အဂတိလိုက်စားမှု တိုက်ဖျက်ရေးကော်မရှင်၏ နှစ်ပတ်လည်လုပ်ငန်းဆောင်ရွက်မှုအစီရင်ခံစာနဲ့ စပ်လျဉ်းပြီး လွှတ်တော်ကိုယ်စားလှယ်များ၏ ဆွေးနွေးချက်များအပေါ် သက်ဆိုင်ရာ ပြည်ထောင်စုအဆင့် အဖွဲ့အစည်းဝင်က ပြန်လည်ရှင်းလင်းဆွေးနွေးခြင်းနှင့် လွှတ်တော်က မှတ်တမ်း တင်ခြင်းတွေကို မေလ(၂၀)ရက်က နေပြည်တော်မှာရှိတဲ့ ဒုတိယအကြိမ် ပြည်ထောင်စုလွှတ်တော် (၁၂)ကြိမ်မြောက် ပုံမှန်အစည်းအဝေး န၀မနေ့မှာ မှတ်တမ်းတင်ခဲ့တယ်လို့ သိရပါတယ်။  အဂတိလိုက်စားမှု တိုက်ဖျက်ရေးကော်မရှင်၏ နှစ်ပတ်လည်လုပ်ငန်း ဆောင်ရွက်မှုအစီရင်ခံစာကို ပြီးခဲ့တဲ့ မေလ(၁၃)ရက်က ပြုလုပ်ခဲ့တဲ့ ဒုတိယအကြိမ် ပြည်ထောင်စုလွှတ်တော်(၁၂)ကြိမ်မြောက် ပုံမှန်အစည်းအဝေးမှာ တင်သွင်းခဲ့ပြီး လွှတ်တော်ကိုယ်စားလှယ် (၃၃)ဦးက ဆွေးနွေးခဲ့ကြပါတယ်။ ဆွေးနွေးမှုတွေအပေါ် အဂတိလိုက်စားမှု တိုက်ဖျက်ရေးကော်မရှင် ဥက္ကဋ္ဌ ဦးအောင်ကြည်က ပြန်လည်ရှင်းလင်း ဆွေးနွေးခဲ့ရာလွှတ်တော် ကိုယ်စားလှယ်များ အကြံပြုထားတဲ့အတိုင်း အဂတိလိုက်စားမှုတိုက်ဖျက်ရေးလုပ်ငန်းများကို လာမယ့် နှစ်များမှာ ပိုမိုတိုးတက်အောင် ဆောက်ရွက်သွားမှာ ဖြစ်ပြီး အဂတိလိုက်စားမှုတိုက်ဖျက်ရေး ကော်မရှင်အနေနဲ့ စုံစမ်းစစ်ဆေးရေး၊ တရားစွဲဆိုရေး လုပ်ငန်းများကိုသာမက တားဆီးကာကွယ်ရေးနဲ့ ပညာပေးရေးလုပ်ငန်းများကိုပါ တစ်ပြိုင်နက်တည်း တိုးချဲ့ဆောင်ရွက်သွားမယ်လို့ သိရပါတယ်။

အဂတိလိုက်စားမှုတိုက်ဖျက်ရေးကော်မရှင်အနေနဲ့ ပြီးခဲ့တဲ့ တစ်နှစ်လုံးမှာအဂတိလိုက်စားမှု (၄၆)မှု အရေးယူနိုင်ခဲ့ပြီး အဆိုပါ ပမာဏဟာ နိုင်ငံတစ်နိုင်ငံမှာဖြစ်သင့်တာထက် အများကြီးနည်းပါးနေတယ်လို့ သိရပါတယ်။ အရေးယူနိုင်မှု နည်းပါးရတဲ့ အဓိကအကြောင်းအရင်းတွေထဲမှာ ပြစ်မှုဖြစ်ပွားရာဒေသတွေမှာ လနဲ့ချီပြီးကြာအောင် စစ်ဆေးရခြင်းတွေ၊ တိုင်ကြားတဲ့ အမှုကကြာခဲ့ပြီဆိုလျှင် ခိုင်လုံသောသက်သေများနဲ့ သက်သေခံအထောက်အထားများကို ခက်ခဲစွာ ရှာဖွေရခြင်းတွေကြောင့် ဖြစ်တယ်လို့ အဂတိလိုက်စားမှုတိုက်ဖျက်ရေး ကော်မရှင်ဥက္ကဋ္ဌ ဦးအောင်ကြည်က ပြောပါတယ်။ ဒါ့အပြင် လူသားအရင်းအမြစ်၊ နည်းပညာ၊ ကျွမ်းကျင်မှု၊ အတွေ့အကြုံ အားနည်းချက်များကလည်း အကြောင်းအရင်းတစ်ရပ်အဖြစ် ပါဝင်နေသလို အမှုတစ်ခုကိုစစ်ဆေးရင် အမှုအသေးအကြီးပေါ်မူတည်ပြီး ကော်မရှင်အဖွဲ့ဝင် တစ်ဦးက ခေါင်းဆောင်လျက် ၀န်ထမ်းဦးရေ (၁၀)ဦးမှ (၁၅)ဦးထိ အသုံးပြုရတယ်လို့ သိရပါတယ်။

အဂတိလိုက်စားမှုတိုက်ဖျက်ရေးကော်မရှင်ကို ပြီးခဲ့တဲ့တစ်နှစ်အတွင်းတိုင်ကြားစာ (၁၀၅၄၃)စောင်ရရှိခဲ့ပြီး  (၄၆)မှုကိုသာ ကော်မရှင်က စုံစမ်းစစ်ဆေး တရားစွဲဆိုနိုင်ခဲ့တယ်လို့ သိရပါတယ်။ မြန်မာနိုင်ငံမှာ အသေးစားအဂတိလုိုက်စားမှုများ မကျဆင်းရခြင်းရဲ့ အဓိကအကြောင်းအရင်းတစ်ခုဟာ ရုံးဌာနများမှာ အရိုးစွဲနေတဲ့ ဌာနတွင်းအဂတိလိုက်စားမှုများကြောင့် ဖြစ်ရတယ်လို့သိရပါတယ်။

 

Related News