ဖော့ဘူး၊ပလက်စတစ်ပစ္စည်းတွေရဲ့နေရာမှာ  အစားထိုးသုံးစွဲဖို့အတွက် ကွမ်းသီးဖတ်မှထုတ်လုပ်တဲ့ သဘာဝလူသုံးကုန်ပစ္စည်းတွေကို ထုတ်လုပ်နေပြီး လက်ရှိမှာတော့ သုံးစွဲသူနည်းပါးနေသေးတယ်လို့ သိရပါတယ်။ 

ဒဂုံမြို့သစ်(အရှေ့ပိုင်း)မြို့နယ်မှာရှိတဲ့ Nature Myanmar ကုမ္ပဏီအနေနဲ့ ကွမ်းသီးပင်မှထွက်ရှိတဲ့ကွမ်းသီးဖတ်တွေကို လူသုံးကုန် ပစ္စည်းအဖြစ် ထုတ်လုပ်ဖို့လုပ်ဆောင်ခဲ့ပြီး စတင်လုပ်ဆောင်ရာမှာ နည်းပညာအခက်အခဲတွေ၊ ငွေကြေးအခက်အခဲတွေ များစွာဖြစ်ခဲ့ ရတယ်လို့သိရပါတယ်။ ကုန်ချောထွက်ရှိဖို့အတွက်ကို အချိန်ကာလ(၈)လကျော် အချိန်ယူလေ့လာခဲ့ရပြီး အခုဆိုလက်ရှိ်မှာတော့ ကွမ်းသီးဖတ်နဲ့ ပြုလုပ်ထားတဲ့ ပန်းကန်၊ ဘူး၊ ဇွန်းစတဲ့ ပစ္စည်း(၁၅)မျိုးခန့် ထုတ်လုပ်နိုင်ခဲ့ပြီလို့သိရပါတယ်။ပစ္စည်းထုတ်လုပ်ဖို့အတွက် ကွမ်းသီးဖက်တွေကို မွန်ပြည်နယ်၊ တနသာင်္ရီတိုင်း ဒေသတွေမှ အဓိကမှာယူရပြီး သယ်ယူစရိတ်အနည်းငယ်မြင့်မားတာတွေကြောင့် ကုန်ပစ္စည်းတွေရဲ့ဈေးနှုန်းကတော့ ပလက်စတစ်တွေ၊ ဖော့တွေရဲ့ဈေးနှုန်းထက်တော့ များနေတယ်လို့သိရပါတယ်။အခုလို ကွမ်းသီးဖတ်မှထုတ်လုပ်တဲ့ သဘာဝလူသုံးကုန် ပစ္စည်းတွေရဲ့ဈေးနှုန်း ကတော့ အနည်းဆုံး(၃၅)ကျပ်မှ (၁၈၀)ထိရှိတာကြောင့် သုံးစွဲသူနည်းနေသေးတယ်လို့သိရပါတယ်။

ကွမ်းသီးပင်မှထွက်ရှိတဲ့ကွမ်းသီးဖတ်တွေကို လူသုံးကုန်ပစ္စည်းတွေအဖြစ် ပြန်လည်အသုံးပြုရာမှာ သဘာဝပစ္စည်းဖြစ်တာကြောင့် ခြောက်သွေ့မှုကို အဓိကထားရမှာဖြစ်တယ်လို့သိရပါတယ်။

အစိုဓါတ်ရှိရင် မှိုတက်ခြင်းနဲ့ဖားဥတက်ခြင်းတွေဖြစ်ပေါ်နိုင်တာကြောင့် ပစ္စည်းတွေရဲ့ သက်တမ်းကို(၃) လအထိ သတ်မှတ်ထားတယ်လို့သိရပါတယ်။အခုလို ဖော့ဘူး၊ပလက်စတစ်ပစ္စည်းတွေရဲ့နေရာမှာ   ကွမ်းသီးဖတ်မှထုတ်လုပ်တဲ့ လူသုံးကုန်ပစ္စည်း တွေကို အစားသုံးစွဲတာကြောင့် သုံးစွဲသူတွေအတွက် ကျန်းမာရေးလည်းကောင်းသလို  စွန့်ပစ်ပါကလည်း ပျက်စီးလွယ်ပြီး မြေဆွေးအဖြစ်ပြောင်း လည်းတာကြောင့် သဘာဝပတ်ဝန်းကျင်အတွက်ကောင်းတယ်လို့သိရပါတယ်။လက်ရှိမှာ ကွမ်းသီးဖတ်မှထုတ်လုပ်တဲ့ လူသုံးကုန်ပစ္စည်းတွေကို သုံးစွဲမှုအနေနဲ့ Hotelတွေ၊ စားသောက်ဆိုင်တွေနဲ့ အလှူအတန်းလုပ်ရာ တွေမှာသာ ၀ယ်ယူမှုတွေရှိနေတယ်လို့သိရပါတယ်။သုံးစွဲသူတွေကတော့ ကျန်းမာရေးအတွက် ဖော့နဲ့ ပလက်စတစ်နေရာမှာ အစားထိုးသုံးစွဲဖို့ အတွက် အဓိက၀ယ်ယူဖြစ်တာလို့သိရပြီး သုံးရတာလည်းအဆင်ပြေမှုရှိတာကြောင့် ၀ယ်ယူဖြစ်တာလို့ပြောပါတယ်။

Nature Myanmar ကုမ္ပဏီအနေနဲ့ အခုလို ကွမ်းသီးဖတ်မှထုတ်လုပ်တဲ့ လူသုံးကုန်ပစ္စည်းတွေကို ဈေးနှုန်းလျှော့ချနိုင်ဖို့အတွက် သယ်ယူစရိတ် သက်သာအောင် ကုန်ကြမ်းပစ္စည်းထွက်ရှိတဲ့ မွန်ပြည်နယ်၊ ကရင်ပြည်နယ်၊ တနသာင်္ရီတိုင်းဒေသတွေမှာ ကုန်ချောထွက်ရှိဖို့ လုပ်ဆောင်သွား မယ်လို့သိရပါတယ်။

 

 

Related News