်ရောက်ထားတဲ့ နိုင်ငံခြားရင်းနှီး မြှုပ်နှံမှုစုစုပေါင်းက အမေရိကန်ဒေါ်လာ(၂၂)ဘီလီယံကျော်ရှိခဲ့ပြီး မြန်မာနိုင်ငံကိုဝင်ရောက်တဲ့ နိုင်ငံခြား ရင်းနှီးမြှုပ်နှံမှုရဲ့ တစ်ဝက်ကျော် ဖြစ်ပါတယ်။ ဒါ့အပြင် ဒီရှစ်နှစ်အတွင်း နိုင်ငံသားတွေရဲ့ ရန်ကုန်မှာ ရင်းနှီးမြှုပ်နှံထားမှု ပမာဏက ကျပ်ဘီလီယံ (၈၅၀၀)ကျော်ရှိပြီး သီလ၀ါအထူးစီးပွားရေးဇုန်ကိုလည်း နိုင်ငံခြားရင်းနှီးမြုပ်နှံမှု အမေရိကန်ဒေါ်လာ (၁.၆)ဘီလီယံကျော် ၀င်ရောက်ထားတယ်လို့ သိရပါတယ်။

 

 

Related News