စက်မှုဇုန်တွေအတွင်း မြေလက်ဝယ်ရှိပြီး အမှန်တကယ်လုပ်ငန်းလုပ်ကိုင်ခြင်းမရှိပါက မြေပြန်ပေးရမှာဖြစ်ပြီး မလိုက်နာပါက ထောင်ဒဏ် အထိချမှတ်နိုင်မယ့် ပုဒ်မကို စက်မှုဇုန်ဥပဒေမူကြမ်းအတွင်း ထည့်သွင်းရေးဆွဲလိုက်ပါတယ်။ အခုလအတွင်းအများပြည်သူတွေအကြံပြုနိုင်အောင် ထုတ်ပြန်ပေးထားတဲ့ စက်မှုဇုန်ဥပဒေကြမ်းအရ လက်ရှိလုပ်ငန်းလုပ်ကိုင်ခြင်း မရှိသေးတဲ့ မြေကွက်တွေအနေနဲ့ ဒီဥပဒေထွက်ရှိပါက ၆လအတွင်း လုပ်ငန်းစီမံချက်တင်ပြရမှာဖြစ်ကာ နှစ်နှစ်အတွင်း အပြီးအကောင်အထည်ဖော်ရမယ်လို့ပါရှိပါတယ်။ဒီလိုမှမလုပ်နိုင်ရင်တော့ ဒေသဆိုင်ရာကော်မတီက အမှန်တကယ်လုပ်ငန်းလုပ်ကိုင်သူတွေထံ သတ်မှတ်ထားတဲ့ ကာလပေါက်ဈေးရဲ့ တစ်ဝက်နှုန်းထားနဲ့ ပြန်လည်လွှဲပြောင်းပေးမှာဖြစ်ပြီး မလိုက်နာပါက ငွေဒဏ် ကျပ်သိန်းနှစ်ဆယ်ပေးဆောင်ရမှာ အပြင် ထောင်ဒဏ် သုံးနှစ်အထိ ချမှတ်နိုင်တယ်လို့ ဥပဒေမှာ ထည့်သွင်း ရေးဆွဲထားပါတယ်။ဒီဥပဒေမှာတော့ စက်မှုဇုန်မြေတွေကို ဒေသဆိုင်ရာကော်မတီအနေနဲ့ နှစ်(၅၀)အထိ ငှားရမ်းနိုင်ပြီး (၁၀)နှစ် နှစ်ကြိမ် သက်တမ်းထပ်တိုးနိုင်တယ်လို့ပါရှိပါတယ်။

မြန်မာနိုင်ငံမှာရှိတဲ့ စက်မှုဇုန်တွေရဲ့ (၅၃)ရာခိုင်နှုန်းက ရန်ကုန်တိုင်းမှဖြစ်ပြီး စုစုပေါင်းစက်မှုဇုန်(၂၉)ခု အထိရှိနေတာဖြစ်ပါတယ်။ရန်ကုန်မှာတော့ ပြီးခဲ့တဲ့ အစိုးရလက်ထက်ကတည်းက (၆လ)အတွင်း အကောင်အထည်မဖော်တဲ့ စက်မှုဇုန်က မြေလွတ်တွေကို ပြန်သိမ်းမယ့် ညွှန်ကြားချက်ထုတ်ထားတာ ဖြစ်ပြီး လက်ရှိအစိုးရလက်ထက်မှာလည်း ဒီအမိန့်အတိုင်း ဆက်လက်ဆောင်ရွက်မယ်လို့ ၂၀၁၆ ခုနှစ် မေလ(၂၆)ရက်မှာ သက်ဆိုင်ရာ တိုင်းဝန်ကြီးက လွှတ်တော်မှာဖြေကြားထားပါတယ်။ စက်မှုဇုန်ဥပဒေကို လက်ရှိ စက်မှုဇုန်တွေ စီမံခန့်ခွဲပိုမိုကောင်းမွန်ဖို့နဲ့ စက်မှုဇုန်သစ်တွေအတွက် ရည်ရွယ်ရေးဆွဲထားတာလို့သိရပါတယ်။ယခင် ဥပဒေရေးရာနဲ့အထူးကိစ္စရပ်များ လေ့လာဆန်းစစ်ရေးကော်မရှင်ရဲ့ ပြည်ထောင်စုလွှတ်တော်ကို တင်သွင်းခဲ့တဲ့ လက်ရှိ အစိုးရလက်ထက် ဦးစားပေးပြဋ္ဌန်းသင့်တဲ့ ဥပဒေ (၄၈)ခုထဲမှာ (၂၁)ခုမြောက် ဥပဒေလည်းဖြစ်ပါတယ်။

 

Related News