မြန်မာနိုင်ငံမှာ သံနဲ့သံမဏိ အသုံးပြုမှုအခြေအနေနဲ့ ပတ်သက်ပြီး စီးပွားရေးနှင့်ကူးသန်းရောင်းဝယ်ရေး ဝန်ကြီးဌာနရဲ့ပြည်ပကနေ တင်သွင်းမှု ကိန်းဂဏန်းအရ တစ်နှစ်ကို တန်ချိန်(၂)သန်းခန့် တင်သွင်းနေတယ်လို့ မေလ(၁၄)ရက်က မန္တလေးမြို့ မာကျူရီဟိုတယ်မှာ ပြုလုပ်ခဲ့တဲ့ မြန်မာ့သံနှင့်သံမဏိထုတ်လုပ်ရေးလုပ်ငန်းများ ဖွံ့ဖြိုးတိုးတက်ရေး ဟောပြောပွဲက သိရပါတယ်။ မြန်မာနိုင်ငံမှာ သံနဲ့သံမဏိထုတ်လုပ်မှုမှာ အကြီးစားထုတ်လုပ်မှုမရှိသေးဘဲ အသေးစားထုတ်လုပ်မှုသာရှိပြီး ပြည်ပနိုင်ငံတွေ နဲ့နှိုင်းယှဉ်ပါက အနည်းငယ်သာထုတ်လုပ်နိုင်သေးတယ်လို့သိရပါတယ်။ ပြည်တွင်းလိုအပ်ချက်မှာ တစ်နှစ်ကို တန်ချိန်(၂)သန်းခန့် လိုအပ်ချက်ရှိသော်လည်း ထုတ်လုပ်မှုမှာ လိုအပ်ချက်ရဲ့(၁၀)ရာခိုင်နှုန်းသာရှိတဲ့အတွက် ခေတ်ကာလအရ လိုအပ်ချက်အများအပြား ရှိနေတယ်လို့ ဆိုပါတယ်။စက်မှုဝန်ကြီးဌာနလက်အောက်မှာ အမှတ်(၁)သံမဏိစက်ရုံ(မြင်းခြံ)နဲ့ အမှတ်(၂) သံမဏိ စက်ရုံ(ပင်းပက်) စတဲ့ သံမဏိစက်ရုံ (၂)ရုံရှိတယ်လို့သိရပါတယ်။ မြန်မာနိုင်ငံမှာ သံမဏိထုတ်လုပ်တဲ့ပုဂ္ဂလိကလုပ်ငန်းစက် ရုံကအနည်းငယ်သာရှိပြီးပြည်တွင်းလိုအပ်ချက်ပြည့်မီစေရန် အတွက် ပုဂ္ဂလိကလုပ်ငန်းစက်ရုံတွေကိုပံ့ပိုးကူညီပေးပြီး ပုဂ္ဂလိက လုပ်ငန်းစက်ရုံတွေနဲ့ ပူးပေါင်းကာ PPP စနစ်နဲ့ ဆောင်ရွက်သွားဖို့ အစီအစဉ်ရှိတယ်လို့ စက်မှုဝန်ကြီးဌာန၊ အမှတ်(၁) အကြီး စား စက်မှုလုပ်ငန်း အထွေထွေမန်နေဂျာ ဦးသိန်းဇော်က ပြောပါတယ်။

မြန်မာ့သံနှင့်သံမဏိထုတ်လုပ်ရေးလုပ်ငန်းများ ဖွံ့ဖြိုးတိုးတက်ရေး ဟောပြောပွဲကို အီတလီနိုင်ငံအခြေစိုက် Danieli Co,Ltd က ဦးစီးပြုလုပ်တာ ဖြစ်ပါတယ်။ မြန်မာနိုင်ငံရှိ သံ၊ သံမဏိ ထုတ်လုပ်ရေးလုပ်ငန်း ဖွံ့ဖြိုးတိုးတက်လာစေရန်၊ နိုင်ငံတွင်းရှိ သံထုတ်လုပ်ရေးလုပ်ငန်းတွေ ကမ္ဘာ့အဆင့်မီ နည်းပညာတွေနဲ့ ထုတ်လုပ်နိုင်စေဖို့ ရည်ရွယ်ပြီးပြုလုပ်ရတာ ဖြစ်တယ်လို့ သိရပါတယ်။ Danieli Co,Ltd အနေနဲ့ ပြည်ပကတင်သွင်းမှုတွေကို လျှော့ချနိုင်စေဖို့၊ ခေတ်မီနည်းပညာနဲ့ ထုတ်လုပ်နိုင်တဲ့ စက်ရုံတွေ ပေါ်ပေါက်လာစေဖို့ ကူညီပေးသွားမယ်လို့ Danieli Co,Ltd မှ တာဝန်ရှိသူတစ်ဦးက ပြောပါတယ်။အခုပြုလုပ်ခဲ့တဲ့ ဟောပြောပွဲကို စက်မှုဝန်ကြီးဌာနမှ တာဝန်ရှိသူများ၊ မြန်မာ့စီးပွားရေးကော်ပိုရေးရှင်းမှ တာဝန်ရှိသူများ၊ စက်မှုဇုန်က ကုန်ထုတ်လုပ်သူများ၊  မန္တလေးနည်းပညာတက္ကသိုလ် မှ ဆရာ၊ဆရာမများ၊ လုပ်ငန်းရှင်များနဲ့ ဖိတ်ကြားထားသူ များ တက်ရောက်ခဲ့ကြတယ်လို့ သိရပါတယ်။

 

Related News