ရန်ကုန်မြို့တော်မှာ ခွေးလေခွေးလွင့်ပြဿနာကိုဖြေရှင်းဖို့ ညှိနှိုင်းဆွေးနွေးမှုတွေကို ရန်ကုန်မြို့တော်စည်ပင်သာယာရေး ကော်မတီ၊ ဒုတိယမြို့တော်ဝန်က ဦးဆောင်ပြီး တိုင်းဒေသကြီးလွှတ်တော်ကိုယ်စားလှယ်တွေ၊ သက်ဆိုင်ရာအဖွဲ့အစည်းတွေ၊ ပညာရှင်တွေနဲ့ ပူးပေါင်းပြုလုပ်နေပေမယ့် လက်ရှိချိန်ထိ အဖြေမထွက်သေးဘူးလို့ သိရပါတယ်။ 

မြို့တော်စည်ပင်သာယာလှပဖို့အပါအ၀င် အများပြည်သူတွေ နေ့စဉ်သွားလာလှုပ်ရှားမှုတွေမှာလည်း ခွေးလေခွေးလွင့်ကိစ္စဟာလည်း ပြဿနာ တစ်ခုအဖြစ်ရှိနေတယ်လို့ သိရပါတယ်။လမ်းတွေပေါ်မှာ ပိုင်ရှင်မဲ့၊ ခွေးလေခွေးလွင့် အကိုက်ခံရမှုများလာသလို အကိုက်ခံရတာတွေကြောင့် လူသေဆုံးမှုတွေရှိလာတယ်လို့လည်း တိုင်းဒေသကြီးလွှတ်တော်ကိုယ်စားလှယ် ဒေါ်ကြည်ပြာက ပြောပါတယ်။ ခွေးလေခွေးလွင့် ပြဿနာဖြေရှင်းဖို့ နည်းလမ်းတွေအနေနဲ့ အရင်က အဆိပ်ချရှင်းလင်းတာ၊ သင်းကွပ်တာတွေနဲ့ ခွေးလေခွေးလွင့် ထိန်းသိမ်းစောင့်ရှောက်ရေးဂေဟာတွေကို ပိုဆောင်ပေးပြီး ဖြေရှင်းခဲ့တာတွေရှိခဲ့တယ်လို့ သိရပါတယ်။

ရန်ကုန်မြို့တော်မှာ ခွေးလေခွေးလွင့်ပြဿနာဖြေရှင်းဖို့ ရန်ကုန်မြို့တော်စည်ပင်သာယာရေးကော်မတီ၊ ဒုတိယမြို့တော်ဝန်ကတော့ သတ်ဖြတ်တဲ့နည်းလမ်းကို သုံးပြီးဖြေရှင်းဖို့ကိုတော့ လုံးဝလုပ်ဆောင်သွားမှာ မဟုတ်ဘူးလို့ ပြောကြားထားတယ်လို့ ခွေးလေခွေးလွင့် ပြဿနာကို ဖြေရှင်းဖို့ ညှိနှိုင်းဆွေးနွေးမှုတွေမှာ ပါဝင်လုပ်ဆောင်နေတဲ့ တိုင်းဒေသကြီးလွှတ်တော် ကိုယ်စားလှယ်ဒေါ်ကြည်ပြာက ပြောပါတယ်။ ဒါ့ကြောင့် တခြားနည်းလမ်းတွေကို စဉ်းစားညှိနှိုင်းနေကြပြီး လက်ရှိချိန်ထိတော့ အဖြေမထွက်သေးဘူးလို့လည်း ဒေါ်ကြည်ပြာက ပြောပါတယ်။ 

ခွေးလေခွေးလွင့်ပြဿနာကိုလက်ရှိမှာတော့ သင်းကွပ်တာတွေနဲ့ ခွေးလေခွေးလွင့်ထိန်းသိမ်း စောင့်ရှောက်ရေး ဂေဟာတွေကို ပို့ဆောင်ပေးတာတွေကို ရန်ကုန်မြို့တော်စည်ပင်သာယာရေးကော်မတီကဖြေရှင်းနေသလို အခြားအရပ်ဘက်အဖွဲ့အစည်းတွေကလည်း ကူညီလုပ်ဆောင်နေတယ်လို့ သိရပါတယ်။ ဒီလုပ်ငန်းစဉ်တွေနဲ့ပတ်သက်လို့ ဘတ်ဂျတ်လိုအပ်မှုတွေရှိနေပြီး နိုင်ငံတကာက ထောက်ပံ့ကူညီပေးမှု တချို့ရှိပေမယ့် ရန်ကုန်မြို့တော်အတွင်း ခွေးလေခွေးလွင့်အားလုံးအတွက်တော့ ကူညီထောက်ပံ့မှုတွေ အများအပြားလိုအပ်နေသေးတာလည်း ဖြစ်ပါတယ်။

ခွေးလေခွေးလွင့်တစ်ကောင်ကို သင်းကွပ်မှုကုန်ကျစရိတ်အနေနဲ့ (၃၅၀၀၀)၀န်းကျင်ရှိပြီး ဒါ့ပြင် ဒီခွေးတွေကို နှစ်စဉ် ကာကွယ်ဆေးထိုးရမယ့် ကုန်ကျစရိတ်တွေလည်းရှိတယ်လို့သိရပါတယ်။ လက်ရှိရန်ကုန်မြို့တော် စည်ပင်သာယာနယ်နမိတ်အတွင်း ပိုင်ရှင်မဲ့၊ ခွေးလေခွေးလွင့် ကောင်ရေ(၂)သိန်းနဲ့ (၄)သိန်းဝန်းကျင် ကြားရှိတယ်လို့လည်း သိရပါတယ်။ ခွေးလေခွေးလွင့်ထိန်းသိမ်းစောင့်ရှောက်ရေးဂေဟာအနေနဲ့ မြို့တော်စည်ပင်က ဖွင့်လှစ်ထားတဲ့ ဂေဟာတစ်ခု အပါအ၀င် အခြားပုဂ္ဂလိက အသင်းအဖွဲ့တွေက ဖွင့်လှစ်ထားဂေဟာ စုစုပေါင်း (၁၀)ခုဝန်းကျင်ရှိပြီး ဂေဟာတစ်ခုကို ခွေးကောင်ရေ ရာဂဏာန်းခန့်သာ ခွင့်ပြုထားနိုင်တယ်လို့ သိရပါတယ်။ 

 

 

Related News